Në një minierë qymyri në veri të Turqisë ka pasur një shpërthim në 300 metra thellësi. Të paktën 25 vetë kanë humbur jetën, dhjetëra të tjerë konsiderohen të humbur.
Aksidentet në minierat turke nuk janë të rralla, por shpërthimi i fundit i fortë në një minierë qymyri në veri të Turqisë të premten (14.10.) i kushtoi jetën të paktën 25 personave. Njoftimi për tragjedinë erdhi nga Zyra e Guvernatorit të Provincës Bartin në Detin e Zi natën duke u gdhirë e shtuna, ka shkruar agjencia Anadolu. 6 minatorë të plagosur janë shtruar në spital. Por mendohet se ka ende dhjetëra minatorë të tjerë në bllokuar në thellësi të minierës. Me gjasë shpërthimin në 300 metra thellësi e ka shkaktuar përzierja e gazit të çliruar në minierë, raportojnë mediat lokale turke. Qindra vetë po marrin pjesë në aksionin e shpëtimit.
Sipas të dhënave të ministrit të Brendshëm turk, Süleyman Soylu në minierë në momentin e tragjedisë kanë qenë brenda 110 minatorë, 49 prej tyre në një pjesë të thellë më të rrezikuar. 36 minatorë janë shpëtuar. Presidenti turk, Erdogan ka bërë të ditur, se do të vizitojë vendin e katastrofës të shtunën për të koordinuar masat e ndihmës dhe se ka filluar hetimi i tragjedisë.
Kryetarja e Kuvendit, Lindita Nikolla, ka shprehur sot dhimbjen nëpërmjet një mesazhi ngushëllimi për tragjedinë nga shpërthimi në minierën në Turqinë Veriore
“Një lajm i trishtuar nga Turqia. Nga njoftimet e deritanishme 28 persona kanë humbur jetën nga shpërthimi në një minierë në Bartin në Turqinë Veriore dhe për dhjetëra të tjerë ekipet e shpëtimit vazhdojnë kërkimet”, u shpreh Nikolla.
”Ndaj dhimbjen me familjet e viktimave dhe gjetshin forcën dhe kurajën të përballojnë dhimbjen për humbjen e njerëzve të tyre të dashur prej tragjedisë”, theksoi ajo.
‘I shpreh solidaritetin popullit turk, Asamblesë së Madhe Kombëtare dhe Presidentit të saj, mikut dhe kolegut z. Mustafa Sentop”, shkroi në mesazhin e ngushëllimit Kryetarja e Kuvendit, Lindita Nikolla.
/Argumentum.al
