Ndarja nga jeta e ish-Presidentit Bujar Nishani ka sjellë mesazhe të shumta ngushëllimi e solidariteti me familjen nga deputetë, autoritete shtetërore, kolegë e miq të tij, bashkëpunëtorë në vite, nga Shqiperia dhe Kosova. Nuk mungojnë as ngushëllimet nga ambasadorët në Shqipëri.
Meta: Personalitet me vlera të rralla
Presidenti i Republikës Ilir Meta përcolli sot mesazh ngushëllimi për ndarjen nga jeta të ish-kreut të shtetit, Bujar Nishani.
Në një postim në rrjetet sociale, Meta shkroi se me trishtim dhe hidhërim të thellë mori lajmin e largimit nga jeta të Presidentit Bujar Nishani. “Ngushëllimet më të ndjera për bashkëshorten Odeta, fëmijët Ersi dhe Fiona, dhe të afërmit për këtë humbje të madhe!”, u shpreh ai.
“Presidenti Nishani do të kujtohet gjithnjë si një personalitet me vlera të rralla të një udhëheqësi me integritet dhe vizion. Kontributi i tij për Shqipërinë dhe demokracinë do të kujtohet përherë me respekt. I paharruar kujtimi i President Nishanit! Të prehet në paqen e merituar”, shkroi Meta.
Berisha: Përfaqësoi kombin dhe Shqipërinë me dinjitet të veçantë
Ish-kryeministri Sali Berisha shprehu sot ngushëllimet për familjen e ish-Presidentit Bujar Nishani i cili ndërroi jetë sot, duke theksuar në një postim në rrjetet sociale se ish- presidenti Bujar Nishani ishte ikonë e vlerave më të larta morale të njeriut, ndershmërisë, atdhetarisë dhe përkushtimit.
“Dielli perëndoi përgjithmonë për ish-presidentin Bujar Nishani! Te dashur miq, sot ish presidenti Bujar Nishani mbylli sytë përgjithmonë duke zhytur kështu ne dhimbje, zi e pikëllim te thelle familjen e tij te dashur, miqtë e te afërmit, Partine Demokratike dhe mbare Shqipërinë. Ish presidenti Bujar Nishani, ishte ikone e vlerave me te larta morale te njeriut, ndershmërisë, atdhetarisë dhe përkushtimit. Ai ishte burrështetasi i shquar, qe përfaqësoi kombin dhe Shqipërinë me dinjitet te veçante dhe urtësi ne arenën ndërkombëtare duke i dhënë nder dhe vlere institucionit te presidentit, shtetit dhe qytetareve shqiptare.
Ish presidenti Bujar Nishani ne këto 30 vite, si një shërbëtor i qytetarëve dhe vendit te tij përmbushi me nder detyra te rëndësishme nga drejtues drejtorie ne Ministrinë e Mbrojtjes, ministër i Rendit Publik dhe deri ne President i Republikës. Bujar Nishani ishte gjithashtu një drejtues i shkëlqyer dhe efecient e i dashur i Partisë Demokratike, deputet, ministër, dhe kandidat i votuar për president te Republikës nga mazhoranca e kësaj partie.
Personalisht unë kam patur tek Bujar Nishani njërin prej bashkëpunëtorëve me ta afërt, me te afte, me te dashur dhe me çmuar, me te virtytshëm qe do mbetet gjithmonë ne memorien time si mirënjohje e thelle për bashkëpunimin e ngushte qe kemi patur si krenari e veçante qe pata një mik fisnik si ai. Ndaj sot është dite zie dhe dhimbje te thelle për familjen e nderuar Nishani qe humben bashkëshortin dhe prindin e tyre te mrekullueshëm e shembullor, për miqtë dhe te afërmit e tij qe humben një mik te dashur qe do ju mungoje gjithmonë, për Partine Demokratike qe humbi njërin prej drejtuesve me te talentuar, për shtetin dhe kombin shqiptar qe humben sot shërbëtorin besnik dhe te përkushtuar, shtetarin e afte e te ndershëm, patriot dhe fisnik.
Duke shprehur mirënjohjen time te pakufishme dhe nderimin time me te madh ish presidentit Nishani për kontributin e çmuar për vendin, kombin dhe Partine Demokratike, si dhe bashkëpunimin dhe miqësinë tone te ngushte qe kemi patur ju shpreh sot ngushëllimet dhe solidaritetin me te ndjere bashkëshortes, fëmijëve, familjes dhe miqve te ish presidentit dhe mikut tim te çmuar për këtë humbje te madhe dhe te pakompensueshme, i lutem Zotit qe shpirti i mire i Bujar tyre te dashur te gjeje paqen e merituar. Amin! Sb”, shkruan Berisha.
