BASHKËPUNTORI i ARGUMENTUM, JORGJI KOTE NDEROHET ME TITULLIN “MJESHTËR I MADH“

Më 28 Qershor 2022, në selinë e Presidencës së Republikës në Tiranë u zhvillua një ceremoni solemne me rastin e dekorimit të Dr. Jorgji KOTE me titullin “Mjeshtër i Madh“

Ishin të pranishëm me dhjetra familjarë, të afërm, miq, përfaqësues të medias dhe personalitete të larta nga fusha të ndryshme.

Ndërmjet tyre Akademiku Pëllumb Xhufi, ish Ministrat e Jashtëm Arta Dade dhe Paskal Milo,  Prof. Dr. Ksenofon Krisafi, Prof. Dr. Selami Xhepa, Ambasadori Dashnor Dervishi, ish Ambasadorët Ylljet Aliçkaj, Kujtim Xhani, Islam Lahuka, Mehdi Shaqiri, Spartak Topallaj,  Kryetari i Shoqatës së Gazetarëve, Aleksandër Çipa, gazetarët e njohur televizive Klementina Cenkollari dhe Rezear Xhaxhiu, Mjeshtri i Madh, botuesi i njohur Rexhep Hida, Genc Mlloja, diplomat dhe gazetar i njohur i marrëdhënieve ndërkombëtare, etj.

ARGUMENTUM e ndoqi nga afër këtë ceremoni.

Në fjalën e rastit, Presidenti Ilir Meta evidentoi dhe vlerësoi lart punën, përkushtimin, cilësitë dhe shërbimet e spikatura të Dr. Jorgji Kote në fushat e ekonomisë, përkthimit, diplomacisë dhe publicistikës dhe i dorzoi titullin “Mjeshtër i Madh“.

Në fjalën e tij, Dr.  Jorgji KOTE shprehu falenderimet për Presidentin META, për nderimin dhe vlerësimin e lartë presidencial dhe të pranishmit për rolin, ndihmën, dhe bashkëpunimin e tyre në 50 vitet e veprimtarisë së tij në fushat e lartpërmendura.

Në fushën e publicistikës, ai përmendi gazetaren Marjana DODA, Kryeredaktoren e “ARGUMENTUM“ e pranishme në ceremoni, duke e cilësuar si një ndër portalet më seriozë politikë dhe diplomatikë.

Me shumë falenderime për ndihmesën dhe bashkëpunimin e tij të vlerësuar me ne, Redaksia e ARGUMENTUM i shpreh dhe  njëherë përgëzimet më të ngrohta Zotit Jorgji KOTE dhe urimet më të përzemërta për shëndet, jetë të gjatë dhe suksese të mëtejshme!

Më poshtë po japim një jetëshkrim të shkurtër të Mjeshtrit të Madh, Jorgji Kote, pjesa më e madhe e të cilës u përmend dhe në fjalën e Presidentit Ilir Meta

 JETESHKRIM I SHKURTER I DR. JORGJI KOTE

Jorgji Vangjel KOTE lindi më 9 Mars 1952 në Tiranë.  Është diplomuar për gjuhë angleze dhe për ekonomi në Universitetin e Tiranës.

Falë performancës së shkëlqyer shkollore, fill pas diplomimit, në gusht 1974 u emërua mësues i anglishtes në Shkollën e Mesme të Gjuhëve të Huaja në Tiranë.

Nisur nga nevojat për përkthyes të këtij niveli dhe përvojës me shoqërimin e shumë grupeve turistike dhe rinore të huaja, në Mars 1978 Jorgji fillon punë si Përkthyes në ish Ministrinë e Tregtisë së Jashtme.

Kërkues ndaj vehtes, për të qenë në lartësinë e detyrave të  ardhëshme, më 1984 filloi studimet në Fakultetin Ekonomik, të cilat i përfundoi më 1986.

Falë moshës relativisht të re, njohjes së gjuhës angleze dhe gjermane dhe tashmë ekonomist, në Tetor 1987 – Qershor 1988 ishte i pari specialist i asaj fushe që u dërgua për kualifikim post-universitar në Universitetin e mirënjohur Ekonomik të Vjenës, të cilin e përfundoi me rezultate të kënaqshme.

Duke vlerësuar rezultatet e tij si specialist i tregjeve dhe mallrave tona kryesore – kromi, nafta, bakri, energjia elektrike, etj, më 1989 u promovua Drejtor i Drejtorisë së Koniunkturës dhe Çmimeve në po atë Ministri. Gjatë asaj periudhe, ndihmoi për zbatimin e  elementëve të parë të  ekonomisë së tregut, privatizimit dhe formave të reja në tregtinë e jashtme; në këtë kuadër, ka qenë pjesë e delegacioneve ekonomike dhe tregtare në Athinë, Bukuresht, Ankara, Paris, Bruksel, Amsterdam, Berlin, etj.

Mars 1991, shoqëroi si ekspert dhe përktheu për Misionin e parë të FMN-së dhe Bankës Botërore që erdhi në Tiranë për çeljen e Përfaqësisë së tyre.

