Dy deklaratat e ambasadores amerikane në 24 orët e fundit për reformën zgjedhore dhe reformën në drejtësi kanë vënë në lëvizje të gjithë palet politike me akuza e kundërakuza duke drejtuar gishtin tek “tjetri” si fajtor për dështimin e reformave.
“Shpresoj që të mos ketë një marrëveshje të fshehtë për të vrarë Reformën në Drejtësi. Reforma është e dhimbshme, e ngadaltë dhe jo e përkryer, por është e nevojshme, është duke bërë përparim dhe duhet të vijojë”, shkruante ambasadorja Yuri Kim në rrjetin social diten e djeshme. Ky status solli reagime të ndryshme nga lideret politike ku mazhoranca akuzonte opozitën. E megjithate dukej qartë që ky mesazh ishte për të gjitha palet politike, përfshirë dhe ata në pushtet.
Ende pa kaluar 24 orë nga paralajmërimi i parë që ambasadorja u bëri lidereve politikë, vjen një tjetër reagim i fortë nga ambasadorja Yuri Kim, e cila theksoi fortë se reforma në drejtësi dhe reforma zgjedhore nuk janë për tu bërë Pazar .
Ajo foli tashmë jo për marrëveshje, por për “ Pazar” duke e zhvlersuar si marifet allashqiptar
“Mesazhi im është shumë i qartë. SHBA do të njëjtën gjë që populli shqiptar do.
Duam që Shqipëria të jetë një aleate e fortë dhe i aftë i SHBA dhe duam që të jeni pjesë e familjes Europiane. Nuk mund ta keni atë pa një reformë Zgjedhore dhe pa një reformë në Drejtësi. Këto të dyja nuk janë për të bërë pazar.
Janë domosdoshmëri, ka ardhur koha të reshtni së bëri pazare. Është koha të bëhet reforma në drejtësi dhe zgjedhore sikurse drejtuesit kanë premtuar popullit shqiptar”
Ky mesazh tronditi fort liderët tanë politikë, të cilët me radhe një nga një replikuan me njëri-tjetrin në distancë .
Kështu kreu i opozitës Lulzim Basha në një prononcim për gazetarët u shpreh se Rama po pengon reformën zgjedhore dhe integrimin evropian të vendit.
Basha shtoi se tryeza e reformës zgjedhore nuk është braktisur, por është bojkotuar vetëm në datë 18 pasi po dhunoheshin qytetarët dhe aktivistët.
Të gjithë e kanë parë shqiptarët dhe të huaj këtë klan mafioz që të pengojë reformën zgjedhore edhe integrimin evropian të vendin. Do ta mbajë Shqipërinë peng të krizave ciklike. Opozita është e bashkuar që t’i japë shqiptarëve një votë plebishitare për të larguar këtë qeveri.
Kjo është vënia e drejtësisë popullore për nga një kryeministër që sillet si bandit.
Që t’ia mohojmë Ramës këtë plan diabolik dhe dinak, dhe të angazhohemi në procesin e kodit zgjedhor. Autori i këtij krimi ka dalë zbuluar.
Po luan ai që hodhi në erë Teatrin dhe reformën zgjedhore dhe procesin e integrimit. Presidentit i kam dhënë përgjigje. I kemi thënë që opozita ka vetëm një detyrë dhe po e bën mirë ndërsa mazhorancë ka 14 detyra të tjera. Te tryeza e reformë zgjedhore kemi vetëm një qëllim, që të largohet Rama në orë e më pare,tha Basha.
Pas rikonfirmimit të Bashes për rikthim në tryeze për reformen zgjedhore, i menjëhershëm ka qenë reagimi i Ambasadores së ShBA-së në vendin tonë Yuri Kim dhe ai i BE-së, Luigi Soreca të cilët kanë përshëndetur vendimin e kryetarit të PD, Lulzim Basha për të përfunduar reformën zgjedhore.
“Ne mirëpresim vendimin e Kryetarit të PD-së Lulzim Basha për të përfunduar reformën zgjedhore. Ne presim të shohim edhe liderët e tjerë të shfaqin udhëheqësi të ngjashme“, shkruan në twitter, ambasadorja Kim.
“Kjo i shërben interesit më të lartë të Shqipërisë dhe kontribuon në përfundimin pa vonesa të reformës, në mënyrë që të përmbushet kushti i vendosur në mars“, shkruan Soreca.
