Kompanitë kineze dhe gjermane të automjeteve shqyrtuan mënyra për të forcuar bashkëpunimin, në një periudhë transformimi të thellë global dhe konkurrence të ashpër në këtë industri.
Kongresi i 10-të Gjermano-Kinez i Industrisë së Automjeteve u mbajt të premten, me pjesëmarrjen e rreth 600 përfaqësuesve nga Kina dhe Gjermania.
Sipas Olaf Lies, kryeministrit të landit të Saksonisë së Poshtme, industria e automjeteve – përfshirë furnitorët dhe sektorët e teknologjisë – po kalon një nga proceset më të mëdha dhe më të shpejta të transformimit në historinë e saj.
Lies theksoi se ky transformim nxitet nga një sërë faktorësh, si elektrifikimi, digjitalizimi i automjeteve, përdorimi i inteligjencës artificiale në prodhim dhe në vetë automjetet, si dhe drejtimi autonom. Ai shtoi se kongresi përcjell një mesazh të qartë: bashkëpunimi midis Gjermanisë dhe Kinës duhet të thellohet, citon “Xinhua”.
Foto nga Chinanews.com.cn
Në klimën aktuale të industrisë së automjeteve, është thelbësore që kompanitë gjermane dhe kineze të ruajnë dialogun dhe të krijojnë partneritete të qëndrueshme e të besueshme, u shpreh Thomas Schmall, Drejtor Ekzekutiv i “Volkswagen Group Technology”.
Ndërkohë, Liu Minqiang, Drejtor i Përgjithshëm i Agjencisë për Promovimin e Investimeve pranë Ministrisë së Tregtisë, u shpreh se konkurrenca nuk është e dëmshme për industrinë e automjeteve, veçanërisht në një kohë kur procesi i transformimit po përshpejtohet. Përkundrazi, ajo kontribuon në avancimin e industrisë dhe luan një rol pozitiv duke iu ofruar konsumatorëve produkte dhe shërbime më të mira, tha Liu, duke u bërë thirrje kompanive të përqendrohen në përmirësimin e teknologjive, produkteve dhe shërbimeve të tyre.
Lin Dong, Konsull i Përgjithshëm i Kinës në Hamburg, shtoi se bashkëpunimi midis kompanive kineze dhe gjermane të automjeteve e ka tejkaluar tashmë fushën tradicionale të prodhimit të automjeteve të plota, duke u zgjeruar në sektorë të tjerë si bateritë, lidhshmëria inteligjente dhe inovacionet teknologjike.
Kongresi i Industrisë së Automjeteve u zhvillua në vazhdën e Panairit Ndërkombëtar të Furnitorëve, i cili nisi të martën në Wolfsburg. Në këtë panair morën pjesë gjithsej 45 furnitorë kinezë të industrisë së automjeteve.-cgtn
