Ministri i Jashtëm i Kinës Wang Yi zhvilloi të hënën bisedime telefonike me Ministrin e Jashtëm të Francës Jean-Noel Barrot për të diskutuar mbi marrëdhëniet dypalëshe dhe çështjet ndërkombëtare.
Wang Yi deklaroi se nën udhëheqjen strategjike të liderëve të dy vendeve, marrëdhëniet Kinë-Francë kanë ruajtur një vrull zhvillimi përgjithësisht të qëndrueshëm. Duke pasur parasysh situatën aktuale komplekse dhe të paqëndrueshme ndërkombëtare, Kina dhe Franca, si anëtarë të përhershëm të Këshillit të Sigurimit të OKB-së, duhet të forcojnë komunikimin strategjik dhe të adresojnë së bashku rreziqet dhe sfidat. Kina mbështet në mënyrë aktive marrjen e presidencës së rradhës të Këshillit të Sigurimit këtë muaj nga Franca dhe pret që Franca të nxisë Këshillin e Sigurimit të luajë rolin e tij të duhur.
Wang Yi theksoi se parimi “një Kinë” është themeli politik i partneritetit gjithëpërfshirës strategjik Kinë-Francë. Ai shprehu bindjen se Franca do t’i përmbahet parimit të një Kinë me veprime konkrete, do të përmbahet nga çdo formë shkëmbimesh zyrtare me Tajvanin dhe do të shmangë dërgimin e sinjaleve të gabuara tek forcat e “pavarësisë së Tajvanit”.
Kina dhe BE duhet të mbështesin partneritetin e tyre, t’i përmbahen përfitimeve të ndërsjella dhe bashkëpunimit fitimprurës për të dyja palët dhe të ruajnë hapjen e ndërsjellë. Ato duhet të zgjidhin fërkimet aktuale tregtare përmes dialogut konstruktiv dhe të shmangin përshkallëzimin e konfrontimit. Proteksionizmi nuk do të rrisë konkurrueshmërinë e Evropës; përkundrazi, do t’i privojë konsumatorët nga mallra me cilësi të lartë dhe çmime të arsyeshme, do të rrisë inflacionin dhe do të pengojë procesin e tranzicionit të gjelbër. Kina është një nga tregjet më të mëdha në botë dhe zhvillimi i Kinës është një mundësi, jo një sfidë, për BE-në. Ai shprehu shpresën që Franca, si një fuqi e madhe me vizion strategjik, do të miratojë një qëndrim pragmatik dhe racional për të inkurajuar BE-në të punojë me Kinën në të njëjtin drejtim, ta shohë zhvillimin e Kinës më saktë dhe të luajë një rol pozitiv në stabilitetin e marrëdhënieve Kinë-BE.
Barro deklaroi se që nga vizita e Presidentit Macron në Kinë vitin e kaluar, Franca dhe Kina kanë mbështetur “Shpirtin Dujiangyan” të shkëmbimit dhe integrimit, duke kërkuar terren të përbashkët duke iu përmbajtur dallimeve dhe duke vazhduar dialogun, për të ruajtur vrullin e përgjithshëm të zhvillimit në marrëdhëniet dypalëshe. Franca i përmbahet fuqimisht politikës së një Kine. Marrëdhëniet ekonomike dhe tregtare BE-Kinë aktualisht po përballen me vështirësi e sfida. Franca është e gatshme të promovojë shkëmbime konstruktive midis BE-së dhe Kinës për të gjetur një zgjidhje.
Të dyja palët shkëmbyen gjithashtu pikëpamje mbi çështje me shqetësim të përbashkët si situata në Iran dhe kriza e Ukrainës. Wang Yi prezantoi qëndrimin parimor të Kinës, duke theksuar se iniciativa me katër pika e Presidentit Xi Jinping për ndërtimin e një arkitekture të re sigurie në Lindjen e Mesme, siguron të mira publike për paqen dhe stabilitetin rajonal, si dhe luan një rol konstruktiv./cgtn
