Të gjitha llojet e transporteve, për pasagjerë dhe mallra kanë shënuar një tkurrje të fortë, në kushtet e situatës së krijuar nga COVID.
Volumi i mallrave të ngarkuara/shkarkuara në porte, në muajin Prill 2020 është 353 mijë ton, duke u ulur 5,8 %, krahasuar me Prill 2019, sipas INSTAT.
Në raport me marsin, rënia është shumë më e lehtë. Në mars, muaji i parë kur ekonomia u përball me pasojat e Covid-19, Volumi i mallrave të ngarkuara/shkarkuara në porte, në muajin Mars 2020 është 254 mijë ton duke u ulur 41,2 %, krahasuar me Mars 2019.
Në katërmujorin e parë të 2020, volumi i mallrave të ngarkuara/shkarkuara në porte është 1,3 milionë ton, duke u ulur me 8,7 %, krahasuar me katërmujorin e parë të 2019, si rrjedhojë e performancës së dobët të prillit.
Volumi i mallrave të transportuara me hekurudhë në muajin Prill 2020 është 752 mijë ton-kilometër, duke u ulur me 77,1 %, krahasuar me Prill 2019.
Në katërmujorin e parë të 2020, volumi i mallrave të transportuar me hekurudhë është 9,4 milionë tonkilometër, duke u ulur me 18,1 %, krahasuar me katërmujorin e parë të 2019.
Në muajin Prill 2020, volumi i mallrave të transportuar me ajër është 79,6 ton mallra, duke u ulur me 57,2 %, në krahasim me Prill 2019.
Në katërmujorin e parë të 2020, me ajër janë transportuar 591,1 ton mallra duke u ulur 21,3 %, krahasuar me katërmujorin e parë të 2019.
Numri i fluturimeve të kryera në Prill 2020 është 152 duke shënuar një rënie me 93,0 %, krahasuar me Prill 2019.
Numri i pasagjerëve që udhëtojnë me linjë detare në Prill 2020 është 3.170 pasagjerë. Krahasuar me Prill 2019, ky tregues është ulur 95,8 %. Në katërmujorin e parë të 2020, kanë udhëtuar me linjë detare 128.980 pasagjerë, duke u ulur me 43,3 %, krahasuar me të njëjtën periudhë të vitit 2019.
Në muajin Prill 2020, transporti ajror i pasagjerëve zë 55,7 % të transportit gjithsej. Numri i pasagjerëve që kanë udhëtuar me linja ajrore, në katërmujorin e parë të 2020 është 519.489 pasagjerë duke u ulur me 38,9 %, krahasuar me katërmujorin e parë të 2019.
Eksportet/importet e mallrave sipas mënyrës së transportit
Në Prill 2020, vlera e mallrave të tregtuara (eksport dhe import) është 51,1 mld lekë dhe 43,8 % e tyre u transportua me det.
Në katërmujorin e parë të vitit 2020, vlera e mallrave të tregtuara (eksport dhe import) është 255,0 mld lekë dhe 51,8 % e tyre u transportua me det.
Eksportet e mallrave
Në Prill 2020, mallrat e eksportuara me det zënë 46,2 %, me rrugë 51,2 % dhe me ajër 0,2 %. Mallrat e eksportuara me rrugë janë ulur me 36,6 %, krahasuar me të njëjtën periudhë të vitit 2019.
Në katërmujorin e parë të 2020, mallrat e eksportuara me det zënë 59,1 %, me rrugë 38,7 % dhe me ajër 0,4 %. Në katërmujorin e parë të vitit 2020, mallrat e eksportuara me rrugë janë ulur 17,9 %, krahasuar me të njëjtën periudhë të vitit 2019.
Importet e mallrave
Në Prill 2020, mallrat e importuara me det zënë 42,8 %, me rrugë 51,2 % dhe me ajër 2,5 %. Mallrat e importuara me rrugë në Prill 2020 janë ulur me 25,1 %, krahasuar me Prill 2019.
Në katërmujorin e parë të 2020, mallrat e importuara me det zënë 48,5 %, me rrugë 44,8 % dhe me ajër
2,9 %. Në katërmujorin e parë të 2020, mallrat e importuara me rrugë janë ulur me 9,9 %, krahasuar me të njëjtën periudhë të vitit 2019.
–Përdorimi i të dhënave të institucioneve, gati ligji që përcakton si veprohet
Të gjithë të dhënat e institucioneve që publikohen si pjesë e transparencës apo informimit mund të ripërdoren nga palë të treta në funksion të detyrave kërkimore, çështjeve private apo tregtare por pa ndonjë specifikim ligjor mbi mënyrën sesi veprohet.
Por një projektligj i fundit i nxjerrë për konsultim synon që të sanksionojë pikërisht këtë aspekt, që lidhet me ripërdorimin e të dhënave nga palët private ku përdorimi i dokumenteve do të duhet të bëhet me kërkesë të veçantë. Në relacionin që shoqëron projektligjin thuhet se informacioni i sektorit publik përbën një burim të jashtëzakonshëm të dhënash që mund të japin kontribut për përmirësimin e tregut të brendshëm dhe për krijimin e aplikacioneve të reja dhe zhvillimin e ekonomisë së të dhënave.
“Objektivi kryesor i këtij projektligji, është krijimi i kuadrit ligjor për ripërdorimin e informacionit të sektorit publik dhe sipërmarrjeve publike. Ndër të tjera, pritet që mundësitë e shtuara të ripërdorimit të këtij informacioni, t’u lejojnë bizneseve si dhe shoqërisë civile të shfrytëzojnë potencialin e ripërdorimit dhe të japin kontribut për zhvillimin ekonomik dhe për hapjen e mbrojtjen e vendeve cilësore të punës” thuhet në relacion.
Projektligji parashikon ndër të tjera të drejtën e çdo individi për të ripërdorur dokumente për qëllime tregtare ose jo por sanksionon edhe se institucionet nuk janë të detyruara që t’i përshtatin ato sipas nevojës së njëra apo tjetrës palë përveçse formatit origjinal të raportimit të tyre për qëllimin që shërbejnë. Në çdo rast personi që kërkon të drejtën e përdorimit të një dokumenti që është në listën e të dhënave të hapura do të duhet të paraqesë një kërkesë më shkrim pranë institucionit. Nëse ajo refuzohet atij do t’i jepen edhe arsyet e këtij refuzimi.
Ripërdormi i dokumenteve do të bëhet pa pagesë ndërkohë që ripërdorimi i dokumenteve mund të bëhet kundrejt një tarife, me qëllim për mbulimin e kostove shtesë për arsye të riprodhimit, ofrimit dhe shpërndarjes së dokumenteve si dhe për anonimizimin e të dhënave personale si dhe masat e marra për të mbrojtur konfidencialitetin tregtar.
Institucionet që bëjnë refuzim të publikimit të dokumenteve të hapura do të gjobiten me masa administrative. Po kështu mund të bëhen edhe ankesa pranë Komisionerit për të Drejtën e Informimit
