Krerët e gjashtë shteteve nënshkruan së bashku Deklaratën e Astanasë dhe Traktatin e Fqinjësisë së Mirë dhe Bashkëpunimit Miqësor të Përhershëm, u firmosën 12 dokumente bashkëpunimi dhe numri i rezultateve të samitit arriti mbi 100 … Të martën, në Astana të Kazakistanit u organizua Samiti i Dytë Kinë-Azisë Qendrore, ku u arritën një sërë mendimesh unanime për bashkëpunimin. Në këtë samit, presidenti i Kinës Xi Jinping mbajti një fjalim, ku përmendi për herë të parë “Shpirtin Kinë-Azi Qendrore”, duke ofruar një bazë të rëndësishme për bashkëpunimin miqësor ndër breza. Liderët e pesë vendeve të Azisë Qendrore vlerësuan se “Kina është një vend partner strategjik dhe mik i vërtetë, të cilit vendet tona mund t’i besojnë përgjithmonë. “
Foto nga Xinhua
Në hartën e botës, Azia Qendrore ndodhet në qendër të kontinentit euroaziatik. Rruga e lashtë e Mëndafshit kalonte nga këtu dhe nisma “Një brez, një rrugë” zuri rrënjë për herë të parë këtu. Që nga Samiti i parë Kinë-Azi Qendrore që u mbajt në Xian në vitin 2023, korniza e mekanizmit Kinë-Azi Qendrore është bërë më e pjekur dhe 13 platforma bashkëpunimi në nivel ministror kanë funksionuar në mënyrë efektive. Nga shpallja zyrtare e projektit të hekurudhës Kinë-Kirgizistan-Uzbekistan te përmirësimi i cilësisë dhe zgjerimi i kapaciteteve të Korridorit Ndërkombëtar të Transportit të Trans-Kaspikut, gjithnjë e më shumë qytete kineze kanë hapur linja hekurudhore për në Azinë Qendrore.
Foto nga Xinhua
Ky vit shënon 5-vjetorin e themelimit të Mekanizmit Kinë-Azi Qendrore. Duke qëndruar në një nyje të rëndësishme që lidh të kaluarën dhe të ardhmen, presidenti Xi Jinping e përmblodhi përvojën e bashkëpunimit midis Kinës dhe Azisë Qendrore si “Shpirti Kinë-Azi Qendrore” i “respektit të ndërsjellë, besimit të ndërsjellë, përfitimit të ndërsjellë, ndihmës së ndërsjellë e promovimit të modernizimit të përbashkët me anë të zhvillimit me cilësi të lartë”, gjë që jo vetëm pasqyron mbledhjen e përvojës së thellë historike, por edhe përputhet me prirjen e kohës. Ky Shpirt u përfshi në Deklaratën e Samitit të Astanasë, që do të thotë se është njohur dhe mbështetur unanimisht nga pesë vendet e Azisë Qendrore.
Aktualisht, situata ndërkombëtare është e ndërlikuar dhe në ndryshim të përhershëm, konfliktet gjeopolitike vazhdojnë dhe proteksionizmi, unilateralizmi e hegjemonizmi janë në rritje. Kërkimi i unitetit, promovimi i qëndrueshmërisë dhe synimi i zhvillimit janë vullneti i përbashkët i rajonit. Në rrugën drejt arritjes së përbashkët të modernizimit, si mund ta thellojnë bashkëpunimin Kina dhe Azia Qendrore? Presidenti kinez Xi Jinping paraqiti pesë propozime, që theksojnë respektimin e qëllimit fillestar të besimit dhe mbështetjes së ndërsjellë, optimizimin e bashkëpunimit pragmatik, efikas dhe thellësisht të integruar, krijimin e një modeli sigurie paqësor, të qëndrueshëm dhe të ndërvarur, forcimin e lidhjeve njerëzore të solidaritetit, mirëkuptimit e dashurisë së ndërsjellë dhe ruajtjen e një rendi ndërkombëtar të drejtë, të arsyeshëm, të barabartë dhe të rregullt. Këto propozime kanë hartuar një plan të ri për promovimin e zhvillimit me cilësi të lartë të bashkëpunimit rajonal. Udhëheqësit e pesë vendeve të Azisë Qendrore deklaruan unanimisht se, në një botë plot pasiguri, rëndësia strategjike e mekanizmit Kinë-Azi Qendrore është bërë më e spikatur dhe se begatia dhe fuqia e Kinës po u sjellin dobi vendeve fqinje./cgtn
