Ndihmës Sekretarja e Çështjeve Evropiane dhe Euroaziatike, Karen Donfried mbërriti në Shqipëri në kuadër të një turi që po zhvillon në Ballkan. Sëbashku me Zëvendës Ndihmës Sekretarin e Shtetit për Ballkanin Perëndimor Gabriel Escobar, dhe me Ambasadoren e SHBA në Tiranë, znj.Yuri Kim u takuan me zyrtarët e politikës shqiptare.
Ambasada amerikane në Tiranë përmes një njoftimi përcolli momentet kryesore të vizitës së ndihmëssekretares së Shtetit për Çështjet Evropiane dhe Euroaziatike, Karen Donfried dhe zëvendësndihmëssekretarit të Shtetit dhe të Dërguarit të Posaçëm për Ballkanin Perëndimor, Gabriel Escobar në 28 dhe 29 prill.
“Qëllimi i vizitës së tyre ishte thellimi i partneritetit tashmë të fortë midis Shteteve të Bashkuara dhe Shqipërisë si miq, aleate në NATO dhe anëtare në Këshillin e Sigurimit së Kombeve të Bashkuara, sidomos teksa festojmë 100-vjetorin e marrëdhënieve tona dypalëshe”, thuhet në njoftimin e Ambasadës amerikane.
“Ata rikonfirmuan mbështetjen e Shteteve të Bashkuara për anëtarësimin e Shqipërisë në Bashkimin Evropian dhe nxitën vijimin e reformave të nevojshme, përfshirë reformën në drejtësi; mirëpritën përpjekjet e fundit për të diversifikuar burimet, furnizimet dhe rrugët e energjisë në Shqipëri dhe më gjerë në rajon; dhe nënvizuan se Shtetet e Bashkuara do të vazhdojnë luftën kundër korrupsionit si një interes thelbësor i sigurisë kombëtare të Shteteve të Bashkuara”, vijon njoftimi.
“Ata theksuan gjithashtu rolin e pazëvendësueshëm të një opozite të fortë në demokracinë e Shqipërisë, theksuan rëndësinë e institucioneve të forta demokratike dhe sundimit të ligjit dhe shprehën shpresën për një partneritet të efektshëm dhe që sheh përpara me popullin shqiptar, duke përfshirë edhe partitë që i përfaqësojnë ata”, përfundon njoftimi.
Ndërsa më heret vete kryeminsitri Rama informoi se në takim u diskutua gjerësisht për ecurinë pozitive të reformave, forcimin e drejtësisë, investimet strategjike në energji, veton e Bullgarisë ndaj Maqedonisë së Veriut, situatën në rajon, si edhe për mbështetjen e plotë që Shtetet e Bashkuara i japin “Ballkanit të Hapur”.
“Konsideratat e Ndihmëssekretares për rolin e Shqipërisë në Këshillin e Sigurimit dhe në rajonin tonë ishin mbresëlënëse”, tha ai.
Pas takimit me Ramën, Donfried është pritur në Kryesinë e Kuvendit nga Enkelejd Alibeajn të cilin Shtetet e Bashkuara e njohin si kryetar të Partisë Demokratike, si dhe Gazment Bardhi e Jorida Tabaku, deputetë të PD-së që nuk janë pjesë e Rithemelimit.
Kryetari i Grupit Parlamentar të PD, Enkelejd Aliebaj në një prononcim për mediat pas takimit të tij me Donfried, tha se SHBA kërkon një opozitë të fortë, pro amerikane dhe që sheh nga e ardhmja.
“Pata kënaqësinë që të prisja zyrtaren e DASH. Diskutuam dhe folën për çështje të rëndësishme që Shqipëria është duke përballur. Çështje që lidhen me zgjedhjet, krimin e organizuar, shtetin e së drejtës. Po kështu edhe çështje të rëndësishme si ajo e luftës kundër korrupsionit. Nuk mund të lija pa diskutuar marrëdhënien që PD ka pasur me SHBA. Me kënaqësi vura re dhe pashë mbështetjen që SHBA kanë me PD. Mora mbështetjen e zonjës dhe të DASH për mbështetjen e një opozitë të fortë dhe të qëndrueshëm, një opozite pro amerikane që sheh nga e ardhmja. Sfidat prekin të gjithë Shqipërinë. Ky është preokupimi i PD.”, tha Aliebeaj.
Po ashtu me anë të një postimi në twitter Gazment Bardhi ka zbardhur takimin me Ndihmës Sekretaren Amerikane të Shtetit për Evropën dhe Euro-Azinë, Karen Donfried. Sipas Bardhit, ato kanë ngritur shqetësimet që lidhen me korrupsionin e kudogjendur në Shqipëri dhe masakrën zgjedhore të konfirmuar sëfundmi nga SHBA.
Postimi i plotë i Gazment Bardhit:
Kënaqësi të takonim sot NdihmësSekretaren Amerikane të Shtetit për Evropën dhe Euro-Azinë, znj. Karen Donfried.
Shprehem qëndrimin tonë për sfidat e opozitës, konkluzionet e raportit të DASH për korrupsionin e kudogjendur në Shqipëri dhe masakrën zgjedhore të konfirmuar së fundmi nga SHBA, rolin e PD në procesin e integrimit europian dhe sfidat e Shqipërisë në Rajon.
Një falenderim të sinqertë për rolin e SHBA dhe mbështetjen e vazhdueshme për Shqipëri, shkruan ai.
Analistë të ndryshëm të njohur thonë në komentet e tyre në rrjetet sociale se diplomatët amerikanë janë takuar me ata zyrtarë vendas që janë lidhje të ambasadores Yuri Kim, duke iu shmangur presidentit Ilir Meta. Ata theksuan se vizita dhe bisedimet kanë ndodhur një ditë para Kuvendit të Komisionit të Rithemelimit, i cili do të vulosë trashëgiminë e mbështetësve të liderit veteran demokrat Sali Berisha si Partia Demokratike e bashkuar.
/Argumentum.al
