Nesër është afati për të cilin palët janë angazhuar ta përmbyllin atë, por ende nuk ka dakordesi mes tyre. Këshilli Politik diskutoi pasditen e sotme për 4 orë me radhë çështjet e mbetura pezull. Opozita nuk ka arritur të marrë konsensusin e mazhorancës për të futur identifikimin biometrik të zgjedhësve në të gjitha qendrat e votimit.
Për të tretin takim radhazi në Këshillin Politik çështja e implementimit të teknologjisë në zgjedhje ka minuar të gjitha diskutimet për çështjet e tjera. Opozita pretendoi se propozimet e paraqitura janë refuzuar nga mazhoranca.
“Kemi bërë propozime për të garantuar votën e shqiptarëve, vota e tyre të jetë e paprekur dhe rezultati të jetë i paprekur,” – theksoi Bylykbashi teksa këmbënguli se të gjitha propozimet e tyre janë refuzuar.
“Qeveria që ka mundësuar zhvillimin e koncesioneve më të mëdha në histori nuk është në gjendje të garantojë 5,000 qendra votimi me sistem identifikimi biometrik,” – ironoizoi Vasili.
Përfaqësuesi i PD-së, Oerd Bylykbashi, duke folur pas mbledhjes tha se kjo është vija e kuqe e opozitës që nuk do të lejojë të kalohet.
Dakordësi nuk kanë gjetur as për administrimin zgjedhor.
Bylykbashi: Për çështjen e administrimit të zgjedhjeve dhe gjykimit nuk heq dorë nga modeli i 30 qershorit. Vetë mbush kutitë, vetë i numëron dhe vetë shpall rezultat. PS në strategjinë e saj ka vetëm një gjë, vjedhjen dhe marrjen e votave në tavolinë. Kjo është një vizë e kuqe që opozita nuk do të lejojë të kalohet. Pa u arritur dakortësia për propozimin tonë që bllokon mbushjen e kutive përmes identifikimit biometrik të zgjedhësve në të gjitha qendrat e votimit, të gjitha përpjekjet e tjera nuk janë gjë tjetër veçse përpjekje për të maskuar.
Vasili: I gjithë modeli i socialistëve është vetëm legjitimimi i eksperimentit të 30 qershorit ku numëruesit dhe komisionerët e qeverisë tashmë të bëhen me ligj. Parimi i njohur stalinist që ka rëndësi vetëm të votojnë njerëzit ndërsa votat i numërojmë ne është e vetmja që e udhëheq PS e cila e ka shumë të qartë që në një votim normal dhe korrekt nuk mund ti fitojë kurrë këto zgjedhje. Është kapur si mbyturi pas një fije bari që të marrë dhe të vjedhë votat në tavolinë. Të mbushë kutitë në tavolinë, të numërojë po vetë dhe të nxjerrë rezultatin ashtu si në 30 qershor. Ajo që opozita ka vendosur pa kthim është asnjë centimetër më poshtë nga standardet që ekzistojnë.
Sot ka vetëm një strategji të PS, ta minojë reformën zgjedhore, të rrëmbejë me komisione të paligjshme votat, të shkojë drejt logjikës së faktit të kryer dhe miratimit të njëashëm të reformës zgjedhore që dihet botërisht që është fundi i Shqipërisë europiane dhe hapjes së negociatave. PS ka vetëm një rrugë, të mos pengojë atë që është propozimi i opozitës që nuk privilegjon asnjë milimetër opozitën por vetëm e vendos në kushte të barabarta me mazhorancën. I heq PS çdo mundësi të rrëmbejë të gjitha llojet e komisioneve dhe të varrosë votën e lirë në Shqipëri.Propozimet e opozitës janë për një paritet absolut. Ajo kërkon të jetë vetëm ajo në tavolinë.
Bylykbashi: Kemi bërë propozime për të garantuar votën e zgjedhësve shqiptarë. Rrotacioni politik të ndodhë me votë. Propozimet tona janë refuzuar pavarësisht fleksibilitetit të opozitës që për çështje të caktuara të ecet për të gjetur kompromis por që nuk janë çështje themelore ne jemi përballur me refuzimin e të gjitha çështjeve që garantojnë procesin zgjedhor. PS do të krijojë alibionë që në përfundim të procesit ti drejtoihet parlamentit që ti vendosë rregullat vetëm pa kompromis dhe konsensus ashtu si kërkon BE dhe siç është marrëveshja e 14 janarit 2020. Deri sot opozitës çdo kërkesë që është bërë i është refuzuar nga PS që nuk ka interes për reformën zgjedhore.
Nënkryetari i LSI-së, Petrit Vasili, tha se administrimi i paanshëm dhe i barabartë dhe identifikimi biometrik, lehtësisht të realizueshme, janë ato që mbajnë peng dhe minojnë reformën zgjedhore qëllimisht nga PS.
Vasili: Argumenti është bajat, ideja se mbase nuk mund ta realizojmë. Realizuesit e koncesioneve me miliarda euro të papara gjëkundi nuk realizojnë dot 5000 qendra votimi për identifikimin biometrik. Në shtete ku votojnë 300 milion njerëz bëhet dhe PS nuk e bën dot. I kemi dhënë kohë dhe ka qenë një pikë për tu përmbyllur që në 20 shkurt por sabotimi sistematik me plan dhe strategji të caktuar për të sabotuar çdo mundësi që vota të numërohet ashtu siç hidhet është strategjia që prin PS.
Kemi në politikën tonë këmbëkrye një Rilindje të prirë nga një kryeministër të gjallojnë vetëm mbi vjedhjen dhe grabitjen e votës. Identifikimi bën që nëse ka 500 gjurmë gishtash do të ketë dhe 500 fletë votimi. Për administrimin zgjedhor është bërë një hap shumë i madh drejt depolitizimit, administratorët e propozuar nga PS përcaktohenn nga KQZ. Ata që mbikqyrin procesin nga të dyja palët janë në numër të barabartë dhe vetëm kqyrin veprimtarinë e këtyre njerëzve të ngarkuar me ligj dhe të emëruar nga KQZ. Kjo ndodh edhe në numërimin e votave, njeriu i KQZ numëron dhe dy përfaqësues, të mazhorancës në njërin krah dhe opozitës në krahun tjetër vëzhdojnë procesin e tij.Është kompromisi më i thjeshtë në botë për tu bërë dhe është detyrim për ata që janë kapur me duar në kuti si janë kapur këta.
Ndërsa Damian Gjiknuri thotë se qeveria ka pranuar mjaft prej sugjerimeve të opozitës duke filluar nga vëzhgimi me kamera i qendrave të votimit tek e drejta për të hapur çdo kuti votimi pas mbylljes së procesit.
“Kemi ofruar hapjen e çdo kutie pas nxjerrjes së rezultatit zgjedhor. Ne kemi bërë greva dhe demonstrata dhe nuk na është dhënë hapja e kutive pas zgjedhjeve. Kjo është mundësi për çdo parti. Kushdo që mendon se është bërë shkelje mund ta hapë kutinë. Nëse ka pretendime për mbushje të kutive, merret kamera dhe verifikohet.
Kemi pranuar që të mos ketë prezencë rreth qendrave të votimit. Do të jenë vetëm persona të autorizuar. Kemi provuar shtim të fiancimit shtetëror. Kemi garantuar depolitizim katër muaj para datës së zgjedhjeve qeveria s’mund të bëjë propagandë për arritjet e saja. Kemi mbetur vetëm tek çështja e administratës zgjedhore, teknologjia dhe Kolegji Zgjedhor.”
© Argumentum.
