Kryeministrja finlandeze në Tiranë: Mbështesim Shqipërinë për anëtarësimin në BE

Kryeministrja e Finlandës, Sanna Marin deklaroi sot se, përparësi e Finlandës është të nisë negociatat për anëtarësim me Maqedoninë e Veriut dhe Shqipërinë pa asnjë vonesë.

Në një deklaratë të përbashkët për shtyp me kryeministrin Edi Rama në Tiranë, Marin u shpreh se, “si Shqipëria, dhe Finlanda janë aktive dhe konstruktive si anëtare të bashkësisë ndërkombëtare. Shqipëria dhe Finlanda kanë tashmë një marrëdhënie mjaft të mirë që daton qysh në 1956-ën, kur Evropa dukej ndryshe”.

“Tashmë po punojmë fort për ta avancuar integrimin evropian dhe për ta bërë komunitetin euroatlantik më të fortë”, theksoi Marin.

“Çka është më e rëndësishme jemi së bashku për të ndihmuar Ukrainën dhe në përpjekje për ta ndalur Rusinë në luftën e saj mizore kundër mikut tonë. Agresioni i Rusisë në Ukrainë e ka ndryshuar për breza të tërë mjedisin tonë të sigurisë. Finlanda dhe Suedia kanë paraqitur kërkesë për në NATO, ku Shqipëria është një anëtare e rëndësishme dhe aktive”, tha Marin.

“Një shumicë mbizotëruese e finlandezëve e mbështesin anëtarësimin në NATO. Së paku 188 nga 200 parlamentarë votuan pro anëtarësimit në NATO, kërkesës për të”, u shpreh Marin.

Marin falënderoi Shqipërinë, për mbështetjen e fortë dhe të qartë për kërkesën e Finlandës për anëtarësim në NATO.

“Shqipëria është një mbështetje e vendosur e politikës së dyerve të hapura të NATO-s, qoftë në parim, ashtu dhe në praktikë. Zëri juaj dërgon mesazh të rëndësishëm për Rusinë dhe për regjime të tjera autoritare”, u shpreh Marin.

“Ndërkohë që Rusia vazhdon luftën e saj mizore kundër Ukrainës, është shumë e rëndësishme të deklarojmë fort dhe qartë se jemi të bashkuar dhe se nuk ka vend për logjikën e Rusisë për influencë në Evropën e sotme. Besojmë që ky do të jetë mesazhi më i rëndësishëm nga Samiti i NATO-s në Madrid në fund të këtij muaji”, theksoi Marin.

“Finlanda dhe Suedia do ta bëjnë të gjithë Aleancën më të fortë, siç ju e dini nga bashkëpunimi ynë i ngushtë në kuadër të Kombeve të Bashkuara, nga pjesëmarrja jonë në menaxhimin ndërkombëtar të krizave dhe nga roli i presidentit Ahtisari në ndërmjetësimin për paqe”, tha Marin.

Ne, shtoi kryeministrja e Finlandës, “jemi ofrues sigurie për më tej sesa Evropa veriore. Na duhet të intensifikojmë mbështetjen ndaj Ukrainës dhe sanksionet kundër Rusisë dhe të jemi të bashkuar. Kjo është e vetmja mënyrë që ta bëjmë Rusinë të ndalë luftën e saj”.

“Shqipëria dhe BE-ja kanë bashkëpunuar plotësisht për sanksionet kundër Rusisë dhe është jetike që BE dhe Ballkani Perëndimor të jenë në harmoni të plotë me njëri-tjetrin dhe të bashkuar”, tha Marin.

“Finlanda është një mbështetëse afatgjatë dhe e fortë e zgjerimit të BE-së. Ne duam të shohim të gjitha vendet e Ballkanit Perëndimor të anëtarësohen në BE pasi të kenë përmbushur kriteret. Përparësia jonë është të nisim negociatat për anëtarësim me Maqedoninë e Veriut dhe Shqipërinë pa asnjë vonesë. Duam të mbështesim Shqipërinë për anëtarësimin e saj në BE”, theksoi Marin.

Marin nënvizoi se, “Shqipëria ka një zë të fortë edhe globalisht. Ne e vlerësojmë fort rolin tuaj kur bëhet fjalë për përfaqësimet në forumet ndërkombëtare”.

“Dua t’Ju përgëzoj për punën e suksesshme në Kombet e Bashkuara, Këshillin e Sigurimit. Jemi të kënaqur të dimë që po promovoni po kështu dhe barazinë gjinore dhe rolin e të drejtat e grave dhe vajzave”, u shpreh ajo.

“Anëtarësimi ynë në NATO do të nënkuptojë shumë për marrëdhënien tonë. Nuk ka marrëdhënie më të thellë midis kombeve përveç se duke qenë aleatë”, theksoi Marin.

“Pata gjithashtu mundësi në këtë vizitë të diskutoj dimensione të tjera të marrëdhënies sonë, ndërkohë që kemi këtë moment në kohë, na duhet të punojmë për tranzicionin e gjelbër, teknologjitë e reja, për nxitjen e tregtisë dhe investimet. Ka shumë potencial edhe kur vjen fjala për marrëdhëniet midis Finlandës dhe Shqipërisë”, përfundoi kryeministrja e Finlandës, Sanna Marin.