Një mbledhje e udhëheqjes së Partisë Komuniste të Kinës (PKK) theksoi nevojën për zbatim të palëkundur të vendimit me tetë pika të udhëheqjes qendrore të Partisë për përmirësimin e stilit të punës.
Xi Jinping-u, sekretar i përgjithshëm i Komitetit Qendror të PKK-së, mbajti një fjalim të rëndësishëm dhe kryesoi mbledhjen e kritikës dhe vetëkritikës të Byrosë Politike të Komitetit Qendror të PKK-së, e cila u zhvillua nga e enjtja deri të premten.
Gjatë mbledhjes, anëtarët e Byrosë Politike zhvilluan kritikë dhe vetëkritikë, me fokus në zbatimin e qëndrueshëm dhe të vazhdueshëm të vendimit me tetë pika për përmirësimin e stilit të punës. Diskutimet u përqendruan te çështje kyçe, përfshirë marrjen e rolit udhëheqës në forcimin e besnikërisë politike, thellimin e frymës partiake, respektin e lartë ndaj popullit, Partisë, ligjit dhe disiplinës, si edhe marrjen aktive të përgjegjësive në punë dhe në vetëqeverisjen e Partisë.
Foto nga VCG
Xi komentoi çdo fjalim, duke vënë në dukje që mbledhja ishte frytdhënëse dhe forcoi kohezionin e aftësinë vepruese të Byrosë Politike. Ai theksoi se, që nga Kongresi i 18-të Kombëtar i saj, Partia ka shënuar përparime të dukshme në ndreqjen e katër stileve të padëshiruara të punës: formalizmi i panevojshëm, burokratizmi, hedonizmi dhe ekstravaganca. Ai tha gjithashtu se sivjet një fushatë edukimi në të gjithë Partinë, e nisur për të zbatuar vendimin me tetë pika të udhëheqjes qendrore të Partisë për përmirësimin e sjelljes, ka arritur rezultate konkrete.
Xi u bëri thirrje anëtarëve të Byrosë Politike të japin shembull për mbarë Partinë në rritjen e ndërgjegjes partiake dhe përmirësimin e stilit të punës. Ai theksoi që zyrtarët, veçanërisht ata të nivelit të lartë, duhet të jenë të disiplinuar, të mbeten të palëkundur në zbatimin e vendimit me tetë pika dhe të veprojnë me vetëdije sipas rregullave e disiplinës./cgtn
