Qeveria shqiptare dhe Agjencia Franceze e Zhvillimit arritën sot një marrëveshje për financimin e rrjetit të ujësjellësit, në Durrës.
Marrëveshja u nënshkrua në Tiranë, nga ministrja e Ekonomisë dhe Financave, Delina Ibrahimaj dhe sekretarja franceze e Shtetit për Çështjet Europiane, Laurence Bonne.
“Dua të shpreh kënaqësinë për këtë marrëveshje të rëndësishme e paraprirë qysh në krye të herës por e realizuar tani. Për të ndërhyrë me një investim masiv në Durrës që mundëson një transformim të ujësjellësit të Durrësit. Kujtojmë se kur tragjedia e 26 nëntorit ndodhi, Presidenti i Macron ishte i pari që u interesua, ishte nga ata kolegë evropianë në ato ditë të vështira pyeste për ecurinë e kërkim shpëtimeve. Angazhoi një trup e cila erdhi në Shqipëri. Dhe më pas, presidenti u angazhua personalisht duke përfshirë Francën në grupin e vendeve që premtuan mbështetje financiare. Dhe ja ku jemi sot, ku rrëzojmë një proces të gjatë dhe domethënës. Janë fonde që një pjesë e tyre janë futur në procesin e zbatimit me programin e BE për shkolla çerdhe etj.”- tha Rama.
Pas tërmetit të fortë të nëntorit të vitit 2019, qeveria franceze përmes Agjencisë Franceze të Zhvillimit mori përsipër rindërtimin e rrjetit të ujësjellësit të Durrësit, një prej zonave më të prekura nga tërmeti, përmes një kredie të butë prej 60 milionë euro dhe një granti për asistencë teknike prej 1 milion euro.
Ministrja e Shtetit për Çështjet Europiane, Laurence Bonne tha se ky është një tregues i miqësisë mes 2 vendeve.
“Gjithçka që bëjmë bashkë krijon lidhje besimi. Kjo është një ilustrim i miqësisë së Francës për Shqipërinë dhe që u shpreh pas tërmetit të rënë në 2019. E gëzuar për këtë marrëdhënie që kemi”, tha Bonne.
Ministrja e Financave dhe Ekonomisë, Delina Ibrahimaj bëri të ditur se qeveria shqiptare ka nisur prej vitesh reformën e ujit, duke synuar furnizimin pa ndërprerje.
Sipas saj, kjo kredi do të kontribuojë për realizimin e këtij synimi. Po ashtu, Ibrahimaj vuri në dukje se përmes këtij financimi do të përmirësohet edhe furnizimi në zonën e Fushë Kuqes dhe Fushë Krujës, si dhe do të ndikojë në optimizimin e rrjetit të furnizimit që nga matja, faturimi dhe mbledhja e detyrimeve.
“Përmes kësaj kredie do të hartojmë një masterplan, jo vetëm për furnizimin e ujit të pijshëm, por edhe ndërtimin e rrjetit të kanalizimeve. Synojmë të arrihet kufizimi i ndikimeve mjedisore, përmes rritjes së cilësisë së burimeve dhe zhvillimit të një strategjie për çmimet dhe tarifat e furnizimit me ujë“, tha Ibrahimaj.
