Pavarësisht se ka shumë vite që kërkohet, diversifikimi i burimeve të prodhimit të energjisë duket se nuk ka bërë hapa përpara, duke bërë që vendi ynë të jetë i varur thuajse tërësisht nga uji, çka në periudha thatësirash, sikur ishte edhe viti 2019 shoqërohet me fatura të jete të larta për importin e energjisë. Shqetësimi u ngrit nga deputetët e Komisionit parlamentar të Veprimtarive Prodhuese, gjatë shqyrtimit të Raportit Vjetor të Entit Rregullator të Energjisë.
Edhe kryetari i Komisionit parlamentar adresoi kritika në këtë drejtim, teksa theksoi se energjia e prodhuar nga hidrocentralet nuk mund të konsiderohet tërësisht e rinovueshme, pasi dëmet që shkaktohen në biodiveristet janë të parikthyeshme.
Ndërkaq, diskutimi u përqendrua dhe të vonesa për nxjerrjen e rregullores nga ana e Entit Rregullator të Energjisë për vetprodhuesit e energjisë.
Sipas raportit vjetor të Entiti Rregullator të Energjisë, 2019 shënoi një ndër vitet me importin më të lartë gjatë 10 viteve të fundit. Sipas ERE-s kjo situatë erdhi si pasojë e thatësirës, duke nxjerrë edhe një herë në pah nevojën për diversifikimin e burimeve të prodhimit të energjisë.
–Asnjë “sinjal” për eksportet blegtorale – Rrapaj: Projektligji për veterinarinë ka shumë probleme
Këshilli i Agrobiznesit Shqiptar ka një sërë rezervash lidhur me projektligjin për veterinarinë, që është diskutuar në Komisionin Parlamentar të Veprimtarive Prodhuese. Sipas kreut të KASH, Agim Rrapaj, ky draft nuk përmbush qëllimin për koperimin, rritjen e efiçencës së sektorit privat dhe të kontributit që jep në blegtori.
Nga ana tjetër, Rrapaj shprehet se po ashtu nuk mundëson hapjen e eksporteve të produkteve blegtorale pasi nuk bën përafrimin me legjislacionin e Bashkimit Europian.
Mundësia për hapjen e eksporteve blegtorale me vendet e BE-së ka qenë një kërkesë e hershme e bizneseve në vend, por për shkak të hendekut në legjislacion dhe në gjurmueshmëri, ende nuk ka asnjë sinjal pozitiv në këtë drejtim.
–Fondet e Skemës Kombëtare në Bujqësi/ Çuçi: Mbështetja më e madhe për blegtorinë, aplikimet nisin më 29 maj
Ministri i Bujqësisë Çuçi ka bërë me dije se prej ditës së sotme ka nisur fushata e informimit për fermerët nga Agjencia për Zhvillim Bujqësor dhe Rural për fondet e Skemës Kombëtare 2020. Sipas tij pjesa më e madhe e fondeve të kësaj skeme do të shkojnë për të mbështetur blegtorinë.
“Ne kemi menduar që për t’i ardhur në ndihmë këtij sektori kaq të rëndësishëm, rreth 80% të granteve të Skemës Kombëtare për fermerët, t’ia dedikojmë blegtorisë. Këtë vit me një skemë shumë të thjeshtë, duke paguar para për tufën bazë. Besoj se kjo do të jetë një ndihmë shumë e madhe dhe e shtrirë në disa vite, mendojmë që do të bëjmë një ndryshim rrënjësor në këtë sektor”, u shpreh ministri.
Sipas tij Shqipëria mund të ketë sasi më të mëdha djathi apo nënprodukte të tjera qumështi nëse do të arrihet që të garantohet lënda e parë. Kjo tha ministri, bëhet duke shtuar numrin e krerëve të bagëtive në vend, prandaj subvencionet do të shkojnë për tufën bazë.
Çuçi u shpreh se pas fushatës së informimit në të gjithë vendin, fermerët do të kenë mundësi të bëjnë aplikimet e tyre prej datës 29 maj deri më 19 qershor. “Këtë vit aplikimet do të bëhen online me zero dokumente përmes portalit E-Albania. Fondi i parashikuar në Skemën Kombëtare për vitin 2020 është 743,9 milionë lekë dhe pritet të përfitojnë rreth katër mijë fermerë në të gjithë vendin”.
