Të premten pasdite, zëdhënësi i Ministrisë së Mbrojtjes të Kinës Jiang Bin organizoi një konferencë për shtypin për çështje të fundit ushtarake.
Sipas njoftimeve të medias, sekretari filipinas i Mbrojtjes Kombëtare vizitoi së fundmi ishullin Thitu për të marrë pjesë në aktivitetin me rastin e 10-vjetorit të “Vendimit të Arbitrazhit të Detit të Kinës Jugore”. Duke iu përgjigjur pyetjes së gazetarit lidhur me këtë, Jiang Bin tha:
“Kina ushtron sovranitetin e padiskutueshëm mbi ishujt Nansha dhe ujërat detare përreth, duke përfshirë ishullin Thitu. Sekretari filipinas i Mbrojtjes Kombëtare, që është nën sanksionet e Kinës, u orvat të shfaqë qëndrimin e fortë ndaj Kinës nëpërmjet shfaqjes politike dhe nxitjes së ndjenjave nacionaliste, por të gjitha këto në fund të fundit do të dëmtojnë interesat themelore të Filipineve dhe popullit filipinas.”
“Arbitrazhi i Detit të Kinës Jugore” është një farsë politike e maskuar me mjete ligjore që nga fillimi deri në fund, dhe i ashtuquajturi “vendim” nuk ka asnjë fuqi ligjore, u shpreh në vijim ai, duke shtuar që pala kineze nuk e njeh dhe nuk e pranon vendimin, si edhe nuk pranon asnjë pretendim a veprim të bazuar në të.
“Pavarësisht se si veprojnë disa individë filipinas, ata nuk mund ta ndryshojnë kurrë faktin historik dhe juridik që ishujt e shkëmbinjtë përkatës i përkasin Kinës, dhe nuk mund ta trondisin kurrë vendosmërinë e ushtrisë kineze për mbrojtjen e sovranitetit territorial dhe të të drejtave e interesave detare të vendit,” tha zëdhënësi./cgtn
