Presidenti Meta mori pjesë sot (16.06) në Forumin e 9-të Global i Baku-s nën moton “Sfidat ndaj rendit global botëror”, Organizuar nga Qendra Ndërkombëtare Nizami Ganjavi nën patronazhin e Presidentit të Azerbajxhanit Ilham Aliyev.
Presidenti Ilir Meta u shpreh sot se “konflikti në Ukrainë dhe zhvillimet e fundit tregojnë se sa investim i mençur dhe vizionar ka qenë TAP”. Meta shprehu mirënjohjen për mbështetjen e dhënë nga Azerbajxhani, si dhe nga presidenti Aliyev për ndërtimin dhe zbatimin e suksesshëm të gazsjellësit TAP. Sipas tij, “rëndësia e këtij projekti shumëfishohet si burim alternativ energjie për rajonin dhe të gjithë Europën”.“Lufta në Ukrainë ndikoi në të gjithë botën për sa i përket stabilitetit, duke ndryshuar në veçanti mjedisin e sigurisë europiane dhe atë të NATO-s. Ky konflikt iu kujtoi të gjithëve se liria dhe sovraniteti nuk duhen marrë si të mirëqena! Ishte një rikujtesë se vendet tona nuk duhet të presin që të ndodhë kriza dhe pastaj të reagojnë kur ato shfaqen, por duhet të marrim masa parandaluese, duke rritur buxhetin e mbrojtjes, duke u përgatitur përpara dhe duke parashikuar çdo skenar të mundshëm dhe përballje me sfidat e ardhshme.
Lufta në Ukrainë prodhoi efektin e kundërt të asaj që priste Rusia. Nuk i ndau, por i bashkoi kombet tona”, tha Presidenti.
Sipas tij, “përgjigjja ishte një koalicion global, në mbështetje të popullit paqedashës dhe institucioneve demokratike të Ukrainës”.
“Ky peizazh i ri gjeopolitik e konsideron të nevojshme një qasje të re të BE-së dhe NATO-s për zgjerimin dhe sigurinë kolektive. Zgjerimi duhet të konsiderohet një instrument i fuqishëm gjeostrategjik. Sot, rreth 600 milionë europianë jetojnë vende të NATO-s, me aleancën që mbron rreth 93 % të popullsisë së Bashkimit Europian. Konflikti në Ukrainë ka rritur pamasë urgjencën e anëtarësimit të vendeve aspiruese për anëtarësim në NATO dhe Bashkimin Europian. Këto veprime do të parandalonin ndikimin e palëve të treta në disa rajone të pambrojtura”, shtoi ai.
Ndërkohë, Meta tha se “ne, në Ballkanin Perëndimor, jemi të shqetësuar për ndërhyrjen e përfaqësuesve rusë, të cilët synojnë të minojnë demokracinë dhe stabilitetin tonë”.
“Ideja e një Europe të lirë dhe paqësore nuk mund të jetë e plotë pa përfshirjen e shteteve të Ballkanit Perëndimor, që janë partnerë kryesorë dhe anëtarë integralë të familjes sonë të përbashkët europiane. Njohja e Republikës së Kosovës nga të gjitha shtetet anëtare të OKB-së, si dhe liberalizimi i vizave për qytetarët e Kosovës, do të kontribuonte shumë për paqen dhe stabilitetin në rajon tonë”, shtoi ai.
Meta tha se “në këto kohë sfidash për sigurinë, stabilitetin dhe paqen në Europë dhe në botë, Shqipëria, si vend i NATO-s dhe si anëtare jo e përhershme e Këshillit të Sigurimit të Organizatës së Kombeve të Bashkuara, është e vendosur në qëndrimet e saj, në koherencë me partnerët dhe aleatët tanë euroatlantikas, si në nivel europian, ashtu edhe në nivel global”.
