Ish-Ministri i Mjedisit, Planifikimit Hapësinor dhe Infrastrukturës në Qeverinë e Kosovës, Liburn Aliu, është emëruar drejtor i ri i Portit të Durrësit.
Ceremonia e prezantimit është mbajtur sot me pjesëmarrjen e zv.kryeministres dhe ministres së Infrastrukturës dhe Energjisë të Shqipërisë, Belinda Balluku dhe zyrtarëve të tjerë.
Në fjalën e saj në aktivitetin e prezantimit, Balluku u shpreh se Porti i Durrësit nuk do t’i shërbejë vetëm Shqipërisë, por do t’i shërbejë edhe Kosovës dhe Maqedonisë së Veriut.
“Ne kemi nisur prej kohësh një plan zhvillimi të një porti të ri, në afërsi të Durrësit, duke qenë se lokacioni është strategjik, duke qenë se Durrësi është një pikë referimi për të gjithë rajonin. Porti i Durrësit për ne ka qenë një prioritet. Porti i ri i Durrësit parashikohet dhe është në vullnetin politik të qeverisë shqiptare që të jetë edhe një bazë e NATO-s, një bazë e NATO-s e vendosur në zemër të Mesdheut”, tha Balluku.
Ajo theksoi se Aliu, Kosovën dhe Shqipërinë i ka parë gjithmonë si një treg i përbashkët i zhvillimit ekonomik dhe infrastrukturor.
Aliu u shpreh se Porti i Durrësit është port i të gjithë shqiptarëve dhe është port i rajonit.
“Jam i nderuar nga Qeveria e Republikës së Shqipërisë për një detyrë që më është dhënë, që më është besuar dhe që është mjaft sfiduese”, tha Aliu.
Liburn Aliu zëvendëson në postin e ri, drejtorin e deritanishëm të Portit të Durrësit, Kreshnik Bajraktari.
Dorëheqja e Liburn Aliut: Akt parimor apo lëvizje politike kundër Vetëvendosjes dhe Qeverisë Kurti?
Kujtojmë se në gusht të këtij viti, Aliu dorëzoi dorëheqjen e tij nga posti i ministrit në detyrë të Mjedisit, Planifikimit Hapësinor dhe Infrastrukturës, në Qeverinë e Kosovës të drejtuar nga kryeministri në detyrë, Albin Kurti.
Dorëheqja e Liburn Aliut nga posti i Ministrit të Mjedisit, Planifikimit Hapësinor dhe Infrastrukturës në Kosovë, më 27 gusht 2025, u paraqit fillimisht si një reagim ndaj zgjedhjes së Dimal Bashës si kryetar i Kuvendit të Kosovës. Në postimin e tij publik në rrjetet sociale, Aliu theksoi se vendimi ishte rezultat i mosdakordësisë me frymën që po përfaqësonte institucioni më i lartë i vendit, duke e përshkruar këtë si një akt që nuk përputhej me “idealın për Republikën”.
“Dorëheqja ime vjen pas zgjedhjes së djeshme të kryetarit të Kuvendit. Konsideroj që zgjedhja e djeshme nuk është në frymën e atij ideali për Republikën që ka qenë dhe mbetet arsye angazhimi për mua,” kishte shkruar ai.
Megjithatë, ky veprim mund të shihet edhe si një lëvizje me prapavijë politike. Kjo tregon, në fakt, se Liburn Aliu vetëm sa e shfrytëzoi atë moment për të goditur politikisht partinë Vetëvendosje dhe qeverinë Kurti. Ndërkohë, ai prej kohësh kishte filluar të tejkalonte kufijtë politikë të Kosovës, dhe tashmë ai është në krye të një prej portave më të rëndësishme dhe më strategjike në Ballkan.
Në këtë dritë, dorëheqja e tij nuk ishte thjesht një akt personal parimor, por një sinjal politik që reflektonte tensionet e brendshme në Vetëvendosje dhe pozicionimin e tij në skenën më të gjerë rajonale.
/Argumentum.al
