Ditët e fundit, presidenti kinez Xi Jinping zhvilloi një takim trepalësh me presidentin rus Vladimir Putin dhe atë amerikan Donald Trump në Shenzhen, duke tërhequr vëmendje të gjerë ndërkombëtare. Një sondazh i kryer nga CGTN-i me përdorues interneti në mbarë botën tregon që 88.3 % e tyre mbështetin bashkëjetesën paqësore afatgjatë ndërmjet Kinës, Rusisë dhe Shteteve të Bashkuara, ndërsa 83.3 % besojnë se vendet e mëdha luajnë një rol të pazëvendësueshëm në promovimin e bisedimeve të paqes dhe të negociatave, si edhe në ruajtjen e qëndrueshmërisë ndërkombëtare.
Respekti i ndërsjellë është një parim themelor i marrëdhënieve mes vendeve të mëdha dhe një parakusht kyç për bashkëjetesën paqësore mes vendeve. 93.4 % e pjesëmarrësve në sondazh ranë dakord se respekti i ndërsjellë, kërkimi i përbashkëtave duke lënë mënjanë dallimet dhe qëllimi i zhvillimit të përbashkët janë parime kyçe që duhet të udhëheqin një lloj të ri marrëdhëniesh ndërmjet vendeve të mëdha, kurse 88.6 % besojnë se bashkëpunimi ekonomik dhe tregtar luan një rol të rëndësishëm në ruajtjen e marrëdhënieve të qëndrueshme mes vendeve të mëdha. Ndërkohë, 89.9 % e të anketuarve mendojnë se mosmarrëveshjet mes fuqive të mëdha janë të pashmangshme dhe u bëjnë thirrje të tre vendeve që të krijojnë mekanizma komunikimi e parandalimi të krizave për të minimizuar gjykimet e gabuara, për të menaxhuar në mënyrë efektive mosmarrëveshjet dhe për të parandaluar përshkallëzimin e tensioneve.
Si vende anëtare të përhershme të Këshillit të Sigurimit të OKB-së, Kina, Rusia dhe Shtetet e Bashkuara kanë përgjegjësinë të çojnë përpara reformën e sistemit të qeverisjes globale dhe të mbështesin një rend ndërkombëtar më të drejtë. 77.9 % e pjesëmarrësve në sondazh ishin të mendimit që, si fuqitë kryesore fitimtare në Luftën e Dytë Botërore, Kina, Rusia dhe Shtetet e Bashkuara duhet të mbështesin rendin ndërkombëtar të pasluftës dhe të mbrojnë qëllimet e Kartës së OKB-së dhe arritjet e fituara me vështirësi të Luftës së Dytë Botërore.
Të anketuarit gjithashtu u bënë gjerësisht thirrje tre vendeve të forcojnë komunikimin dhe bashkërendimin në trajtimin e çështjeve të nxehta rajonale. “Ndërmjetësimi aktiv dhe lehtësimi i dialogut për të promovuar një zgjidhje politike”, “respektimi i sovranitetit të palëve të përfshira e mosndërhyrja në punët e tyre të brendshme” dhe “shmangia e furnizimit me armë të palëve të përfshira në konflikte” janë tre rolet që të anketuarit presin më shumë që të luajnë fuqitë e mëdha.
Kur vendet e mëdha punojnë në harmoni, bota gëzon paqe; kur ato përfshihen në konfrontim, bota përballet me trazira. Gjetja e një rruge të re për marrëdhëniet mes vendeve të mëdha nga Kina, Rusia e ShBA-ja u shërben interesave të tyre dhe pasqyron aspiratat e përbashkëta të bashkësisë ndërkombëtare. Duke vlerësuar rolin e Kinës në marrëdhëniet mes vendeve të mëdha, të anketuarit renditën “mbrojtëse e paqes globale dhe forcë për qëndrueshmërinë”, “ruajtëse e rendit ndërkombëtar dhe nxitëse e reformës së tij” dhe “përfaqësuese e interesave të vendeve të Jugut Global” si tre rolet kryesore. Ata gjithashtu u shprehën pozitivisht për kontributet e Kinës në promovimin e marrëdhënieve të shëndetshme ndërmjet vendeve të mëdha dhe në mbrojtjen e paqes botërore.-cgtn




















