Kryeministri Rama
Kryeministri Edi Rama përcolli sot mesazhin për ndarjen nga jeta të ish-Presidentit Bujar Nishani.
“U prehtë në paqe! Ngushëllime familjes”, u shpreh Rama në një postim në rrjetet sociale.
Paloka: Fatkeqësi për familjen dhe për gjithë demokratët
Deputeti i Partisë Demokratike, Edi Paloka përmes një mesazhi në rrjetet sociale përcolli mesazhin e ngushëllimit për ndarjen nga jeta të ish-Presidentit, Bujar Nishani.
“Një lajm i hidhur ka pak që u konfirmua. Bujar Nishani, ish-President i Republikës, ministër dhe funksionar në disa poste të rëndësishme të PD-së në vite, ka ndërruar jetë!”, shkroi Paloka.
“Një fatkeqësi për familjen dhe për gjithë demokratet. Respekti ynë për gjithçka dha për PD-në dhe për vendin, do e shoqërojë kurdoherë”, u shpreh Paloka.
Spiropali: Pusho në paqe President Nishani!
Ministrja e Shtetit për Marrëdhëniet me Parlamentin, Elisa Spiropali përcolli ngushëllimet për ndarjen nga jeta të ish-Presidentit Bujar Nishani.
Me anë të një postimi në rrjetet sociale, Spiropali u shpreh: “Pusho në paqe President Nishani! I lehtë dheu!”.
Gjiknuri: Diti të përcjellë gjithmonë vlerat më të mira njerëzore
Sekretari i Përgjithshëm i Partisë Socialiste, Damian Gjiknuri shprehu sot ngushëllimet për ndarjen nga jeta të ish-Presidentit Bujar Nishani, duke e cilësuar një lajm të dhimbshëm.
“Përtej bindjeve dhe pozicioneve të ndryshme politike, ai ishte një personalitet që diti të përcjellë gjithmonë vlerat më të mira njerëzore, qetësinë dhe maturinë! Gjej rastin t’u shpreh familjarëve dhe miqve të tij ngushëllimet më të sinqerta!”, u shpreh Gjiknuri në një postim në rrjetet sociale.
Balla: U prehsh në paqe President!
Kreu i grupit parlamentar të Partisë Socialiste, Taulant Balla shprehu sot ngushëllime për ndarjen nga jeta të ish-Presidentit Bujar Nishani.
“U prehsh në paqe President!”, shkroi Balla në një postim në rrjetet sociale.
Kryemadhi: Kujtimi dhe kontributi i tij për vendin, i paharruar
Kryetarja e Lëvizjes Socialiste për Integrim, Monika Kryemadhi ka reaguar pas lajmit të ndarjes nga jeta të ish-Presidentit Bujar Nishani.
Me anë të një postimi në rrjetet sociale, Kryemadhi u shpreh se mendimet e saj janë me bashkëshorten e Nishanit, Odetën dhe familjarët e tij.
“Bujar Nishani ishte zyrtari, ushtaraku, qytetari i shtetit e miku i mirë, që karakterizohej nga integriteti dhe vlerat më të larta njerëzore. Kujtimi dhe kontributi i tij për vendin do të mbetet i paharruar!”, shkroi Kryemadhi.
Veliaj: Ngushëllime familjes për humbjen e njeriut të dashur
Kryetari i bashkisë së Tiranës, Erion Veliaj ka reaguar për ndarjen nga jeta të ish-Presidentit Bujar Nishani. Ai u ka shprehur ngushëllime familjes, për këtë ngjarje tragjike.
“Ngushëllime familjes për humbjen e njeriut të dashur”, shkroi Veliaj në rrjetet sociale.
Guvernatori Sejko: Vdekja e Presidentit Nishani, humbje e madhe
Guvernatori i BSH-së, Gent Sejko nëpërmjet një mesazhi ngushëllimi për ndarjen nga jeta të ish-presidentit Bujar Nishani shprehet se ndarja e parakohshme e Nishanit nga jeta është një humbje e madhe për politikën dhe shoqërinë shqiptare.
“Me hidhërim të thellë mësova sot për largimin e parakohshëm nga jeta të Presidentit Bujar Nishani. Shpreh ngushëllimet më të sinqerta për familjarët, bashkëpunëtorët, kolegët dhe miqtë!
Vdekja e Presidentit Nishani është një humbje e madhe për politikën dhe shoqërinë shqiptare, të cilave ai u shërbeu me përkushtim, ndershmëri dhe thjeshtësi prej dekadash. Prehu në paqe President Bujar Nishani!”, u shpreh Sejko.
Ngushellimet kane shprehur dhe liderit e politikës në Kosovë
Kryeministri i Kosovës Albin Kurti ka shprehur ngushëllime për ndarjen nga jeta të ish-presidentit Bujar Nishani.
