Ndahet nga jeta Hajdar Muneka, ish-ambasador i Shqipërisë në Kinë

Hajdar Muneka, gazetari dhe diplomat i njohur dhe me një përvojë shumë të gjatë në fushën e diplomacisë është ndarë nga jeta në mbrëmjen e së enjtes në moshën 68 vjeçare pas një sëmundjeje të rëndë.

Këshilli i Ambasadorëve Shqiptarë shpreh pikëllimin e thellë për humbjen e një prej bashkëthemeluesve të tij, Ambasador Hajdar Muneka.

“Ambasador Muneka ka qenë për shumë vite pjesë e trupit diplomatik shqiptar, dhe ka shërbyer si Ambasador i Jashtëzakonshëm dhe Fuqiplotë i Republikës së Shqipërinë në Kinë, Japoni, Korenë e Jugut, Zelandë të Re, Australi, Singapor dhe Malajzi. Të gjithë kolegët ndajmë dhimbjen e thellë dhe shprehim nguëshillimet më të ndjera familjes Muneka për humbjen e njeriut të dashur, duke nderuar me përulësi kontributin e çmuar të Ambasador Munekës në historikun e diplomacisë shqiptare”, thuhet në njoftimin e  Këshillit të Ambasadorëve.

May be an image of 2 people and people standing

Ndërsa Ambasadori i Republikës Popullore të Kinës në Shqipëri z. Zhou Ding ka shprehur ngushëllimet për ndarjen nga jeta të Z. Muneka duke e falënderuar për kontributin e tij të jashtezakonshem për miqësinë Kinë- Shqipëri, ishte njeri i ndershëm dhe një diplomat i shkëlqyer.

“Me hidherim të thellë mora lajmin e ndarjes nga jeta të Ish-Ambasadorit të Shqipërisë në Kinë, Z. Hajdar Muneka. Ai ka qene një njeri i ndershëm, një diplomat i shkëlqyer, një ekspert i historisë së marrëdhënieve kino-shqiptare, dhe një mik i ngushtë i popullit kinez, me te cilin bashkëpërjetuam shume momente të këndshme.

Përzemërsisht falenderoj Ambasadorin Muneka për kontributin e tij të jashtëzakonshëm për miqësinë Kinë-Shqipëri. Shqipëria është një vend i bukur, me potencial të madh. Pres të ketë më shumë shqiptare që, ashtu si Amb. Muneka, duan vendin e tyre, dhe njëkohësisht njohin mirë Kinën dhe botën, që të kontribuojnë për te ardhmen e Shqipërisë. U prehtë në paqe”, shkruan Ding Zhou, ambasadori i Kinës në Tiranë.

Z.Hajdar Muneka duke filluar nga viti 1979, shërbeu si gazetar që mbulonte Çështjet Evropiane në Radio Televizionin Shqiptar, në Tiranë.

Muneka e filloi karrierën e tij diplomatike në vitin 1991, në Ministrinë e Punëve të Jashtme të Shqipërisë dhe më vonë Sekretar i Parë i Ambasadës së Shqipërisë në Pekin, Kinë. Në vitin 1997 emërohet Ambasador i Jashtëzakonshëm dhe Fuqiplotë i Republikës së Shqipërisë në Pekin të Kinës. Në të njëjtën kohë Hajdar Muneka është emëruar ambasador i caktuar në Japoni, Korenë e Jugut, Australi, Zelandën e Re, Singapor. Në vitin 2001 Muneka u emërua Shef i Misionit të Ambasadës së Shqipërisë në Kuala Lumpur, Malajzi. Muneka është bashkëthemelues i Këshillit të Ambasadorëve Shqiptarë.

/Argumentum.al