Ministrja e Shëndetësisë dhe Mbrojtjes Sociale, Ogerta Manastirliu në një mesazh drejtuar qytetarëve qytetarëve për t’u përshtatur me normalitetin e ri duke respektuar rregullat.
Ministrja e Shëndetësisë, Ogerta Manasterliu, apeloi të martën për respektimin e rregullave që parandalojnë përhapjen e COVID-19 duke theksuar se nëse ato respektohen nga të gjithë atëherë do të jetë më e lehtë për ta kontrolluar situatën.
Në një mesazh drejtuar qytetarëve ajo kujtoi se prej më shumë se 140 ditësh personeli shëndetësor po punon pa u ndalur për të shpëtuar jetë, ndërsa njoftoi se autoritetet kanë gati edhe planin se si do të menaxhohet periudha vjeshtë-dimër.
Manastirliu ka theksuar se puna për përballimin e epidemisë po vijon dhe nuk është ndalur për asnjë moment prej më shumë se 140 ditësh me të gjitha kapacitetet e sistemin shëndetësor, nga epidemiologët në terren deri tek mjekët dhe infermierët që po përballen në vijën e parë me COVID29.
“Një betejë e gjatë ka filluar prej më shumë se 140 ditësh në spitalin infektiv dhe në spitalin “Shefqet Ndroqi”. Dhe puna e ekipeve heroike, të mjekëve dhe infermierëve tanë po shpëton me qindra jetë njerëzish. Mjekët e familjes gjithashtu janë duke ndjekur shëndetin e mbi 1 mijë qytetarëve të prekur nga Covid-19,” – kujtoi Manastirliu teksa tha se është gati plani për të përballuar situatën e pandemisë në periudhën vjeshtë-dimër.
Për planin në fjalë ajo shpjegoi se po punohet për:
- të fuqizuar kapacitetet spitalore në rrethe;
- të fuqizuar kapacitetet testuese dhe vaksinuese për grup-moshat më të rrezikuara;
- të krijuar skuadra të lëvizshme në Qendrën e Urgjencës Kombëtare;
- të krijuar personel për spitalet COVID-3 dhe COVID-4;
“Normaliteti i ri kërkon nga ne fare pak, shumë shumë pak! Të gjithë bashkë, duke respektuar rregullat e thjeshta por jetëshpëtuese mund t’ia dalim! Asnjëherë nuk është vonë për të bërë gjënë e duhur! Filloje dhe ti nga vetja! Filloje sot,” – apeloi ministrja Manastirliu duke kujtuar mbajtjen e maskës dhe distancës fizike si masat kryesore parandaluese të përhapjes së infeksionit.
Teksa kemi hyrë në muajin e gjashtë të pandemisë, në Shqipëri janë raportuar 5,620 raste me COVID-19, prej të cilave 3,031 kanë mundur të shërohen, 2,417 mbeten ende mbartës të virusit ndërsa 172 persona nuk kanë mundur t’ia dalin mbanë.
Muaji korrik ishte muaji më i rëndë i pandemisë pasi u shënuan 95 viktima dhe më shumë se 2,700 raste me infeksion, shifra këto më të mëdha se sa 4 muajt mars-qershor marrë bashkë – pati 2,535 raste dhe 62 viktima.