Mesazhet nuk kanë përfunduar, pasi Kryetarja e LSI-së Monika Kryemadhi e cila nxitoi të konfirmonte se Basha foli në emër të opozitës së bashkuar. Njësoj si kryetari i PD-së, Lulzim Basha , Monika Kryemadhi thotë se prioriteti kryesor është reforma zgjedhore dhe përfundimi i saj sa më parë.
LSI nuk ka asnjë qëndrim të ndryshëm nga qëndrimi që ka bërë të njohur në emër të Opozitës së Bashkuar kryetari i PD-së zoti Lulzim Basha.
Përmbushja e të gjitha detyrimeve ndaj reformës zgjedhore ka qenë dhe mbetet prioriteti im si Kryetare e LSI-së, ndaj do të vazhdoj të bëj të gjithë presionin e nevojshëm, që ajo të realizohet me konsensus dhe sa më parë, si kusht i rëndësishëm për të rikthyer legjitimitetin e vullnetit të qytetarëve shqiptarë.
Shembja e paligjshme e Teatrit Kombëtar dhe përdorimi i dhunës policore mbi artistët, mbi gazetarët, mbi veprimtarët e shoqërisë civile dhe përfaqësuesit e opozitës, është provokimi i rradhës së Edi Ramës ndaj opozitës dhe qytetarëve shqiptarë, i cili edhe në sallën e Kuvendit vazhdoi me të njejtën gjuhë fyese dhe provokative, për të na detyruar të largohemi nga tryeza e reformës zgjedhore.
Por pavarësisht dhunës policore, pavarësisht gjuhës fyese, provokuese dhe urrejtjes së Edi Ramës, e ritheksoj edhe një herë se ne jemi të vendosur të realizojmë reformën zgjedhore dhe largimin përfundimtar të tij nga pushteti, si kusht për rikthimin e demokracisë në vend.
Nuk mund të mungonte dhe reagimi i kryeministrit Rama i cili e përshëndet kthimin e opozitës në tryezën e reformës.
“Kthimi i opozitës jashtëparlamentare në tryezën e Reformës Zgjedhore një kthesë për t’u përshëndetur! Më mirë vonë se kurrë dhe inshallah këtë herë deri në mbylljen e këtij procesi të stërzgjatur, sepse koha nuk pret dhe me vullnet të mirë mund të arrihet shpejt në konsensus“, shkruan Rama.
Më parë Rama-Meta replikonin “kokë me kokë” lidhur me platformen me 14 pika të këtij të fundit.
Përmes një postimi në Twitter Rama shkruan se nuk gënjen dhe nuk e ka marrë platformën e Metës.
” Që unë s’gënjej IM e ka shkruar vetë, se unë nuk quhem Yuri Kim dhe s’di që Ambasadorja e SHBA të mbulojë edhe shërbimin postar + po t’i kisha marrë ato pika do i kisha shkruar pse më duken si pika vaji e uthulle që duhen ndarë, se ndryshe thyhet ena e Kushtetutës & Integrimit”,shkruan Rama.
Në një postim në facebook, Meta shprehet:
Po kur e ka marrë ambasada këtë dokument? “Që Platforma për Integrimin Europian (Non Paper) i është paraqitur Ambasadores së SHBA që më 8 prill 2020 është FAKT. Që Rama GËNJEN nuk është më lajm as për të huajt”, deklaroi Meta sot Presidenti Ilir Meta.
Por duket se pikat mbi i për platformen e Metës i vuri sërish ambasadorja amerikane e cila qetsoi gjakrat midis kryeministrisë dhe presidencës duke thenë se se po, ajo është njohur me platfomen e Presidentit Meta dhe sqaron se është duke i shqyrtuar propozimet e Presidentit.
E megjithate ndërkohë që përemrat vetor unë, ti, ai, ajo, ne, ju …u përdoren gjegjësisht si justifikim përballë vijes së kuqe amerikane, zgjidhja është mjaft e thjeshtë. Të ulen në tryeze për reformën zgjedhore dhe të çojnë deri në fund reformën në drejtësi . Ky është rasti unik që të tregoni se po, shqiptarët për arsye madhore mund të bëhen bashkë .
m.d/argumentum.al
© Argumentum
