Ekskluzivisht për ARGUMENTUM
Nga Genc MLLOJA
“Kreditet për Bashën janë konfirmuar tashmë nga një segment përtej demokratëve. Jo më larg se pak minuta më parë (17 mars 2020 në mbrëmje), kur këtë e tha hapur edhe gazetarja Ilva Tare, pas intervistës që i mori”.
Ky është paragrafi mbyllës i një komenti të një analisti në një gazete të perditeshme lokale ku shpaloseshin prognoza për përballjen për pushtet midis kryeministrit aktual Rama dhe kreut të PD Basha shpesh herë i deklaruar tashmë nga media e rrjetet sociale pro tij si ‘kryeministri’ në ardhje.
E gjithë kjo po ndodh kur Shqipëria është gjunjëzuar përballë virusit Covid-19 dhe qytetarët te shokuar në karantinë po përballen me te panjohurat e frikshme se çfarë do të ndodhë të nesërmen me ta dhe familjet e tyre.
Siç ka thënë këto ditë një diplomat perëndimor në mënyre figurative ky virus sikur thotë ‘une e di se ku je…’.
Në fakt virusi Covid -19 pas Kinës prej ku filloi epidemia e kthyer tashmë në pandemi botërore po vret mizorisht në Italinë që e kemi në derë dhe vende të tjera europiane përfshi anëtarët e Bashkimit Europian. Tashmë ai është dukshëm edhe në Shqipëri, është përhapur në pjeset më të populluara të vendit, kryesisht Tiranë dhe Durrës, dhe nuk dihet saktësisht sa vrastar do të jetë sepse sapo ka nisur ofensiven e tij në mes shqiptarëve.
Specialistët janë dukshëm të alarmuar dhe tashmë nuk ua fshehin njerëzeve skenaret e priteshme duke patur parasysh se të gjithë e njohin kapacitetin mjeran të sistemit shëndetësor në Shqipëri përballë këtij cunami të padukshëm por shumë të rrezikshëm si dhe për ti sensibilizuar ata që të bëjnë kujdes .
E pikërisht kur jetë njerëzish janë në rrezik të paparashikuar e bëhen prognoza të errta nga specialistet e mjekësisë, skena politike shqiptare vazhdon të ndjeke trajektoren e vet të pandryshueshme: luftë të paepur për pushtet…
‘Kreditet për Bashen janë konfirmuar’, thonë idhtarët e kreut të PD-së i cili në krye të 10 protestave më 2019 nuk mundi t’ia heq karrigen kryeministrit aktual. Përkundrazi Rama e pasuesit e tij vazhdojnë vazhdimin.
A mos ndoshta Basha me Covid-19 ëndërron të arrije atë çfarë nuk beri dot me protestat nën përbetimin: ‘Rama ik’?
Ka gjasa që Rama nuk ik as në kohen e Covidit; e ka mbledhur mendjen top të bëjë çfarë ti shkrepet me këtë popull deri në fund.
Por e keqja e më e dhimbshme dhe reale është se mos ‘ikin’ njerëz të pambrojtur prej kësaj murtaje.
E pastaj u rrofshin ‘kreditet’ si Ramës ashtu edhe Bashës- të parit për luften e verbër deri në marrëzi duke e kthyer pushtetin e tij gati absolut në këtë kohë murtaje, dhe tjetrit për abuzimin me krizën Covid-19 që të ulet në karrigen e kryeministrit!
Dua të theksoj se është shumë e drejte që opozita, i gjithë opinioni publik të ngreje zërin që punët të bëhen sa më mirë dhe me efikasitet nga qeveria në këtë kohë krize dhe nuk kanë munguar mendime tepër konstruktive, që populli i thjeshtë i vlerëson e i mbështet. Shikohet se si përpihen mendimet e specialistëve edhe kur tregojnë të vertetën e hidhur të krijuar nga ky virus, por shumë syresh me vetinë shëruese të mjekut shpërndajnë edhe shprese e optimizëm,çka na nevojitet, na bën të shikojmë dritë në fund të tunelit.
“FILLIMI I MBARË shënon edhe gjysmën e punës… Negativizimi dhe pragshërimi i plotë i të sëmurit të parë me Covid-19, shënon një SUKSES të merituar të ekipit të Shërbimit të Sëmundjeve Infektive,” shkruante specialisti i mirenjohur i mjekesise Isuf Kalo te merkuren. “Durimi, Guximi dhe Këmbëngulja e të gjithëve NE, por edhe e të gjithë kolegëve në QSUT si dhe në ngrehinat e tjera të Shëndetit Publik të paracaktuara për ndjekjen e të sëmurëve me Covid-19, do të na nxjerë PATJETËR faqebardhë në këtë betejë për triumfin e JETËS!!!” e mbyll mesazhin Z. Kalo, që transmeton ngadhnjimin mbi vdekjen.
Mirë do të ishte që gjithëkush me mundësitë e veta komunikuese të përçoje sa më shumë pozitivitet, shpresë dhe kurajo. Të bësh sugjerime, të mos jesh dakort me qeverinë e ta kritikosh publikisht për shumë gjëra që nuk bëhen si duhet janë dicka normale në demokraci. Por politizimi i cdo gjëje- ky Covid që mbart klasa politike shqiptare, veç të këqija sjell si tension, coroditje, panik e nervozizëm konfrontues social, veçanërisht tani.
Kursejani qytetarëve të thjeshtë këtë helm politik, ndihmojeni të kapërcehet kjo krize me sa më pak dhimbje dhe pastaj vazhdoni kursin tuaj të cilin ndiqni prej 30 vjetesh.
*Opinionet e shprehura në këtë artikull janë të autorit dhe nuk pasqyrojnë domosdoshmërisht qëndrimin editorial të Argumentum.al
© Argumentum
