Nga Eljanos Kasaj
Më 21 qershor 2025, i dërguari i posaçëm i Shteteve të Bashkuara për Ukrainën, Gjeneral Keith Kellogg, zhvilloi një takim në Minsk me Presidentin e Bjellorusisë, Alexander Lukashenko (Аляксандр Лукашэнка), duke shënuar angazhimin më të lartë diplomatik të SHBA-së me Bjellorusinë në vitet e fundit. Ky zhvillim ka një rëndësi të veçantë në kontekstin diplomatik rajonal dhe përpjekjeve për paqe në Ukrainë.
Negociatat u zhvilluan në Pallatin e Pavarësisë(Палац Незалежнасцi), me pjesëmarrjen e delegacioneve bjelloruse dhe amerikane.
Në veçanti, Kellogg shoqërohej nga zëvendësi i tij John Cole, i cili kishte vizituar më parë Minskun dhe kishte zhvilluar bisedime me presidentin bjellorus në lidhje me lirimin e Yuri Zenkoviç. Pala bjelloruse u përfaqësua nga shefi i KGB-së bjelloruse Ivan Tertel dhe Përfaqësuesi i Përhershëm në OKB Valentin Rybakov.
“Jam shumë i lumtur, z. Gjeneral, që ju takoj. Shpresoj vërtet që biseda jonë të jetë shumë e sinqertë dhe e hapur. Përndryshe, cili është qëllimi i takimit? Nëse jemi të zgjuar dhe dinakë përballë njëri-tjetrit, nuk do të arrijmë rezultate”, tha presidenti Lukashenka në fillim të takimit me delegacionin amerikan.
Vizita ishte njoftuar më parë nga media prestigjoze amerikane Reuters, duke cituar burime të paidentifikuara. Sipas këtij informacioni, zyrtari amerikan do të zhvillojë bisedime me presidentin Lukashenka në lidhje me situatën aktuale të bisedimeve të paqes për konfliktin e armatosur midis Rusisë dhe Ukrainës.Ndërkohë gazeta bjelloruse “Наша Нiва” vëren se “rezultatet praktike e takimit midis Lukashenkas dhe Kellogg duhet të jetë lirimi i disa të burgosurve politikë, përfshirë zyrtarë të lartë”.
Zyrtarisht, as pala amerikane dhe as ajo bjelloruse nuk konfirmuan që kjo vizitë ishte planifikuar në të vërtetë. Siç i tha për median bjelloruse “Belsat” historiani dhe vëzhguesi politik Alexandr Friedman, në Uashington nuk kishte nevojë të reklamohej takimi me presidenton Lukashenka, pasi ai është “një person i urryer” në shumë vende të Bashkimit Evropian dhe prej shumicës së demokratëve amerikan.
“Nga pikëpamja e Lukashenkas, takimi me të paktën disa përfaqësues amerikanë është i mirë, është një shans për t’u rikthyer në lojën e politikës së jashtme.”-shtoi me tej ai, duke aluduar mbi politikën balancuese të presidentit Lukashenka, e cila kërkon të gjejë një rrugë të mesme midis Fuqive të Mëdha me të cilat Republika e Bjellorusisë kufizohet:Federatës Ruse,Bashkimit Evropian dhe Aleancës së Antlantikut të Veriut(NATO/OTAN), e cila përfaqëson de facto SHBA-në. Situata komplikohet edhe më shumë duke ditur se Bjellorusia ndan dy nga kufinjtë e saj më të gjatë me Rusinë dhe Ukrainën, dy vende të cilat kanë hyrë zyrtarisht në vitin e tretë të konfliktit të armatosur.
Në të njëjtën kohë, Kellogg, i cili qartësisht mban një qëndrim pro-ukrainas, është i interesuar të takohet me Lukashenkan, i cili është i afërt me Rusinë dhe presidentin Putin: “Në fund të fundit, ka njëfarë kuptimi në këtë. Ky është një person i afërt me Rusinë, dhe Kellogg ende nuk ka pasur mundësinë të flasë me njerëz të tillë.”
Kjo vizitë shpreh qartë vullnetin e presidentit republikan Donald Trump në kërkimin e çdo lloj kanali komunikimi me Kremlinin, për të aritur një armëpushim dhe bisedimet e paqes midis Rusisë dhe Ukrainës, por njëkohësisht ajo tregon edhe se amerikanët tashmë kanë hqur dorë nga politika e përbashkët me aleatët e NATO-së dhe kanë filluar një linjë të pavarur diplomatike bazuar në objektivat e tyre trategjikë dhe gjeopolitik.
© 2025 Argumentum
