Ministri i Jashtëm i Greqisë, Nikos Dendias, vizitoi sot Prishtinën ku u prit fillimisht nga homologia e tij, Meliza Haradinaj.
Kryediplomati helen ka dhënë shenja të forta se Greqia së shpejti do ta njohë pavarësinë e Kosovës, që sipas tij është çështje e vendosjes së marrëdhënieve mes dy vendeve. Ai u takua takua me kryeministrin e Kosovës, Avdullah Hoti, kryetaren e parlamentit të Kosovës Vjosa Osmani dhe homologen e tij, ministren e jashtme Meliza Haradinaj Stublla.
Kryeministri i Republikës së Kosovës, Avdullah Hoti, njofton se ka pritur sot ministrin e Punëve të Jashtme të Greqisë, Nikos Dendias, me të cilin ka diskutuar për zhvillimet politike në vend, thellimin e bashkëpunimit ndërmjet dy vendeve, kryesisht në fushën ekonomike, si dhe procesin e dialogut final ndërmjet Republikës së Kosovës dhe asaj të Serbisë, i cili duhet të përfundojë me njohje reciproke.
“Roli mbështetës i Greqisë për Kosovën është tepër i rëndësishëm, ngaqë është vend anëtar i BE-së dhe NATO-s, organizata këto që Kosova aspiron të jetë pjesë e tyre”, tha kryeministri Hoti.
Po ashtu, kryeministri Hoti dhe ministri Dendias u zotuan në thellimin e bashkëpunimit ekonomik ndërmjet Kosovës dhe Greqisë, me theks të veçantë në fushën e energjisë.
Ministri Dendias, duke e falënderuar kryeministrin Hoti për pritjen, theksoi se Greqia mbetet e përkushtuar që ta ndihmojë Kosovën në rrugëtimin e saj euro-atlantik, si dhe në begatimin e mëtejmë të bashkëpunimit ekonomik ndërmjet dy vendeve.
Dendias siguroi krerët e shtetit se Greqia mbetet e përkushtuar që ta ndihmojë Kosovën në rrugëtimin e saj euro-atlantik.
Korrespondenti i Euronews Albania, Jeton Musliu citoi ministrin Dendias të shprehej me dy-kuptueshmëri në aeroportin e Prishtinës për sa i përket njohjes së pavarësisë.
“Ai ka thënë se ne jemi fqinj dhe jemi shumë të interesuar për Ballkanin Perëndimor, paqes dhe stabilitetit, njohja nuk është çështje shprese por çështje e vendosjes së marrëdhënies mes dy vendeve,”
