Për ata që ende kultivojnë fantazi se do të ishte mirë të ndryshonin kufijtë ose të krijonin shtete të reja, unë them se nuk ka më ndryshime”, tha tha Përfaqësuesi i Lartë për Bosnjë dhe Hercegovinën
Përfaqësuesi i Lartë i sapoemëruar për Bosnjë dhe Hercegovinën, Christian Schmidt, mori pjesë në Forumin e 14-të të Dubrovnikut në panelin “Komuniteti Ndërkombëtar dhe Ballkani Perëndimor: Si t’i japim fund karantinës?”, raporton Anadolu Agency (AA).
Në fjalën e tij, Schmidt tha se për përparim më serioz të gjashtë vendeve të Ballkanit Perëndimor drejt Bashkimit Evropian, është e nevojshme të hiqen mosmarrëveshjet dhe pengesat që ekzistojnë midis vendeve.
Anëtarësimi i Bosnjë dhe Hercegovinës në Bashkimin Evropian duhet të mbetet në agjendën politike, e cila ka humbur forcën e saj në vitet e fundit dhe tani është koha që të kthehet çështja në fokusin politik që të shihen rezultatet në vitet e ardhshme, tha Schmidt.
“Kur shikojmë BeH-në, ne shohim se problemi i brendshëm që ekziston nuk është midis shumicës dhe pakicës, por problemi midis tre popujve konstituivë dhe të tjerëve. Kur e shohim Marrëveshjen e Dejtonit nga perspektiva e sotme, shohim se disa pjesë të saj mund të formulohen ndryshe, por sot kemi marrëveshjen ashtu siç është. Për ata që ende kultivojnë fantazi se do të ishte mirë të ndryshonin kufijtë ose të krijonin shtete të reja, unë them se nuk ka më ndryshime”, tha Schmidt.
Ai theksoi se pyetja kryesore për Bashkimin Evropian është nëse duhet të mbahen gjashtë vendet e Ballkanit Perëndimor së bashku dhe të zbatohen procese të pjesshme të integrimit midis tyre, të cilat mund të çojnë në të ashtuquajturën Shengeni i madh.
Ekziston një avantazh krahasues për të qenë anëtar i integrimit evropian, i cili mund të ilustrohet në programin COVAX, tha ai.
“Shtetet e Bashkuara kanë bërë shumë në të kaluarën në kohë kritike për Ballkanin Perëndimor, ndonjëherë më shumë sesa evropianët, të cilëve iu duhej më shumë kohë për të kuptuar se çfarë të bënin”, shtoi Schmidt.
Ai veçanërisht paralajmëroi për rëndësinë e investimit në brezat e rinj përmes arsimit, sepse ata kanë potencialin për të përshpejtuar procesin e pajtimit, si në BeH, ashtu edhe në gjithë rajonin.
