Administrata Trump ka pezulluar aplikimet për viza imigruese në mbarë botën për të zhvilluar një “trajnim të thelluar” për oficerët konsullorë, në kuadër të fushatës së saj të vazhdueshme për forcimin e kontrolleve mbi emigracionin, raportoi të martën Financial Times, duke cituar një zëdhënës të Departamentit amerikan të Shtetit.
Departamenti i Shtetit bëri të ditur se takimet për vizat do të riorganizohen për t’iu përshtatur trajnimit, i cili synon të ndihmojë oficerët konsullorë të identifikojnë dhe të refuzojnë aplikantët që konsiderohen se mund të bëhen të varur nga përfitimet sociale publike në SHBA.
Që prej rikthimit të Donald Trump në Shtëpinë e Bardhë, administrata e tij ka forcuar ndjeshëm politikat e emigracionit, duke ndërmarrë një fushatë kundër emigrantëve pa dokumente dhe duke rritur kontrollet ndaj personave që mbajnë viza amerikane.
Më 10 gusht, Departamenti i Shtetit njoftoi se kishte revokuar më shumë se 175 mijë viza që nga janari 2025, kur Trump nisi mandatin e tij të dytë.
Të hënën, Departamenti i Sigurisë Kombëtare (DHS) propozoi një tarifë prej 103,265 dollarësh për aplikimet që i nënshtrohen kuotës së vizave H-1B, në lëvizjen më të fundit për kufizimin e këtij programi, pasi gjykatat rrëzuan një propozim të mëparshëm për një tarifë prej 100 mijë dollarësh.
Më herët të martën, zëdhënësi i Departamentit të Shtetit, Tommy Pigott, deklaroi se Departamenti po bashkëpunon me DHS për të revokuar vizat joimigruese të shtetasve të huaj që kanë hyrë në SHBA duke deklaruar se do të qëndronin përkohësisht si vizitorë, por më pas kanë paraqitur kërkesa për azil me synimin për të qëndruar përgjithmonë në vend.
Masa vjen pas raportimeve se deri në 200 mijë viza për udhëtime biznesi dhe turistike të shtetasve të huaj që kanë aplikuar për azil mund të revokohen.
/Argumentum.al
