LSI bëhet 'Partia e Lirisë'!

Konventa Kombëtare e LSI vendosi sot ndryshimin e emrit të partisë nga Lëvizja Socialiste për Integrim në Partia e Lirisë.

Koventa e LSI vendosi disa ndryshime në Statut, teksa kryetarja e LSI, Monika Kryemadhi dha dorëheqjen dhe partinë tashmë do ta drejtojë Komiteti Organizator. Drejtuesi i Komitetit Organizator do të jetë Ilir Meta dhe zëvendëskryetar do të jetë Agim Nesho.

Sekretari i përgjithshëm i LSI-së, Endrit Braimllari u shpreh se, “bazuar mbi këto ndryshime statutore, dhe në mënyrë të veçantë në reflektim të situatës shumë të rëndë që po përjeton vendi, e që na ngarkon me përgjegjësi shumë herë më të mëdha se deri më tani, kam privilegjin të paraqes Konventës, propozimin e një grupi anëtarësh të Konventës, për ndryshimin e emrit të partisë nga Lëvizja Socialiste për Integrim në Partia e Lirisë”.

“I propozoj gjithashtu Konventës Kombëtare, pas paraqitjes edhe të dorëheqjes të kryetares së LSI, Monika Kryemadhi si dhe në kushtet ku të gjitha strukturat e tjera drejtuese janë me mandat të përfunduar, krijimin e Komitetit Organizator, me këto detyra: Komiteti Organizator, ngarkohet nga Konventa Kombëtare, për drejtimin e partisë dhe përfaqësimit të saj në të gjitha nivelet”, u shpreh ai.

Ai theksoi se, Komiteti Organizator do të drejtojë veprimtarinë e partisë për përgatitjen e Konventës Kombëtare, që do të mbahet brenda dy muajve.

Drejtuesi i Komitetit Organizator të jetë zoti Ilir Meta dhe zëvendëskryetar të jetë zoti Agim Nesho. Këto ndryshime hyjnë në fuqi menjëherë”, theksoi Brahimllari.

Në fjalën e tij në Konventën e LSI Ilir Meta tha se, “ky është një vend me të cilin askush nuk mund të luajë. Kemi vetëm një rrugë dhe kjo rrugë është referendumi. Referendumi do të jetë shpata e Demokleut mbi të gjithë uzurpatorët, mbi oligarkët e pangopur. Do të jetë garancia se sovraniteti nuk i përket popullit vetëm në letër”.

“Prandaj e di që ju që jeni këtu keni dhimbje, keni nostalgji për LSI-në, por nuk besoj se keni më shumë se unë, edhe mund të keni. Ne e krijuam LSI-në për të shpëtuar procesin e integrimit europian që e bllokoi Fatos Nano, për hajdutërinë e tij në dogana. Ishte ai rotacion falë LSI-së që Shqipëria nënshkroi marrëveshjen e asociim-stabilizimit në 2006”, theksoi Meta.

“LSI bëri çdo gjë dhe për statusin dhe për marrjen e rekomandimit, por e dini se ku jemi. Tani ka vetëm një rrugë, referendumi është garancia që Shqipëria do jetë e shqiptarëve. Keni parë se si shiten e blihen politikanët, por nuk ka forcë në botë që t’i blejë 3 milionë shqiptarë. Mos harroni atdheun, fëmijët tuaj dhe fëmijët tanë mund të gjejnë çdo gjë jashtë. Atdhe nuk gjejnë dot, atdheu është vetëm këtu”, tha Meta.

“Prandaj ju ftoj nga partia e LSI-së në Partinë e Lirisë, në partinë e sovranitetit, në partinë e referendumit. Do të matemi shumë shpejt, partia e patronazhistëve dhe Dushan Mugoshës, Partia e Lirisë dhe e gjithë shqiptarëve. Rroftë Shqipëria e lirë dhe demokratike! Rroftë Kosova, shtet i pavarur, lavdi kombit tonë! Mirënjohje të gjithë atyre që themeluan LSI-në”, deklaroi Meta.