“Edi Rama, të dy jemi armiq, është e vështirë ta thuash këtë, por zemra nuk më thotë gjë tjetër. Ju doni vetëm pushtet, ndërsa unë me këta burra, gra, djem e vajza kam parimin e lirisë dhe vetëm lirisë”.
Ky ishte mesazhi që Kryetari i Partisë Demokratike (PD), Sali Berisha i përcolli kryeministrit Edi Rama përpara mijëra qytetarëve, mbështetësve të opozitës dhe përfaqësuesve të shoqërisë civile të ardhur nga zona të ndryshme të Shqipërisë në protestë. organizuar nga Fronti opozitar për shpëtimin e Shqipërisë në Tiranë të enjten (07.07)
Turma u mblodh para zyrës së qeverisë e cila ruhej fort nga më shumë se 1200 forca speciale të policisë. Porta kryesore dhe dritaret e godinës u blinduan, por gjithsesi nuk ka ndodhur asnjë incident. Mësohet se kryeministri Rama ndodhej në qytetin jugor të Vlorës, një bastion i socialistëve në Shqipëri.
“Shqipëria në rrezik” dhe “mos thuaj: çfarë më duhet mua?” ishin mesazhet kryesore të PD-së në protestë.
Më herët Berisha kishte kërkuar nga shqiptarët bashkim rreth kauzave kombëtare si shpopullimi, çmimet e larta, ekonomia në rënie dhe shkombëtarizimi përmes Ballkanit të Hapur në një tur intensive takimesh nëpër Shqipëri. Ai vazhdon të mbajë përgjegjës kryeministrin Edi Rama për situatën.
“Ne jemi armiq, Edi Rama, sepse ju doni pushtetin të pasuroheni duke varfëruar dhe poshtëruar qytetarët, ndërsa unë dhe këta protestues këtu duam lirinë për t’i bërë shqiptarët të lirë, për t’u kthyer dinjitetin”, tha Berisha.
Ai tha se shpresonte që këtë javë të hapeshin negociatat e Shqipërisë me BE-në, sepse kështu do të dilnin në dritë më shumë korrupsion qeveritar. Opozitarët, theksoi ai, i thonë “Jo, Ballkanit të Hapur! Jo Ballkanit të Beogradit! Jo Ballkanit të Putinit”, por duan procesin e Berlinit, Ballkanin e Brukselit, dhe rrugën e drejt Europës.
“Rama u shndërrua në tellall të Beogradit dhe fut sherre mes fqinjëve, rrethon Kosovën me tensione e konflikte dhe nuk mbron interesat shqiptare, por mbron të parat ka interesat e Beogradit” – tha zoti Berisha.
Mes të tjerash Berisha tha se Rama vodhi votën e qytetarëve dhe po qëndron në pushtet me votën e vjedhur.
/Argumentum.al