Shtator 1991 iu dha grada “Doktor Shkencash“ në fushën e marketinut ndërkombëtar, me dizertacionin e parë të këtij lloji të pa politizuar.

Në Nëntor 1992 kryen kursin 1 mujor per menazhim biznesi në Universitetin e Nebraskës në SHBA.

Gjatë periudhës 1993 – 1996 Jorgji iu rikthye me kohë të plotë pasionit dhe profesionit të tij të parë, përkthimit në të gjitha zhanret. Falë avantazheve të lartpërmendura, atë e ftojnë të përkthejë në shumicën e eventeve, konferencave dhe seminareve ndërkombëtare të organizuara nga Banka Botërore, FMN, KiE, fondacione dhe grupime  të ndryshme politike brenda dhe jashtë vendit.

Më 1996-1997 Jorgji drejtoi Përfaqësinë e parë të Shtypit të Universitetit të Oksfordit ( OUP) në Tiranë. Ajo dha një kontribut të vlerësuar për promovimin e gjuhës angleze me  botime origjinale dhe metoda moderne  mësimdhënie.

Me shpërthimin e krizës së piramidave, në Mars 1997, Jorgji emërohet  Ndihmës për Median dhe Përkthyes zyrtar i Kryeministrit të Qeverisë së Pajtimit Kombëtar, Bashkim Fino, me të cilin përktheu në të gjitha takimet dhe konferencat e shtypit në Tiranë dhe në audiencat me Papa Gjon Pali II, M. Albright, Romani Prodi, presidentët e Bankës Botërore/FMN-së në Vatikan, Nju Jork, Uashington dhe Romë.

Po gjatë asaj periudhe, spikati dhe si interpret me ish Kancelarin austriak Franz Vranitzky, i Dërguari i Posaçëm i OSBE-së për krizën në Shqipëri, me të cilin përktheu në të gjitha takimet zyrtare dhe në 10 Konferenca Shtypi me jehonë ndërkombëtare të vlerësuara dhe nga OSBE-ja.

1 Nëntor 1997, filloi punë në  shërbimin diplomatik – Këshilltar e pastaj Ministër Këshilltar në Misionin pranë BE-së në Bruksel . 

Më 1 Shkurt 2001 transferohet në Ambasadën tonë në Berlin dhe më 6 Nëntor rifillon në MPJ – specialist, Përgjegjës Sektori dhe Përkthyesi kryesor i MPJ-së. Gjatë asaj periudhe, krahas përkthimeve voluminoze të rëndësishme me rastin e antarësimit në NATO, liberalizimin e vizave me BE, problematikat e Kosovës, etj, ishte dhe në përbërje të delegacioneve qeveritare në konferenca  në kryeqytetet e rajonit dhe në Uashington, Nju Jork, Londër, Moskë, Berlin, Romë, Tokio, Seul, Berlin, etj.

Më 6 Korrik 2011 u emërua sërish në Ambasadën dhe Misionin tonë pranë BE-së në Bruksel deri sa doli në pension më 31 Mars 2017.

Gjatë 15 viteve diplomatike në Bruksel dhe në Berlin, si bashkëpuntori më i afërt i Ambasadorëve, Jorgji ka ndjekur me vlerësime nga kolegët dhe drejtuesit më të lartë të MPJ-së dosje dhe procese jetike, sidomos ato të sigurimit të mbështetjes së BE-së për rimëkëmbjen e shtetit pas trazirave të mëdha më 1997 dhe 1998, Procesin e Stabilizim – Asocimit, Paktin e Stabilitetit, nismat rajonale dhe veprimtaritë ndërkombëtare për Kosovën pas shpalljes së pavarësisë.

Jorgji vazhdon intensivisht veprimtarinë e tij si analist i pavarur diplomatik, sidomos për çështjet e integrimit europian dhe bashkëpunimit rajonal, me shumë  kontakte me institucione dhe personalitete europiane, belge, gjermane dhe të tjerë.

Nga viti 2018 është Antar i Këshillit prestigjioz të Ambasadorëve Shqiptarë.

Si publicist i njohur, ka botuar rreth 500 shkrime në shtypin e përditshëm shqiptar mbi aktualitetin diplomatik dhe politikat e jashtme, 5 vitet e fundit çdo javë ( GSH)  

Gjithashtu, ka botuar 6 libra – Fjalor Ekonomik i Bankës Botërore ( 1995)  me porosi të kësaj të fundit; “Berlini pa mure“ ( 2009) Fjalor  Frazeologjik mbi diplomacinë“ ( 2010) Në Vetrrethim ( 2012)  “Diplomacia për të gjithë“( 2014) “True Stories from Red Albania ( 2016) që janë mirëpritur  me vlerësime brenda dhe jashtë vendit; ka gati për botim  librin mbi procesin e çeljes së negociatave me BE-në.

Ka përkthyer 8 libra të autorëve të huaj dhe shqiptarë mbi integrimin europian, Çështjen e Kosovës si rast “sui generis“, emigracionin, menaxhimin e biznesit, etj.

/Argumentum.al

© 2022 Argumentum