Vetëm në vitin 2019, Autoriteti i Komunikimeve Elektronike dhe Postare është detyruar të mbyllë apo bllokojë aksesin në Shqipëri të mbi 8 mijë faqeve.
“Gjatë vitit 2019 është koordinuar me Policinë e Shtetit, Autoritetin e Mbikëqyrjes së Lojërave të Fatit dhe Autoritetin e Mediave Audiovizive për t’u përcjellë sipërmarrësve bllokimin në akses të faqeve web/domain-eve, me përmbajtje të paligjshme ose të dëmshme.
Me kërkesë të organeve kompetente, u janë dërguar për mbyllje aksesi ISP-ve rreth: – 8000 domain-e të cilat ofronin lojëra fati online në shkelje të ligjit respektiv për lojërat e fatit. 83 domain-e me anën e të cilave ofroheshin programe televizive në shkelje te ligjit respektiv për mediat audiovizive” thuhet në raportin vjetor të AKEP.
Qeveria vendosi në mënyrë të beftë në tetor të vitit 2018 që të mbyllte aktivitetin e lojërave të fatit në vend nga 1 janari 2019. Vendimi, edhe pse u kundërshtua nga industria, u zbatua por një pjesë e kompanive deklaruan se do të zhvendoseshin në vendet fqinje teksa një trend tjetër i kafeve që ofronin fshehtas lojëra online filloi të lulëzonte dhe këtë tendencë e ka konfirmuar edhe Policia e Shtetit në disa aksione të ndërmarra që kanë rezultuar edhe me ndalime.
Industria e lojërave të fatit punësonte 7 mijë individë sipas të dhënave të shoqatës që e përfaqësonte dhe qarkullonte rreth 130 milionë euro në vit. Në një raport të tij Komisioni Europian vuri theksin gjatë vitit 2018 se lojërat e fatit përdoreshin si një mekanizëm për pastrim parash dhe paraqisnin risk.
