Në një konferencë shtypi ditët e fundit një gazetar pyeti zëdhënësen e MPJ-së kineze Mao Ning se cili ishte mendimi i saj për fenomenin “China Haul” në rrjetet sociale. Shumë turistë të huaj vijnë në Kinë me valixhe bosh për të blerë mallra kineze e kthehen me valixhe të mbushura, dhe videot e hapjes së kutive për të ndarë me të tjerët gjërat e mira kineze janë të shpeshta. Jashtë dyqaneve të përkohshme të markave kineze në Londër, Paris e qytete të tjera, shumë njerëz gjithashtu presin në radhë të gjatë për të blerë.
Lidhur me këtë, zëdhënësja u shpreh: “Jam shumë e lumtur që gjithnjë e më shumë miq të huaj mendojnë se Kina ia vlen të vizitohet, markat kineze ia vlen të blihen dhe mënyra e jetesës kineze ia vlen të përjetohet. Mendoj se kjo tregon forcën tërheqëse të gjallërisë së industrisë kineze, atmosferës së përditshme dhe lehtësive shoqërore”.
Po çfarë është “China Haul”?
Është fenomeni që njerëzit regjistrojnë video për “çfarë kanë blerë e çfarë kanë gjetur” në Kinë. Nga produktet teknologjike, si dronë, kamera, celularë, deri në produktet lokale, si çanta, veshje, parfume, qoftë vizitorët dhe turistët që vijnë me valixhe bosh, qoftë përdoruesit e internetit që bëjnë blerje në internet, po regjistrojnë “korrjet e mëdha” të tyre.
Për të blerë më shumë dhe më shpejt, ata kanë mësuar të përdorin platformat e tregtisë elektronike kineze për të bërë blerje në internet, dhe i dërgojnë të gjitha gjërat që kanë blerë në hotelet ku rrinë në Kinë, duke i marrë të gjitha kur kthehen.
Po të shikosh listën e blerjes, mund të gjesh një sasi të madhe mallrash. Shumë përdorues të huaj interneti kanë lënë mesazhe poshtë videove të tyre, duke thënë: “Ju këshilloj të gjithëve që kur të udhëtoni në Kinë, të shkoni me sa më pak gjëra, sepse do të blini aty sa të lodheni!”
Sivjet, për Festën e Mesvjeshtës dhe Ditën Kombëtare, fluksi i udhëtarëve në pikat kufitare të Kinës ishte i lartë. Të dhënat e Administratës Kombëtare të Imigracionit tregojnë se gjatë pushimeve të Ditës Kombëtare, 15.462 milionë veta hynë në Kinë ose dolën nga Kina.
“China Haul” nuk tregon vetëm mallrat e larmishme, por edhe një mënyrë jetese të gjallë dhe tredimensionale kineze. Njerëzit jashtë Kinës shohin jo vetëm produktet, por edhe një Kinë të gjithanshme që mund të përcjellë ngrohtësinë e estetikës së jetës. Kur lidhja e produkteve ngrihet në nivel kulturor, kjo valë entuziazmi për “hapjen e pakove” po e lejon botën të shohë një Kinë më reale dhe më energjike.
Politika gjithnjë e më e elastike dhe e hapur e qeverisë kineze e hyrjes pa viza ka bërë që ardhja e vizitorëve të huaj në Kinë të jetë shumë më e lehtë. Deri tani, nga politika e tranzitit pa viza e Kinës kanë përfituar 57 vende në gjithë botën, ndërsa pikat e hyrjes janë shtuar në 65, dhe zonat e aktiviteteve mbulojnë 24 provinca dhe qytete në të gjithë Kinën.
Të dhënat e publikuara nga Administrata Kombëtare e Imigracionit në shtator tregojnë që gjatë 8 muajve të parë të këtij viti, në pikat kombëtare të kalimit kufitar u regjistruan 61.287 milionë hyrje-dalje të të huajve, me një rritje prej 19.5 % krahasuar me të njëjtën periudhë të vitit të kaluar. Ndër ta, numri i të huajve që hynë pa viza u rrit me 26.8 %, duke përbërë 77.6 % të numrit të përgjithshëm të vizitorëve të huaj në Kinë. Kjo do të thotë që tani afërsisht 8 nga 10 vizitorë të huaj në Kinë hyjnë pa vizë.
Në të njëjtën kohë, përvoja e kulturës tradicionale kineze të mirëqenies dhe produkteve të saj ka hyrë gjithashtu në listën e konsumit të turistëve të huaj. Sapunët mjekësorë dhe ushqimet me funksione mjekimi po bëhen gjithnjë e më të pëlqyer, dhe modeli i konsumit ndërkombëtar “mjekim-turizëm-blerje” po bëhet gjithnjë e më i specializuar.
Përveç vizitave të zakonshme në pikat turistike dhe blerjeve, me përparimin e vazhdueshëm të teknologjisë kineze, vizitat në fabrikat inteligjente, ose “turizmi teknologjik në fabrika”, po bëhen gjithashtu një trend i ri në turizmin kulturor dhe të brendshëm. Në një fabrikë prodhimi inteligjent të makinave, skenarët e përparuar të prodhimit inteligjent i lënë vizitorët e huaj të habitur.
Të huajt që vizituan fabrikën duke shikuar në të gjithë hapësirën procesin e prodhimit të pjesëve, si edhe procedurën e shtypjes së pjesëve të trupit të makinës duke përdorur direkt metal të shkrirë, thanë se e gjithë kjo ishte thjesht “shumë e mahnitshme”.
Punonjësit e ndërmarrjes shpjeguan që sivjet vizitat e të huajve kishin një rritje të dukshme. Që nga maji i këtij viti, kompania ka nisur zyrtarisht dhënien e udhëzimeve në anglishte dhe po vazhdon të përmirësojë shërbimet udhëzuese në gjuhë të ndryshme, për të përmbushur më mirë nevojat e vizitorëve të huaj./cgtn
