Në Ohër të Maqedonisë së Veriut do të mbahet sot dhe nesër nisma rajonale, Ballkani i Hapur.
Në këtë nismë, do të marrë pjesë për herë të parë edhe Mali i Zi, por dhe Bosnja-Hercegovina, edhe pse kjo e fundit nuk e ka konfirmuar zyrtarisht pjesëmarrjen në këtë nismë
Mësohet se i pranishëm do të jetë edhe kryeministri Edi Rama, i cili do të ketë një darkë punë mbrëmjen e sotme me kryeministrin e Maqedonisë së Veriut, Dimitar Kovaçeski, presidentin e Serbisë Aleksandër Vuçiç, kryeministrin e Malit të Zi Dritan Abazaoviç si dhe kryetarin e këshillave të Ministrave të Bosje Hercegovinës, Zoran Tageltija.
Sakaq, i dërguari i SHBA për Ballkanin Perëndimor, Gabriel Escobar dhe Komisioneri për Fqinjësinë dhe Zgjerimin Oliver Varhelyi do të japin nga një mesazh online.
Megjithatë, ndërsa e gjithë vëmendja është në takimin e radhës në kuadër të “Ballkanit të Hapur”, duket se Ministri i jashtëm rus Sergey Lavrov e ka minuar këtë iniciative duke e ironizuar atë, pas anulimit së vizitës së planifikuar në Serbi për shkak të refuzimit të vendeve të Ballkanit Perëndimor për ta lënë atë të fluturojë mbi hapësirën e tyre ajrore.
“NATO dhe BE duan ta kthejnë Ballkanin në një projekt të tyren të quajtur “Ballkan i mbyllur”, tha Lavrov të hënën (6 qershor) në mbrëmje në lidhje me projektin ekonomik ndërkufitar të Ballkanit të Hapur të mbështetur nga Serbia, Shqipëria dhe Maqedonia e Veriut.
Shihet qartë se zyrtarët e Brukselit nuk kanë dashur që ne të konfirmojmë pozicionin tonë për Kosovën, Bosnjë-Hercegovinën dhe të shprehim përkrahjen për iniciativën e Beogradit ‘Ballkani i Hapur’”, tha Lavrov.
Ai shtoi se “nëse një vizitë e një ministri të jashtëm rus shihet në Perëndim si diçka afër një kërcënimi global, atëherë nga të gjitha llogaritë, gjërat brenda Perëndimit janë shumë të këqija”.
Kujtojmë se Kosova nuk i është bashkuar Ballkanit të Hapur, duke e konsideruar atë si nismë serbe, madje duke shkuar më tej, duke akuzuar drejtpërdrejtë Rusinë që qëndron pas kësaj nismë.
Komentet e mësipërme të Lavrov, konfirmojne se po, Rusia e mbështet “Ballkanin e Hapur”, ndonëse për vizitën e tij në Beograd, Ballkani i mbyll si asnjëherë me parë.
/Argumentum.al