Kryeministri Edi Rama dhe Belinda Balluku, zv.kryeministre dhe ministre e Infrastrukturës dhe Energjetikës, morën pjesë mbrëmjen e së dielës në përurimin e terminalit të ri në Aeroportin Ndërkombëtar “Nënë Tereza” në Tiranë.Në përshëndetjen e mbajtur me këtë rast, Rama vuri në dukje se falë investimeve të ndërmarra është rritur në mënyrë të konsiderueshme kapaciteti përpunues, janë shtuar 8 porta të reja, ndërsa ka hyrë në zbatim teknologjia e leximit të pasaportave.
“Është një investim shumë i mirëpritur pasi aeroporti po përballej me një presion të jashtëzakonshëm të rritjes së fluksit të pasagjerëve. Sot ky terminal i ri i ndërtuar në kohë rekord, i munguar prej shumë vitesh për shkak të një marrëveshjeje koncesionale të trashëguar me mjaft probleme, që nuk i qëndroi korrekt detyrimeve as për treminalin e ri, zgjatimin e pistës apo vendqendrimeve të reja në pistë, sot është bërë realitet”, tha Rama.
kryeministri vuri në dukje se nga nesër, të gjithë qytetarët me pasaportë shqiptare që vijnë në aeroportin e Rinasit nuk do kenë lexim manual të pasaportës nga polici që i sheh në sy e sheh pasaportën, por do kalojnë në barrierën digjitale me leximin digjital, proces që zgjat më pak se gjysmë minuti.
“Sot është vënë në punë dhe sistemi i ri teknologjik i leximit të pasaportave në hyrje falë angazhimit të ministrit të Brendshëm, policisë së Shtetit dhe kompanisë e cila që në ditën e parë të nënshrkimit të marrëveshjes së re pasi bleu nga koncesionari i mëparshëm të drejtën e operimit, është angazhuar në të gjithë frontin e punëve që duhen bërë në këtë aeroport. Nga nesër, të gjithë qytetarët me pasaportë shqiptare që vijnë në aeroportin e Rinasit nuk do kenë lexim manual të pasaportës nga polici që i sheh në sy e sheh pasaportën, por do kalojnë në barrierën digjitale me leximin digjital, process që zgjat më pak se gjysmë minuti. Kjo do të lehtësojë fluksin e hyrjeve. Kjo vlen edhe për qytetarët e BE, SHBA, Britanisë së Madhe e Kanadasë. Për të tjerët do ketë proces kalimi me lexim manual të pasaportës”, tha Rama.
Rama vuri në dukje se investimet garantojnë lehtësi dhe cilësi shërbimi për pasagjerët.
“Edhe siguria e mbajmë mend të gjithë me shqetësim e revoltë skandalin e futjes deri në pistë të një bande e cila u vu prapa hekurave si rezultat i mosplotësimit të standardeve të sigurisë nga kompania që operonte aeroportin më parë. Kështu ndodh në të gjitha vendet. Policia bën simulimet e nevojshme, jep sugjerimet, identifikon pikat kritike dhe asiston operatorët në marrjen e masave të sigurisë. Sot jemi shumë më tepër të sigurt në mënyrë se si operohet ashtu sikundër falë një plani pozitiv dhe gatishmërisë së operatorit për ta zbatuar, është shtuar numri i punonjësve të sigurisë këtu. Kjo bëhet për rritje të cilësisë së shërbimit për pasagjerë”, tha Rama./ata
