Kina ka njoftuar Organizatën Botërore të Tregtisë (OBT) për zgjerimin e politikës së saj për tarifa zero për vendet më pak të zhvilluara (LDC) që mbajnë marrëdhënie diplomatike me Kinën, duke rritur mbulimin e produkteve nga 98 për qind në 100 për qind, shkruan “Xinhua”.
Politika e re, e cila hyri në fuqi më 1 dhjetor 2024, është pjesë e përpjekjeve më të gjera të Kinës për t’u hapur më tej ndaj vendeve më pak të zhvilluara dhe kombeve afrikane, bëri të ditur delegacioni kinez në një takim të OBT-së në Gjenevë. Delegacioni gjithashtu informoi anëtarët e OBT-së mbi një deklaratë të kohëve të fundit Kinë-Afrikë, në të cilën Kina shprehu gatishmërinë për të zgjeruar politikën me tarifa zero për të mbuluar 100 për qind të linjave tarifore për të gjitha 53 vendet afrikane që kanë lidhje diplomatike me Kinën.
Përveç kësaj nisme, Kina premtoi hapa të mëtejshëm për të promovuar tregtinë e mallrave dhe për të forcuar aftësitë dhe programet e trajnimit teknik për vendet më pak të zhvilluara afrikane.
Sipas delegacionit, këto masa synojnë të krijojnë mundësi të reja zhvillimi dhe vrull rritjeje për vendet afrikane dhe vendet më pak të zhvilluara, ndërkohë që kontribuojnë gjithashtu në stabilitetin dhe vrullin pozitiv të tregtisë globale.
Kina u bëri thirrje anëtarëve të OBT-së që të mbështesin së bashku një rend ekonomik dhe tregtar ndërkombëtar të lirë dhe të hapur, si dhe të promovojnë globalizimin gjithëpërfshirës dhe universalisht të dobishëm.
Masat e Kinës u mirëpritën gjerësisht nga anëtarët e OBT-së. Përfaqësuesit nga vendet më pak të zhvilluara, vendet afrikane dhe ekonomitë e tjera shprehën vlerësim, duke theksuar sfidat dhe pasiguritë e papara me të cilat përballen vendet në zhvillim. Ata u kërkuan më shumë anëtarëve të ndjekin shembullin e Kinës duke ofruar politika të synuara preferenciale, ndihmë për ndërtimin e kapaciteteve dhe mbështetje të tjera për vendet më pak të zhvilluara për të çuar përpara zhvillimin gjithëpërfshirës dhe të qëndrueshëm të tregtisë globale./cgtn