Jam thellësisht i pikëlluar nga lajmi për ndarjen nga jeta të ish Presidentit të Republikës së Shqipërisë, Bujar Nishani. Do të kujtohet për kontributin e tij në karrierën profesionale si ushtarak e pedagog, deputet e ministër. Gjatë mandatit të tij si President i Republikës së Shqipërisë, me maturi e urtësi politike punoi për shtetin modern shqiptar. Me vetëdije të lartë kombëtare u angazhua në intensifikimin e marrëdhënieve vëllazërore mes Shqipërisë e Kosovës, dha mbështetje të pakursyer për Republikën e Kosovës dhe bashkatdhetarët tonë kudo. I jam mirënjohës për dhënien e shtetësisë shqiptare gjatë mandatit të tij. Në këto ditë të vështira për familjen, në emër të Qeverisë së Republikës së Kosovës dhe në emrin tim, u shpreh ngushëllimet më të sinqerta zonjës Odeta për humbjen e bashkëshortit, Ersit dhe Fionës për babain, dhe mbarë kombit shqiptar për Presidentin e shtetit tonë amë”, shkruan Kurti.
Presidentja e Kosoves, Znj: Vjosa Osmani
Presidentja e Kosovës, Vjosa Osmani përcolli sot mesazh ngushëllimi për ndarjen nga jeta të ish-Presidentit të Republikës së Shqipërisë, Bujar Nishani.“Presidenti Bujar Nishani ishte model i atdhetarit të pashoq, i cili përfaqësoi Shqipërinë me dinjitet të lartë dhe përkrahu Kosovën pareshtur, deri në frymën e fundit. Ai një jetë të tërë ia kushtoi Shqipërisë dhe shqiptarëve, duke qenë shembull i politikanit racional e me integritet”, u shpreh Osmani në një postim në rrjetet sociale.“Në emër të qytetarëve të Republikës së Kosovës, i shpreh ngushëllime familjes Nishani si dhe miqve e bashkëpunëtorëve! Shpirti i Presidentit Nishani pushoftë në paqe!”, përfundoi Osmani.
Ish-presidenti i Kosovës, Behgjet Pacolli ka ngushëlluar familjen e ish-presidentit Bujar Nishanit, i cili u nda sot nga jeta.
‘Sapo mora lajmin e hidhur për ndarjen nga jeta të mikut tim shumë të afërt, Ish-Presidentin e Shqipërisë Bujar Nishani. Atë do ta kujtoj gjithmonë si njeri i urtë, i respektuar dhe me integritet të lartë. I bindur që do ti mungon për gjithmonë kombit. Shprehi ngushëllimet e mia familjes Nishani dhe çdo shqiptarit, kudo!’- shkruan Pacolli.
Ambasada amerikane: Do mbahen mend kontributet e tij
Ambasada amerikane në Tiranë shprehu sot ngushëllime për ndarjen nga jeta të ish-Presidentit Bujar Nishani.
“Jemi të pikëlluar nga lajmi për ndarjen nga jeta të Presidentit Bujar Nishani. I shprehim familjes së tij ngushëllimet tona të përzemërta. Kontributi i tij për Partinë Demokratike, zhvillimin e Shqipërisë dhe marrëdhëniet SHBA-Shqipëri gjatë mandateve të tij si President dhe Ministër do të mbahen mend nga bashkatdhetarët, bashkëpunëtorët dhe partnerët e shumtë”, u shpreh ambasada amerikane në një postim në rrjetet sociale
Ambasadori i Kinës në Shqipëri z. Ding Zhou: Z. Nishani ishte i përkushtuar për të nxitur miqësinë kino-shqiptare
Me trishtim të thellë mora lajmin për ndarjen e jetës së ish-Presidentit të Shqipërisë Bujar Nishani. Ngushëllimet më të sinqerta për familjen dhe miqtë të tij. Z. Nishani ishte i përkushtuar për të nxitur miqësinë kino-shqiptare
dhe bashkëpunimin në fusha të ndryshme midis dy vendeve tona. Kontributet e tij do të kujtohen përgjithmonë.
U prehte në paqe!
Ambasada Ruse-Tiranë
Ambasada e Federatës Ruse i shpreh ngushëllimet më të sinqerta popullit shqiptar, familjes, miqve dhe kolegëve të ish-presidentit të Republikës së Shqipërisë z.Bujar Nishani. U prehtë në paqe!
Redaksia e Argumentum.al shpreh ngushëllimet më të sinqerta për familjen e tij por dhe gjithë popullit shqiptarë për humbjen e ish -Presidentit Bujar Nishani.
/ATA-Argumentum.al
