Në Prishtinë ka nisur punimet Forumi i 3-të Ekonomik Gjermano-Kosovar. Kryeministri Albin Kurti dhe ambasadori gjerman Rainer Rudolph theksuan rëndësinë e forcimit të partneriteteve dhe bashkëpunimit afatgjatë, raporton DW.
Në Prishtinë ka hapur punimet Forumi i 3-të Ekonomik Gjermano-Kosovar, i organizuar nga Oda Ekonomike Gjermano-Kosovare (OEGJK), në bashkëpunim me Ambasadën e Gjermanisë në Kosovëdhe partnerë të tjerë institucionalë e ekonomikë.
Sipas organizatorëve, ky forum përfaqëson një hap të rëndësishëm drejt forcimit të bashkëpunimit ekonomik ndërmjet Kosovës dhe Gjermanisë. Ai krijon mundësi për partneritete të reja biznesi, nxitjen e investimeve dhe zgjerimin e shkëmbimeve tregtare në sektorë të ndryshëm, përfshirë teknologjinë, energjinë e ripërtëritshme dhe prodhimin. Gjermania konsiderohet partneri më i rëndësishëm tregtar i Kosovës dhe një nga investitorët kryesorë të huaj në vend.
Rëndësia e partneriteteve
Ambasadori i Gjermanisë në Kosovë, Rainer Rudolph, tha se forumi, duke sjellë bashkë bizneset gjermane dhe kosovare, krijon mundësi të vlefshme për ndërtimin e partneriteteve, shqyrtimin e investimeve të reja dhe shfrytëzimin e potencialit të të dyja ekonomive.
“Synimi ynë i përbashkët është t’i çojmë marrëdhëniet ekonomike gjermano-kosovare në një nivel të ri, përmes forcimit të partneriteteve të biznesit, nxitjes së investimeve të reja dhe zgjerimit të tregtisë”, tha Rudolph.
Ai theksoi se partneriteti ndërmjet dy vendeve shkon përtej marrëdhënieve tregtare.
“Me Gjermaninë si partnerin më të rëndësishëm tregtar të Kosovës dhe një nga investitorët kryesorë të huaj, kjo marrëdhënie mbështetet në inovacion, ekspertizë, frymë sipërmarrëse dhe lidhje të forta mes qytetarëve dhe bizneseve tona”, u shpreh ambasadori gjerman.
Sipas tij, Kosova dhe Gjermania kanë potencialin që mundësitë ekzistuese t’i shndërrojnë në partneritete afatgjata dhe të ndërtojnë një të ardhme ekonomike më të fuqishme për të dyja vendet.
Në të njëjtën linjë u shpreh edhe Kryeministri i Kosovës, Albin Kurti. Ai tha se forumi dyditor në Prishtinë është vazhdim i diskutimeve të zhvilluara gjatë forumit të mbajtur në maj të këtij viti në Schloss Bensberg, në landin North Rhine-Westphalia të Gjermanisë.
Kurti: Mundësi të shumta bashkëpunimi
“Në Bensberg folëm për mundësitë. Këtu, gjatë dy ditëve të forumit, detyra jonë është që këto mundësi t’i shndërrojmë në bashkëpunim të strukturuar ekonomik dhe afatgjatë. Gjermania dhe Kosova e nisin këtë proces mbi një themel të fortë. Marrëdhëniet mes dy vendeve tona nuk janë ndërtuar vetëm mbi shifra tregtare apo marrëveshje investimesh, por mbi njerëzit”, tha Kurti.
Ai vlerësoi gjithashtu rolin e mërgatës kosovare në Gjermani, duke e cilësuar atë si të suksesshme dhe të integruar mirë në shoqërinë gjermane.
“Përgjatë dekadave, qindra mijëra kosovarë e kanë bërë Gjermaninë shtëpi të tyre. Ata janë bërë punëtorë, inxhinierë, mjekë, sipërmarrës dhe studentë që kanë kontribuar në zhvillimin e komuniteteve ku jetojnë. Ata kanë krijuar ura të qëndrueshme lidhëse ndërmjet dy shoqërive tona”, tha Kurti.
Kryeministri theksoi se diaspora kosovare në Gjermani kontribuon ndjeshëm edhe përmes remitancave, të cilat arrijnë në rreth 1.4 miliardë euro.
Duke folur për marrëdhëniet ekonomike ndërmjet dy vendeve, Kurti tha se ato tashmë mbështeten në një bazë të konsoliduar.
Rreth 200 kompani me kapital gjerman në Kosovë
“Kur flasim për bashkëpunimin ekonomik gjermano-kosovar, nuk po nisim nga zero. Rreth 200 kompani me kapital gjerman operojnë aktualisht në Kosovë, çka dëshmon besimin e tyre në ekonominë tonë. Sot, Gjermania është partneri ynë më i rëndësishëm tregtar”, deklaroi ai.
Forumi Ekonomik Gjermano-Kosovar do të vazhdojë punimet për dy ditë në Prishtinë. Krahas paneleve profesionale dhe diskutimeve tematike, pjesëmarrësit do të kenë mundësi të zhvillojnë takime biznesi dhe të realizojnë vizita në kompani, me qëllim forcimin e bashkëpunimit ekonomik ndërmjet Kosovës dhe Gjermanisë./DW
