Danimarka, Franca dhe Gjermania po bëjnë thirrje për qendra të jashtme për të përpunuar kërkesat për azil dhe për të lehtësuar dëbimin e emigrantëve të paligjshëm në Evropë, ashtu siç po përpiqet të bëjë Italia me qendrat në Shqipëri, shkruan e përditshmja italiane “Il Giornale”.
Takimi joformal i Këshillit të Çështjeve të Brendshme të BE-së në Kopenhagë është një nga ngjarjet e para të presidencës së Danimarkës në Këshillit Evropian dhe një mundësi për ministrat e Brendshëm për të adresuar çështjen e emigracionit dhe, në veçanti, të riatdhesimit.
“Njerëzit që vijnë nga jashtë, kryejnë krime të rënda dhe nuk respektojnë mënyrën tonë të jetesës nuk kanë vend në Evropë dhe duhet të dëbohen”, tha kryeministrja daneze, Mette Frederiksen kur mori detyrën.
Ministri i Brendshëm dhe i Strehimit i Danimarkës, Kaare Dybvad Bek, ndërsa mbërriti në takim – përsëriti se sistemi evropian i azilit ishte në krizë.
“Ne kemi nevojë për zgjidhje inovative”, tha ai.
“Presioni intensiv mbi kufijtë lindorë dhe jugorë kërkon zgjidhje të reja për të riatdhesuar njerëzit më shpejt. Ne duhet të gjejmë zgjidhje inovative dhe marrëveshje të reja me vendet jashtë Bashkimit Evropian”, shtoi ai.
Pakti Itali-Shqipëri po lëviz pikërisht në këtë drejtim, dhe pavarësisht kundërshtimit të fortë në vend nga qeveria dhe opozita gjyqësore – po tërheq interes të madh në vendet që kërkojnë ta aplikojnë atë jashtë Italisë – pasi konsiderohet sistemi më i mirë aktual për të filluar zgjidhjen e problemit, megjithëse me disa modifikime formale.
Ajo që Kaare Dybvad Bek e përshkroi si CPR të kontraktuara jashtë vendit, është ajo që Italia do të donte që qendrat në Shqipëri të bëheshin.
Ministri danez theksoi gjithashtu se nëse produkti i shitur nga trafikantët – qasja në Evropë – zhvlerësohet, duke e bërë të pamundur mbërritjen e tyre, do të ishte shumë më e vështirë për ta që të transferonin njerëzit.
Dhe kjo mund të arrihej duke zbatuar riatdhesime të shpejta, duke siguruar që njerëzit pa qëndrim të ligjshëm të ktheheshin në vendin e tyre të origjinës, dhe gjithashtu duke përpunuar kërkesat për azil jashtë Bashkimit Evropian.
“Në Gjermani, ka 300 000 njerëz që jetojnë në vend të cilëve u është refuzuar statusi i azilkërkuesit, dhe këta njerëz duhet të riatdhesohen”, shtoi ministri Kaare Dybvad Bek.
“Qendrat e pritjes në Shqipëri dhe propozimi për Ruandën kanë të bëjnë me përpunimin e kërkesave për azil. Dhe mendoj se ka shembuj të shkëlqyer të kontraktimit jashtë vendit dhe marrëveshjeve individuale, por padyshim që duhet të krijojmë modelin tonë evropian për këto zgjidhje”, tha ai.
Ministri i Brendshëm gjerman, Alexander Dobrindt përsëriti mbështetjen e tij për qendrat e riatdhesimit.
“Ne e konsiderojmë këtë një qasje inovative absolutisht të nevojshme që kërkon bashkëpunimin e vendeve partnere”, tha ai.
“Marrëveshjet e këtij lloji, si ajo italo-shqiptare, janë shumë të vështira për t’u zbatuar nga shtetet anëtare individuale, dhe ne e kemi parë tashmë këtë në disa raste në të kaluarën”, shtoi Dobrindt.
“Megjithatë, ekziston edhe mundësia e kontrollit të situatës në nivel evropian – për të patur një mundësi zbatimi dukshëm më të mirë”, tha ai.
Ministri i Brendshëm francez, Bruno Reitailleau gjithashtu konfirmoi mbështetjen e tij.
“Franca ka pengesa kushtetuese, por ne nuk kemi asnjë në lidhje me qendrat e riatdhesimit. Dhe unë mbështes çdo gjë që i bën riatdhesimet më efektive”, tha ai./ata
