Kryeministri Edi Rama dhe Komisioneri i Bashkimit Evropian, për Fqinjësinë dhe Zgjerimin, Oliver Várhelyi vizituan pasditen e sotme bajpasin e Vlorës, një financim i BE-së nëpërmjet një granti prej 20 milionë eurosh.
Në një konferencë të përbashkët për shtyp, pas inspektimit të bajpasit, Rama vlerësoi vizitën e Várhelyi, ndërsa u shpreh se kjo vizitë vjen sot, në pamundësi që Komisioneri të ishte këtu në ditën e lajmëruar të çeljes së bajpasit në 7 korrik.
“Ne rikthehemi këtu së bashku me ministren e Infrastrukturës dhe Energjisë dhe me skuadrën e ARRSH-së, së bashku me punonjësit që këtu vazhdojnë të merren me detaje jashtë trasesë të rrugës, me përmirësime të mëtejshme të natyrës së rikualifikimit urban dhe mjedisor, pasi sot u bë e mundur që një mik i çmuar përveçse Komisioner Evropian për Zgjerimin, të vinte këtu, në pamundësi për të qenë në ditën e lajmëruar të çeljes së bajpasit në 7 korrik, gjë që lidhej me domosdoshmërinë për të çliruar fluksin e makinave, sidomos në fundjavë”, tha Rama.
Kryeministri u ndal edhe te pritshmëria për fillimin formal të negociatave për anëtarësimin e Shqipërisë në BE.
“Nuk dua të zgjatem me këtë pikë. Gjërat i kemi thënë, i kemi stërthënë. Aktualisht parlamenti i Maqedonisë së Veriut është mbledhur me gjasë dhe me shpresë për të miratuar në fund të një debati tejet të politizuar, krejt padrejtësisht për hir të së vërtetës, propozimin e fundit francez”, shtoi Rama.
Ndërkohë, Kryeministri theksoi se Shqipëria nuk ka asnjë gjë për të bërë më shumë sesa të presë dhe mundësisht të shohë dritën jeshile të ndezur më në fund një orë e më parë.
“Patjetër që do të përsërisim pa u lodhur se pavarësisht aspektit formal të procesit, ne do të vazhdojmë përditë, njësoj sikur negociatat të ishin hapur qysh atëherë kur duhej, me reformat, investimet, me financimet e garantuara falë edhe planit ekonomik të investimeve që u ideua dhe u çua para nga Komisioni i ri, nën kujdesin e posaçëm të Komisionerit Varhelyi dhe punën e përbashkët me qeverinë holandeze për të pasur propozimet konkrete në Samitin e Pragës, lidhur me si mundet që Komiteti i ri Politik Europian të përkthehet në hapa komplementarë, hapa që nuk e ndryshojnë as e zëvendësojnë procesin e hedhjes së hapave për integrimin në BE, por që e përshpejtojnë në aspekte konkrete përfshirjen e Shqipërisë dhe Ballkanit Perëndimor në gjirin e Evropës së bashkuar”, tha Rama.
Në përfundim Kryeministri i shprehu mirënjohjen Komisionerit Varhelyi për “gjithçka ka bërë deri tani dhe gjithçka do të vazhdojë të bëjë me të njëjtën kokëfortësi hungareze që e karakterizon”.
Ndërsa Komisioneri i Bashkimit Evropian, për Fqinjësinë dhe Zgjerimin, Oliver Várhelyi u shpreh se “ne e kemi parë që Shqipëria ka ecur shumë”.
“E mbaj mend në fillim të vitit 2020 me gjithë ato detyra. Po të hedhim sytë pas është bërë një punë shumë e madhe dhe Shqipëria është gati për të filluar negociatat me Konferencën e parë Ndërqeveritare dhe nuk ka pikëpyetje e dyshime se Shqipëria ka bërë gjithçka ishte e nevojshme për të arritur tek Konferenca e parë Ndërqeveritare”, tha ai.
Várhelyi u shpreh shpresëplotë se “në ditët në vijim ne do të kemi lajmin e mirë dhe që java e ardhshme do të jetë ajo javë për të cilën kemi aq kohë që presim”.
/Argumentum.al
