Ministri i Jashtëm i Kinës Wang Yi bëri thirrje të martën për mbrojtjen me vendosmëri të fitores së arritur me sakrifica në Luftën e Dytë Botërore, si edhe për ruajtjen e paqes dhe qëndrueshmërisë të siguruara me mund.
Wang, gjithashtu anëtar i Byrosë Politike të Komitetit Qendror të Partisë Komuniste të Kinës, i bëri këto komente gjatë një fjalimi në një simpozium mbi situatën ndërkombëtare dhe marrëdhëniet e jashtme të Kinës në vitin 2025.
Duke vënë në dukje që sivjet është 80-vjetori i fitores së Luftës së Rezistencës të Popullit Kinez kundër Agresionit Japonez dhe Luftës Antifashiste Botërore, Wang tha se 2025-a është një vit i veçantë për popujt në mbarë botën që të nxjerrin mësime nga historia dhe të kërkojnë së bashku paqen e zhvillimin.
Megjithatë Japonia, vendi që nisi luftën e agresionit kundër Kinës, nuk ka arritur të reflektojë thellë mbi krimet e veta dhe udhëheqësit e saj aktualë madje sfidojnë hapur sovranitetin territorial të Kinës, përfundimet historike të Luftës së Dytë Botërore dhe rendin ndërkombëtar të pasluftës, tha Wang.
Ai theksoi që lëvizje të tilla janë absolutisht të papranueshme për të gjitha kombet paqedashëse dhe për të gjithë njerëzit që nuk dëshirojnë ta shohin historinë të përsëritet.
“Ne duhet të mbetemi shumë vigjilentë kundër ringjalljes së militarizmit japonez,” vuri në dukje kryediplomati kinez.
Një numër gjithnjë e në rritje vendesh po qëndrojnë përkrah Kinës, duke ripohuar angazhimin e tyre ndaj parimit të “një Kine”, duke pranuar që Tajvani është një pjesë e pandashme territoriale e Kinës dhe duke kundërshtuar çdo lëvizje separatiste të “pavarësisë së Tajvanit”, tha Wang./cgtn
