Ministria e Shëndetësisë ka bërë publike të dhenat e fundit në lidhje me situatën e coronavirusit. Sipas ministrisë, numri i të prekurve ka shkuar në 174 persona, ndërsa 73 prej tyre ndodhen të shtruar në Spitalin Infektiv në QSUT.
Përgjatë 24 orëve të fundit janë kryer 103 testeve të dyshuara me COVID-19, ku 28 raste janë konfirmuar pozitivë me virusin vdekjeprurës. Drejtuesja e Shërbimit të Inteligjencës Epidemiologjike, Eugena Tomini u shpreh përmes një deklarate se mes të prekurve ka edhe katër fëmijë, por fatmirësisht gjendja e tyre shëndetësore paraqitet e qëndrueshme dhe pa probleme.
“Ju informojmë mbi situatën e fundit të përhapjes së COVID-19 në vendin tonë Në 24 orët e fundit janë konfirmuar 28 raste të reja me COVID-19 dhe janë kryer 103 testime. Deri në këto momente testuar 1144 janë raste të dyshuara dhe prej tyre janë të konfirmuar pozitivë me COVID-19, 174 qytetarë. Gjatë orëve të mbrëmjes së djeshme ndërroi jetë një paciente 71-vjeçare nga Tirana, e konfirmuar me COVID-19, e shtruar në spitalin Infektiv, në terapi intensive, në frymëmarrje të drejtuar (respirator). Pavarësisht përpjekjeve të mjekëve, 71-vjeçarja me hipertension, e shtruar prej 7 ditësh në spitalin Infektiv, nuk arriti të mbijetojë.
71-vjeçarja është viktima e gjashtë e prekur nga COVID-19 në Shqipëri. Në shërbimin infektiv aktualisht janë 73 të shtruar dhe prej tyre 3 raste jane ne terapi itensive 2 jane te intubuar Ndërsa pjesa tjetër e të shtruarve në pavion janë në gjendje të stabilizuar deri në këto momente. Harta e të prekurve nga COVID-19 është shtrirë tashmë edhe në Tropojë dhe zgjerohet në Tiranë, Korçë, Fier, Durrës, Lezhë, Elbasan, përveç rasteve të zbuluar për të cilat po kryhet hetimi epidemiologjik dhe ku po punohet me shumë intesitet nga epidemiologët për gjurmimin e kontakteve të rasteve pozitive dhe ndërprerjen e zinxhirit të transmetimit të infeksionit”, tha ajo.
Gjithashtu Tomini tregoi se harta e qyteteve të prekura është shtuar, ku së fundmi raportohen dy raste të reja në qytetin e Tropojës.
“Shpërndarja gjeografike e rasteve pozitive, është si vijon:- Tirane 102 raste – Durres 10 raste – Lushnje 4 raste – Elbasan 5 raste – Rrogozhine 2 raste – Fier 18 raste – Kavaje 4 raste – Korce 11 raste – Vlore 5 raste – Shkoder 3 raste – Lezhe 4 rast – Berat 1 rast – Has 2 raste – Kruje 1 rast -Tropoje 2 raste Nga të prekurit, rezultojnë 4 raste pozitive të moshës pediatrike, kontakte të rasteve pozitive, janë pa shenja klinike dhe në gjendje të mirë shëndetësore. Ministria e Shëndetësisë dhe Mbrojtjes Sociale i drejtohet edhe një herë me një lutje qytetarëve: Mos shkoni menjëherë në spital! Ministria ka vënë në dispozicion një linjë të gjelbër FALAS 0800 40 40 për çdo qytetar që kërkon informacon apo këshilla në lidhje me COVID-19. Kjo linjë do të shërbejë edhe për pacientët kronikë që të marrin informacion se si të lidhen me mjekun e familjes, se si mund të përfitojnë barnat me rimbursim dhe për cdo shqetësim tjetër që ata kanë. Por është e rëndësishme të sqarohet se: Nëse qytetarët kanë shenja të sëmundjes dhe për rastet e urgjencave duhet të telefonohet numri unik i urgjencës kombëtare 127!”, tha Tomini.
