Raundi i dytë i zgjedhjeve presidenciale, siç pritej, pati të njëjtin fat si i pari: dështoi pasi opozita e përfaqësuar nga një fraksion i grupit parlamentar të Partisë Demokratike (PD) nuk paraqiti asnjë kandidaturë brenda afatit, që ishte të dielën në orën 16:00.
Deputeti Enkelejd Alibeaj që drejton fraksionin u tërhoq nga propozimi për nominim, pasi Partia Socialiste (PS) bëri të qartë se nuk do të firmoste kandidatët e opozitës dhe se kampi i djathtë duhet të gjejë vetë 20 nënshkruesit.
Nëse opozita vazhdon të mos propozojë zyrtarisht kandidatët për presidencën, atëherë një shumicë e thjeshtë në votimin e katërt do t’i japë vendit një kreu të ri të shtetit. Seanca plenare u mbajt pasditen e së hënës, ku u konsiderua e përfunduar raundi i dytë dhe sipas procedurave të parashikuara, Konferenca e Kryetarëve do të përcaktojë mbajtjen e raundit të tretë, i cili është i fundit që kërkon 84 vota për zgjedhjen e president.
/Argumentum.al
