Liderët e Bashkimit Evropian dhe Ballkanit Perëndimor do të mblidhen në Samitin BE–Ballkani Perëndimor, i cili do të mbahet nesër në Bruksel.
Samiti do të kryesohet nga presidenti i Këshillit Evropian, Antonio Costa. Bashkimi Evropian do të përfaqësohet nga presidenti i Këshillit Evropian Costa dhe Presidentja e Komisionit Evropian, Ursula von der Leyen, ndërsa në takim do të marrë pjesë edhe përfaqësuesja e Lartë e BE-së për Politikë të Jashtme dhe Siguri, Kaja Kallas.
Sipas BE-së, samiti do të shërbejë si një mundësi për të demonstruar dhe rikonfirmuar forcën e marrëdhënieve strategjike mes BE-së dhe Ballkanit Perëndimor, si dhe përfitimet që ato u sjellin qytetarëve.
Në përfundim të samitit do të miratohet Deklarata e Samitit BE-Ballkani Perëndimor, me të cilën pritet që partnerët e Ballkanit Perëndimor të harmonizohen, thuhet nga BE-ja.
Në samit do të theksohet rëndësia e marrëdhënieve politike dhe ekonomike mes BE-së dhe partnerëve të Ballkanit Perëndimor, veçanërisht në kontekstin aktual gjeopolitik dhe nevojën për lidhje edhe më të forta mes BE-së dhe Ballkanit Perëndimor.
Pritet që BE-ja të riafirmojë angazhimin e saj të plotë dhe të qartë për perspektivën e anëtarësimit të Ballkanit Perëndimor në BE, si dhe progresin e arritur në procesin e zgjerimit, të pasqyruar në raportin më të fundit të Komisionit Evropian.
Gjithashtu, do të nënvizohet rëndësia e përparimit konkret në reforma, harmonizimit me legjislacionin e BE-së (acquis), bashkëpunimit rajonal, marrëdhënieve të mira fqinjësore dhe pajtimit.
– Integrimi gradual dhe Plani i Rritjes
Në samit do të diskutohen edhe hapat për integrimin gradual të partnerëve të Ballkanit Perëndimor në BE gjatë procesit të zgjerimit.
Pritet që BE-ja të mirëpresë përparimin konkret në integrimin gradual të Ballkanit Perëndimor në tregun e përbashkët të BE-së, veçanërisht përmes Planit të Rritjes për Ballkanin Perëndimor.
Plani i Rritjes, i lançuar në vitin 2023, synon të integrojë më tej Ballkanin Perëndimor në tregun e përbashkët të BE-së, të avancojë bashkëpunimin ekonomik rajonal si dhe të nxisë reformat e nevojshme të lidhura me BE-në, duke ofruar deri në 6 miliardë euro për reforma dhe investime.
BE-ja është partneri kryesor dhe më i besueshëm i Ballkanit Perëndimor, si dhe partneri më i madh tregtar, investitori dhe donatori në rajon.
Samitet e rregullta BE-Ballkani Perëndimor janë mbajtur që nga viti 2018. Samiti i fundit midis udhëheqësve të BE-së dhe Ballkanit Perëndimor u zhvillua në Bruksel në dhjetor 2024.
Samiti i ardhshëm do të zhvillohet në qershor 2026 në Mal të Zi.
