Kryeministri i Spanjës, Pedro Sanchez, ka nisur vizitën zyrtare në Tiranë, ku është pritur me ceremoni nga kreu i qeverisë shqiptare Edi Rama.
Pas përshëndetjes, dy liderët ndoqën ceremoninë zyrtare dhe u drejtuan për në ambientet e brendshme të Kryeministrisë.
Vizita e kryeministrit spanjoll në Shqipëri vjen në kuadër të turneu që Pedro Sanchez po zhvillon në Ballkanin Perëndimor, që përfshin Serbinë, Malin e Zi, Bosnje Hercegovinën, Maqedoninë Veriut dhe Shqipërinë.
Kryeministri Edi Rama deklaroi sot në një konferencë të përbashkët për shtyp me Kryeministrin e Spanjës, Pedro Sánchez, se po shohim një rritje të turistëve dhe sipërmarrjeve spanjolle në Shqipëri.
Në këtë drejtim, kryeministri solli në vëmendje marrëveshjet e nënshkruara me “Melia Group” dhe Iberostar në fushën e hotelerisë, si dhe marrëveshjen e nënshkruar së fundi në Madrid në fushën e energjisë.
“Spanja është një model në Evropë për energjinë e rinovueshme. Kryeministri Sanchez ka udhëhequr një proces të jashtëzakonshëm investimesh dhe transformimi dhe në këtë drejtim ne kemi shumë për të mësuar. Ne kemi ambicien njësoj si Spanja që në një kohë të arsyeshme të bëhemi eksportues neto i energjisë”, shtoi ai.
Rama theksoi po ashtu se kjo është vizita e parë e një kryeministri të një vendi të BE-së, pas hapit historik të çeljes së negociatave për anëtarësim.
“Na vjen jashtëzakonisht mirë për mbështetjen pa rezervë të Spanjës në këtë proces. Kujtoj se Spanja kishte një pozicion disi më të ngrirë se të tjerët duke qenë më kërkuese dhe fakti që sot Spanja është tërësisht e angazhuar në mbështetje të këtij procesi dhe ka qenë një nga aktorët më të zëshëm për të çelur negociatat me Shqipërinë dhe Maqedoninë e Veriut është edhe konfirmim i faktit se ne folëm me gjuhën e rezultateve konkrete, që morën vlerësimin e të gjithëve”, tha Rama.
Kryeministri i Spanjës Pedro Sanchez deklaroi sot se nuk mund të konceptohet BE pa Ballkanin Perëndimor.
Pas takimit me kryeministrin Edi Rama, në konferencën e përbashkët për mediet Sanchez falënderoi qeverinë dhe shqiptarët për pritjen dhe vlerësoi kryeministrin Rama si një mik të madh dhe si një nga politikanët më të shkëlqyer.
“E vlerësoj kryeministrin Rama, jo vetëm nga mënyra se si shprehet por për të gjithë angazhimet e tij evropiane dhe sigurisht për formën me të cilën vepron dhe bënë politik të cilat janë hapa shumë të rëndësishëm të Shqipërisë në plan ndërkombëtar. Dua të kujtoj se më pak se një vit ne jemi takuar me kryeministrin Rama në Madrid, që ishte hera e parë e kryeministrit shqiptarë në Spanjë dhe tani është hera e parë e kryeministrit spanjoll në Shqipëri”, tha ai.
Sanchez tha se, lufta në Ukrainë nuk do t’i ndryshojë kurrë vlerat evropiane që na bashkojnë.
“Në këtë udhëtim në Shqipëri, unë dua të nënvizoj se duhet të japim një shembull të qartë të plotë për rëndësinë që ka Ballkani Perëndimor, jo vetë për t’u gjendur larg dhe nuk jemi shumë afër Ballkanit, por objektivat na bashkojnë dhe unë e përkrah dëshirën dhe vullnetin europeiste të këtyre vendeve. Unë uroj që kjo rrugë apasionante që ka nisur Shqipëria drejt BE-së me në krye Edi Ramën të jetë e suksesshme. Nuk mund të konceptohet BE pa Ballkanin Perëndimor. Prandaj unë mendoj se është një ide pozitive që përveç procesit të aderimit dhe për marrëveshjet që bëjnë me çdo vend është e mirë për të krijuar këtë komunitet politikë evropian. Pse? Sepse do të kemi mundësi të flasim për shumë tema për të vendosur këtë marrëdhënie në në nivel më të lartë politik midis shteteve dhe të shefave të qeverive në formate më fleksibël. Ne nga qeveria e Spanjës shohim me shumë interes këtë dinamikë pozitive që mund të gjenerohet mes vendeve që bëjnë pjesë në BE dhe atyre që duan të futen në BE. Pra me formate shumë më fleksible që ne të kemi mundësi të flasim jo për çështje specifike të rajonit në Ballkan, por dhe çështje politike të përgjithshme. Për shembull pandemia para dy vitesh, apo tani kriza energjetike për rrjedhojë e luftës së Ukrainës”, tha ai.
Takimi me Kreun e Shtetit
Presidenti Bajram Begaj priti sot në një takim kryeministrin e Spanjës, Pedro Sánchez, i cili po zhvillon një vizitë zyrtare në Shqipëri.
Presidenti Begaj shprehu keqardhje dhe solidaritet me popullin dhe qeverinë spanjolle për dëmet e mëdha që vala e të nxehtit dhe zjarret masive kanë shkaktuar në Spanjë.
Kreu i shtetit vlerësoi mbështetjen e vazhdueshme dhe të pakursyer që Spanja i ka dhënë Shqipërisë në kuadër të procesit të integrimit evropian.
“Jam besimplotë se gjatë Presidencës spanjolle të Bashkimit Evropian, në 6-mujorin e dytë të vitit të ardhshëm, mbështetja e kryeministrit Sanchez dhe e qeverisë së Spanjës do të jetë shumë domethënëse për procesin e negociatave të aderimit të Shqipërisë në BE”, nënvizoi Presidenti Begaj.
Në mënyrë të veçantë, Presidenti u ndal në situatën e tensionuar në veri të Kosovës, ku përshëndeti autoritetet e Kosovës për maturinë e treguar, që në bashkëpunim dhe koordinim të ngushtë me partnerët ndërkombëtarë shmangën një provokim të rëndë për stabilitetin e Kosovës, veçanërisht në këtë situatë të ngarkuar me kërcënime e rreziqe të mëdha e të shtuara, për paqen dhe sigurinë për rajonin tonë pas agresionit rus në Ukrainë.
“Kosova tashmë është një realitet i pakthyeshëm politik, kontribues për paqen dhe stabilitetin në rajon dhe i konfirmuar jo vetëm nga mbi gjysma e vendeve anëtare të Kombeve të Bashkuara që e kanë njohur atë, por edhe nga Gjykata Ndërkombëtare e Drejtësisë në Hagë, 11 vjet më parë”, u shpreh Kreu i Shtetit, duke iu referuar anëtarësimit të Kosovës në organizatat ndërkombëtare.
/Argumentum.al
