Protesta e studentëve në Shqipëri ka hyrë në ditën e 11-të, me pjesëmarrjen e pedagogëve, mjekëve, profesionistëve të shëndetësisë dhe qytetarëve, të cilët iu bashkuan marshimit drejt Kryeministrisë në Tiranë.
Pedagogë dhe studentë u mblodhën fillimisht para Universitetit Politeknik të Tiranës. Kryetari i Sindikatës së Pedagogëve, Aleksandër Kovaçi, bëri thirrje për bashkëpunim në mbështetje të kauzës së studentëve, duke kërkuar fundin e asaj që e cilësoi si diktat në universitete.
“Ne do t’i bashkëngjitemi protestës së studentëve. Aty ku janë ata, do të jemi edhe ne”, deklaroi Kovaçi për mediet.
Në marshimin drejt Kryeministrisë u bashkuan edhe studentë të mjekësisë, të veshur me uniformat e bardha dhe maska kirurgjikale. “Bashkohuni me ne” dhe “Studentët e bashkuar kanë për të fituar” ishin disa nga thirrjet e protestuesve.
Mjekët kërkojnë dorëheqjen e kryeministrit
Një grup mjekësh, stomatologësh, farmacistësh dhe profesionistësh të tjerë të shëndetësisë iu bashkua protestës, duke bërë thirrje për ruajtjen e karakterit paqësor të saj dhe shmangien e veprimeve që rrezikojnë jetën.
Mjeku dhe pedagogu Ermal Pashaj, në emër të nënshkruesve të një deklarate të personelit shëndetësor, dënoi dhunën ndaj studentëve dhe personave që u kanë dhënë ndihmën e parë të lënduarve.
Ai theksoi se kërkesat për arsim cilësor, mundësi të barabarta dhe të drejtën e të rinjve për të ndërtuar të ardhmen në vendin e tyre janë çështje që prekin të gjithë shoqërinë.
Grupi kërkoi dorëheqjen e kryeministrit Edi Rama, si përgjegjësi politike për krizën dhe përshkallëzimin e saj, si dhe krijimin e një qeverie tranzitore me përbërje teknike. Sipas deklaratës, një zgjidhje e tillë do të mundësonte daljen paqësore nga situata, funksionimin e institucioneve dhe rikthimin e besimit qytetar.
Edhe kreu i Sindikatës së Mjekëve, Gentian Stroni, i cilësoi legjitime kërkesat e studentëve dhe kërkoi mbështetjen e tyre, duke bërë thirrje për vetëpërmbajtje nga protestuesit dhe policia.
“Ne nuk e duam dhunën fizike, ne duam të përkrahim studentët, që këta studentë të mos goditen”, deklaroi Stroni, duke theksuar se qëllimi nuk duhet të jetë përballja fizike mes palëve.
Ndërkohë, pedagogu dhe ish-deputeti Aleksandër Biberaj deklaroi se kërkesa e protestuesve për largimin e kryeministrit është e panegociueshme.
Protestat vijojnë prej 11 ditësh në Tiranë, me kërkesa që përfshijnë dorëheqjen e kryeministrit Edi Rama, ndryshimin e klasës aktuale politike dhe përmirësimin e kushteve të arsimit dhe të jetesës. Pjesëmarrja e pedagogëve dhe profesionistëve të shëndetësisë shënon zgjerimin e mbështetjes për lëvizjen studentore.
© 2026 Argumentum
