Kisha Katolike letër Komitetit të Ekspertëve: Kufizimi i orarit të lëvizjes natën e Krishtlindjeve, i nxituar dhe diskriminues ndaj komunitetit katolik,

Kisha Katolike e Shqipërisë, përmes një letre drejtuar Komitetit Teknik të Ekspertëve kundërshton vendimin e marrë një ditë më parë nga ana e tyre për kufizim të orarit të lëvizjes nga ora 20:30 duke nisur nga data 24 dhjetor.

Në letrën e hapur që i drejtohet kryetares së Komitetit Teknik, Mira Rakaciolli, Kisha Katolike e cilëson vendimin për nisjen e kufizimit natën e Krishtlindjeve si të nxituar dhe diskriminues.

Kryetar i Konferencës Ipeshkvore të Shqipërisë, imzot George Frendo shpjegon në letrën e tij se kisha i kishte marrë masat që të kremtonin meshat në orare të përshtatshme qysh prej datës 3 dhjetor 2020, orare që sipas tij t’u lejojnë njerëzve të kthehen nëpër shtëpitë e tyre para orës 22.00.

“Ky ndryshim i papritur që nis pikërisht Natën e Krishtlindjes, na duket i nxituar dhe diskriminues ndaj komunitetit katolik, që është e vetmja Kishë e Krishterë që kremton lindjen e Krishtit natën. Sapo kishim njoftuar të gjithë besimtarët tanë dje, ditën e diel, se mesha e Krishtlindjes do të kremtohej te enjten në orën 20.00.

Letra e plotë:

Prot. 65/2020

Për dijeni: Znj. Ogerta Manastirlliu

Nunciaturës Apostolike në Shqipëri

Tiranë 21 dhjetor 2020

E Nderuar Zonja Rakacolli,

U njohëm me vendimin e ri të Komitetit të Ekspertëve të drejtuar prej jush, rreth kufizimit në kuadër të masave anti-COVID të marra nga qeveria shqiptare që ndalon qarkullimin e njerëzve pas orës 20.30, duke filluar nga data 24 dhjetor, pikërisht natën e Krishtlindjes.

Ne si Kishë Katolike kishim marrë të gjitha masat që të kremtonim meshët në orare të përshtatshme qysh prej datës 3 dhjetor 2020, sikurse do të shihni nga dokumenti bashkëngjitur. Në këtë dokument kemi vendosur që meshët të mbahen në orare që t’u lejojnë njerëzve të kthehen nëpër shtëpitë e tyre para orës 22.00.

Ky ndryshim i papritur që nis pikërisht Natën e Krishtlindjes, na duket i nxituar dhe diskriminues ndaj komunitetit katolik, që është e vetmja Kishë e Krishterë që kremton lindjen e Krishtit natën. Sapo kishim njoftuar të gjithë besimtarët tanë dje, ditën e Diel, se mesha e Krishtlindjes do të kremtohej te enjtem në orën 20.00.

Me kënaqësi do të kishim marrë pjesë në konsultim për një gjë të tillë.

Duke ju uruar punë të mbarë ju përshëndes,

me nderime George Frendo O.P.

Kryetar i Konferencës Ipeshkvore të Shqipërisë

Nderkohe Kisha Katolike ka njoftuar oraret e reja per mbajtjen e e meshes, duke hequr meshen e ores 20:00 ;

Arqipeshkvia Metropolitane Tiranë – Durrës, bën me dije, se kremtimet e Krishtlindjes në Katedralen e Shën Palit, Tiranë do të jenë si vijon:

Mesha Vigjilje e Krishtlindjes
Mesha e parë, 24 dhjetor 2020, ora 16:00
Mesha e dytë, 24 dhjetor 2020, ora 18:00