Presidenti i 42-të i Shteteve të Bashkuara të Amerikës, Bill Clinton ka mbërritur në Shqipëri, ku është pritur nga kryeministri Edi Rama.
Avioni me të cilin udhëtonte ish-presidenti Clinton, ka zbritur në aeroportin e Rinasit “Nënë Tereza” rreth orës 15:30. Në pistën e aeroportit në një pritje të veçantë ishte kryeministri Rama që i dha mirëseardhjen.
“Rinas – Me presidentin Bill Clinton, mikun e përjetshëm të kombit shqiptar, i cili sapo shkeli për herë të parë në Shqipëri”, shkruan Rama, ndërsa ndan dhe një foto të takimit me Clinton në rrjetet sociale.
“Jeni të mirëpritur të gjithë tek Kryeministria, sot në 18:30 për ceremoninë e mikpritjes së Presidentit Clinton dhe adresimin e tij për të gjithë shqiptarët”, përfundon ftesën e tij për qytetarët kryeministri Rama.
Pas pritjes, Clinton dhe eskorta e tij lanë aeroportin e Rinasit për t’u nisur drejt Tiranës.
Ambasada e Shteteve të Bashkuara të Amerikës në Tiranë i ka uruar mirëseardhjen në Shqipëri, presidentit të 42-të të Shteteve të Bashkuara të Amerikës, Bill Clinton, i cili po viziton për herë të parë Shqipërinë.
Clinton do të qëndrojë për dy ditë në Shqipëri me ftesë të kryeministrit, Edi Rama.
Ambasada thotë se, kjo vizitë e ish-presidentit Clinton është një moment domethënës dhe që dëshmon qartësisht miqësinë e qëndrueshme të dy vendeve tona.
“Mirësevjen në Tiranë Presidenti Clinton! Vizita e parë e ish-Presidentit në Shqipëri është një moment domethënës në miqësinë e qëndrueshme mes vendeve tona”, shkruan ambasada e SHBA.
Presidenti i Republikës, Bajram Begaj i ka uruar sot mirëseardhjen në Shqipëri, presidentit të 42-të të Shteteve të Bashkuara të Amerikës, Bill Clinton, i cili po viziton për herë të parë Shqipërinë.
“Mirësevjen në Tiranë Presidenti Clinton! Shqipëria dhe shqiptarët ju janë përjetë mirënjohës për gjithçka që keni bërë për kombin tonë e në veçanti për Kosovën”, shprehet Begaj.
“Vendimmarrja dhe lidershipi juaj në ditët më vendimtare për të ardhmen e Kosovës ju kanë vendosur në piedestalin e miqve tanë më të shtrenjtë. Ju faleminderit nga zemra!”, thekson Begaj në mesazhin e tij.
/Argumentum.al
