Mbyllet zyrtarisht procesi i votimit në vendin tonë, ku u votua për zgjedhjen e parlamentit të ri.
Pasi përfundoi procesi i votimit, tashmë radha i kalon lëvizjes së kutive drejt qendrave të numërimit dhe numërimit të fletave të votimit. Komisioneri Shtetëror i Zgjedhjeve, Ilirjan Celibashi, bëri thirrje që edhe kjo fazë të kryhet në përputhje me Kodin Zgjedhor për të mos cënuar integritetin e procesit.
Celibashi i bëri thirrje partie politike që ta përcjellin me qetësi procesin e numërimit pasi askush nuk e di kush i ka fituar zgjedhjet. Kryekomisioneri apeloi që të mos bëhen deklarata para kohe, ndërsa theksoi se për të mësuar rezultatin e partive do të duhen 48 orë.
“I bëj thirrje partive që procesi në vijim ta përcjellin me qetësi. Askush nuk e di kush i ka fituar zgjedhjet, të presin si do shkojë numërimi. Çdo deklarim i bërë pa nisur fare procesi i numërimit nuk do t’i shërbente qetësisë së nevojshme të këtij procesi. Shpresoj që lidershipi politik ta ketë koshiencën për të kuptuar se ka nevojë për shumë qetësi në këtë moment, për të krijuar kushtin e punës së qetë për komisionerët dhe numëruesit.
KQZ ka marrë masat që procesi të përfundojë brenda 48 orëve për partitë dhe koalicionet dhe pastaj do të vazhdojmë me rezultatin e kandidatëve. Ajo që ka rëndësi të them është fakti që këtë moment duhet ta përcjellim me qetësi dhe natyrshëm secili prej nesh e ka kuriozitetin se kush e ka fituar, duhet pak durim dhe brenda 48 orëve do ta dimë kush është fituesi i këtyre zgjedhjeve”, tha Celibashi.
Sa është pjesëmarrja në votime deri në orën 19:00:
Ora 19:00 shënoi zyrtarisht mbylljen e procesit të votimit për zgjedhjet parlamentare në vendin tonë. Procesi i votimit nisi në orën 07:00 të kësaj në diele në të gjithë Shqipërinë.
Me mbylljen e orarit zyrtar, të drejtën për të votuar e kanë vetëm ata qytetarë që ndodhen ende jashtë qendrave të votimit. Më pas, pas mbylljes së procesverbaleve pritet të nisë transportimi i kutive të votimit, drejt qendrave të numërimit.
Pjesëmarrja në këto zgjedhje ishte e lartë. Sipas KQZ-së deri në orën 19:00, ku kanë raportuar vetëm 640 qendra votimi nga 5199 që janë në total, kanë marrë pjesë në votime 47.92% të pjesëmarrjes.
E përkthyer në votues, bëhet me dije se kanë votuar 224702 zgjedhës nga 468871 që kanë në total qendrat e votimit që kanë raportuar pranë KQZ-së. Qarku që ka pjesëmarrje më të lartë në votime është Tirana me një pjesëmarrje 54.32%.
VOTIMI
Të dielën e 25 prillit rreth 3 milionë e 600 mijë shqiptarë me të drejtë vote janë thirrur në votime për të zgjedhur 140 deputetët e Parlamentit të ardhshëm. Për të ushtruar të drejtën e votës, zgjedhësit do të duhet të paraqiten në 5199 Qendra Votimi.
Kushtetuta dhe Kodi Zgjedhor përcakton se Shqipëria ka një sistem zgjedhor proporcional rajonal, ku në secilin prej 12 qarqeve të vendit prodhohen mandate, bazuar në popullsinë e secilit Qark. Qarku Kukës është ai që nxjerr më pak deputetë, vetëm 3. Ndërkohë që nga Tirana, e cila ka dhe numrin më të madh të popullsisë në vend, përftohen 36 mandate ligjvënësish.
Në këto zgjedhje parlamentare, do të garojnë 1841 kandidatë për deputetë, që përfaqësojnë 12 parti, koalicione zgjedhore e kandidatë të pavarur.
Pas ndryshimeve në Kodin Zgjedhor, zgjedhjet e 25 Prilli, sjellin risi. Në të njëjtën Fletë Votimi Zgjedhësit do të duhet të votojë për partinë dhe kandidatin preferencial për deputet, që në Fletën e Votimit do të identifikohet nga një numër e jo emri i tij.
Ligji saktëson se së pari numërohen votat për subjektet zgjedhore e më pas, për kandidatët për deputetë. Lista fituese e kandidatëve për deputetë pas numërimit të votave për partitë, mund të thyhet vetëm nëse një kandidat që renditet poshtë vijës së kuqe ka marrë më shumë preferenca se mesatarja e votave të partisë.
Për herë të parë në Shqipëri do të aplikohet teknologjia në zgjedhje. Në çdo Qendër Votimi do të jenë të instaluara pajisje elektronike, të cilat do të kryejnë identifikimin elektronik të zgjedhësve. Një mjet ky i cili do të mundësojë shmangien e votimit të dyfishtë, votimit familjar apo votimit për një person tjetër. Ndërkohë në Zonën Administrative Zgjedhore Nr. 40, e cila përkon me Njësinë Administrative Nr. 10 në Tiranë, do të zbatohet projekti pilot për votim dhe numërim elektronik. Votuesit do të votojë në pajisjen elektronike si për subjektin politik, ashtu edhe për kandidatin preferencial.
Zgjedhjet e së dielës kanë tërhequr vëmendjen e faktorit ndërkombëtar, që do të jenë të angazhuar në vëzhgimin e tyre. Vëmendja do jetë kudo, por të ashtuquajtura zona të nxehta do tërheqim më shumë syrin e vëzhguesve ndërkombëtarë, për të cilët standardet e zgjedhjeve mbizotërojnë mbi gjithçka.
Zgjedhjet e 25 Prillit do të zhvillohen në kushte tejet të veçanta, për shkak të pandemisë së COVID-19. E për këtë çdo votues do të duhet të jetë iu pajisur me mjetet mbrojtëse. Ndërkohë që çdo pjesëtar i Qendrave të Votimit apo edhe ata gjatë numërimit, do duhet të jetë i pajisur me këto mjete mbrojtëse.
As në këto zgjedhje, qytetarët shqiptarë që jetojnë jashtë vendit nuk do të mund të votojnë. Votimin e tyre, politika ia la në dorë të Komisionit Qendror të Zgjedhjeve. Por ky mbeti vetëm një projekt në letër dhe faji për dështimin mbeti rrugëve.
