Rregullatori i hapësirës kibernetike i Kinës publikoi të shtunën projektrregulloren për mbledhjen dhe përdorimin e informacionit personal nga aplikacionet e internetit, duke kërkuar mendime nga publiku.
Projekti, i formuluar nga Administrata Kibernetike e Kinës, synon të mbrojë të drejtat dhe interesat e informacionit personal dhe të sigurojë përdorimin e duhur të të dhënave personale.
Sipas këtij dokumenti, mbledhja dhe përdorimi i informacionit personal duhet të kufizohet në mënyrë të rreptë në atë që është e nevojshme për ofrimin e produkteve ose shërbimeve dhe nuk duhet të tejkalojë sferën e kërkuar.
Ai gjithashtu thotë se aplikacionet e internetit duhet t’i informojnë qartë që në fillim përdoruesit për rregullat mbi mbledhjen dhe përdorimin e informacionit personal nëpërmjet mjeteve të dukshme, siç janë njoftimet e menjëhershme, dhe të marrin pëlqimin e qartë të përdoruesve.
Për më tepër, projektrregullorja kërkon që aplikacionet e internetit të mos mbledhin ose përdorin informacionin personal të individëve të tjerë përveç përdoruesit, duke hyrë në librat e adresave, regjistrat e thirrjeve ose lejet e SMS-ve, përveç rasteve kur kjo është e nevojshme për qëllime komunikimi, shtimin e kontakteve ose ruajtjen e të dhënave./cgtn