Por sipas tij, “pasojat e luftës në Ukrainë kanë shkaktuar efekte valëzuese në mbarë botën në furnizimin me ushqime, sepse Ukraina dhe Rusia përbëjnë dy nga ‘shportat e bukës’ së planetit tonë, duke furnizuar botën me 30 % të grurit dhe 20 % të misrit”.
“Për momentin, çmimi i ushqimit është problemi numër një. Deri në vitin 2023 do të jetë shumë mirë një problem i disponueshmërisë së ushqimit, duke pasur parasysh se rreth 300 milionë njerëz në mbarë botën janë tashmë të pasigurt për sa i përket ushqyerjes, sipas Programit të Ushqimit Botëror. Të gjitha portet e Detit të Zi duhet të hapen dhe funksionojnë, përndryshe do të përballemi me një shpallje lufte ndaj sigurisë globale të ushqimit dhe kjo do të prodhonte uri, destabilizim dhe migrim masiv në mbarë botën. Qindra miliona njerëz në mbarë botën varen nga ushqimi që vjen përmes këtyre porteve”, tha ai.
Po ashtu, Meta tha se “përmirësimi i shëndetit publik global është një urgjencë, për të parandaluar çdo pandemi të mundshme në të ardhmen”.
“Nevojitet një koordinim më i mirë global për sistemet e paralajmërimit të hershëm dhe gjurmimin e transmetimit, ndarjen e vaksinave, ilaçeve dhe pajisjeve, zhvendosjen e produkteve dhe pajisjeve mjekësore me rëndësi jetike, si dhe për bashkëpunimin ndërshtetëror në fushën e kujdesit shëndetësor, gjithashtu edhe për kërkimin mjekësor dhe bioteknologjinë. Përparësia e Shqipërisë si anëtare e Këshillit të Sigurimit të OKB-së është të kontribuojë në forcimin e Organizatës Botërore të Shëndetit si autoriteti udhëheqës dhe drejtues për shëndetin global, duke qenë në qendër të arkitekturës globale të shëndetit”, tha ai.
Presidenti azer Ilham Aliyev u takua me Presidentin Meta: “Popujt e Shqipërisë dhe Azerbajxhanit janë popuj vëllezër“
Presidenti i Republikës së Azerbajxhanit Ilham Aliyev ka pritur në një takim Presidentin Meta.
Duke i uruar suksese të reja Presidentit Ilham Aliyev dhe popullit të Azerbajxhanit, Presidenti Meta falënderoi Presidentin e Azerbajxhanit për përfundimin me sukses të projektit TAP. Presidenti Ilir Meta i uroi Azerbajxhanit suksese në punimet e mëdha ndërtimore të kryera në territoret e çliruara. Duke vënë në dukje se popujt e Shqipërisë dhe Azerbajxhanit janë popuj vëllezër, Ilir Meta përshëndeti faktin se vitin e ardhshëm do të shënohet 30-vjetori i vendosjes së marrëdhënieve diplomatike mes dy vendeve.
Presidenti i Azerbajxhanit Ilham Aliyev falënderoi Presidentin e Shqipërisë Ilir Meta për pjesëmarrjen në Forumin e 9-të Global Baku. Kreu i shtetit vlerësoi si gjithmonë mbështetjen e Shqipërisë për integritetin territorial të Azerbajxhanit në luftën e dytë të Karabakut dhe theksoi se kjo tregon edhe një herë se Shqipëria është një vend mik dhe vëllazëror për Azerbajxhanin.
Duke vënë në dukje se shkalla e shkatërrimit në territoret e çliruara është shumë e madhe, presidenti Ilham Aliyev tha se gazetarë të huaj, politikanë dhe zyrtarë të tjerë e dëshmuan atë duke vizituar ato territore. Duke nënvizuar se Azerbajxhani po përballet me problemin e minave tokësore, kreu i shtetit theksoi se më shumë se 220 persona janë vrarë ose plagosur si pasojë e minave tokësore deri më tani.
Gjatë bisedës u bisedua për bashkëpunimin në ekonomi, tregti, energjetikë dhe fusha të tjera.
/Argumentum.al
