Kryeministri kërkon statusin e vendit kandidat dhe hapjen e negociatave me BE-në, ndërsa pranon se bllokada institucionale ka ngadalësuar reformat. Raporti i KE-së evidenton përparim në disa fusha, por ngre shqetësime për rezultatet në luftën kundër korrupsionit të nivelit të lartë.
Kryeministri i Kosovës, Albin Kurti, i ka kërkuar Bashkimit Evropian që Kosovës t’i jepet statusi i vendit kandidat dhe të nisë sa më shpejt procesi i negociatave, duke argumentuar se pozita aktuale e vendit në procesin e integrimit nuk pasqyron progresin e arritur.
Në konferencën për media pas prezantimit të Raportit të Komisionit Evropian për Kosovën për vitin 2026, Kurti theksoi se integrimi evropian mbetet prioritet strategjik i vendit, me mbështetje të gjerë qytetare dhe konsensus ndërpartiak.
Ai nënvizoi se Kosova vazhdon të jetë i vetmi vend në Ballkanin Perëndimor pa statusin e vendit kandidat, ndonëse aplikimin për anëtarësim e ka dorëzuar afro katër vjet më parë.
“Pozita e Kosovës në procesin e anëtarësimit nuk e pasqyron progresin që kemi bërë. Kosova meriton të marrë statusin e shtetit kandidat për anëtarësim dhe të fillojë negociatat sa më shpejt të jetë e mundur”, deklaroi Kurti.
Ai kritikoi mungesën e lëvizjes nga shtetet anëtare të BE-së, duke theksuar se ende nuk i është dhënë Komisionit Evropian mandati politik për të nisur procesin e shqyrtimit të aplikimit të Kosovës.
Bllokada institucionale ngadalësoi reformat
Duke komentuar raportin, Kurti pranoi se bllokada e Kuvendit ka ngadalësuar reformat, ka vonuar procedurat që lidhen me Planin e Rritjes dhe ka lënë një numër ligjesh në pritje të miratimit.
Megjithatë, ai theksoi se ngadalësimi i progresit nuk nënkupton regres, pasi, sipas tij, Komisioni Evropian nuk ka konstatuar rënie të nivelit të përgatitjes së Kosovës në asnjë fushë.
Kryeministri veçoi përparimin në reformën e administratës publike, luftën kundër krimit të organizuar, shërbimet financiare, statistikat, menaxhimin e fondeve të BE-së dhe lirinë e shprehjes.
Ai përmendi gjithashtu tri proceset zgjedhore të zhvilluara gjatë periudhës raportuese, të cilat, sipas vlerësimit të KE-së, u zhvilluan në mënyrë paqësore, konkurruese dhe të menaxhuar mirë.
KE: Probleme në drejtësi dhe korrupsionin e nivelit të lartë
Përtej vlerësimeve pozitive, raporti i Komisionit Evropian evidenton mangësi në funksionimin e sistemit të drejtësisë. Sipas tij, Kosova nuk ka shënuar progres në funksionimin e gjyqësorit, ndërsa ndikimet politike dhe ekonomike vazhdojnë të përbëjnë shqetësim për pavarësinë e institucioneve të drejtësisë.
Kritika evidentohen edhe në luftën kundër korrupsionit. Komisioni konstaton rritje të dënimeve përfundimtare në rastet e korrupsionit të nivelit më të ulët, por rënie në rastet e korrupsionit të nivelit të lartë.
Kurti pranoi se rezultatet në këtë kategori mbeten të pamjaftueshme.
“Raporti konstaton gjithashtu se në rastet e nivelit të lartë, rezultatet nuk janë aty ku duhet të jenë dhe këtë vërejtje e marrim seriozisht”, tha ai.
Ai theksoi se dobësia kryesore, sipas raportit, lidhet me zbatimin e ligjit dhe ndëshkimin e rasteve, jo me mungesën e kuadrit ligjor. Qeveria, sipas tij, synon të miratojë strategjinë kombëtare kundër korrupsionit dhe të forcojë institucionet përgjegjëse.
Progres në siguri dhe përafrimin me BE-në
Në fushën e sigurisë, Kurti veçoi dyfishimin e strukturave të inteligjencës në polici dhe zgjerimin e bashkëpunimit me institucionet policore evropiane, përfshirë aksionet kundër krimit kibernetik dhe kontrabandës së migrantëve.
Ai përmendi gjithashtu shkatërrimin e rreth 1.5 ton narkotikëve dhe konfiskimin e mbi 1.900 armëve gjatë vitit të kaluar.
Një tjetër zhvillim i rëndësishëm, sipas kryeministrit, është përafrimi i plotë i Kosovës me Politikën e Përbashkët të Jashtme dhe të Sigurisë të BE-së, përfshirë sanksionet ndaj Rusisë dhe Bjellorusisë.
Kurti vlerësoi se përfshirja zyrtare në vlerësimin e kapitullit 31, që mbulon politikën e jashtme, të sigurisë dhe mbrojtjes, përbën një njohje të rëndësishme të përafrimit të Kosovës me politikat evropiane.
© 2026 Argumentum
