Pas një pune të gjatë përgatitore, nis ndërtimi i Parkut fotovoltaik të Karavastasë, parku më i madh i energjisë diellore në rajon, me kapacitet 140 MGW në një sipërfaqe prej 120 hektarësh.Në ceremoninë e organizuar me këtë rast, ku ishte i pranishëm kryeministri Edi Rama dhe aktorë të tjerë të sektorit, ministrja e Infrastrukturës dhe Energjetikës, Belinda Balluku tha se, “kjo është një ditë e shënuar, pasi në Shqipëri sot fillon një investim shumë i rëndësishëm në sektorin energjetik”.
“Në një kohë kur e gjithë bota është përfshirë në krizën energjetike dhe ekonomike, kjo ditë merr një rëndësi akoma më të madhe. Shqipëria është në vend flamurtar i prodhimit të energjisë së rinovueshme. Ne jemi krenarë në çdo tryezë ku ulemi e tregojmë se si në vendin tonë prodhohet vetëm energji e rinovueshme 100 % por kjo energji mbulon 70 % të kapacitetit të nevojshëm të tregut. Ndërsa pjesa tjetër tjetër importohet dhe të importosh energji në 2022 është një kosto shumë e lartë”, tha Balluku. Ajo tha se, pavarësisht parashikimeve që këto çmime do të vinin duke iu rritur, nga 250 në 350 euro, çmimi i rritur energjisë është përshpejtuar më ritme më të larta.“Shqipërisë i duhet të investojë në sigurinë energjetike jo vetëm për vendin tonë, por edhe për të gjithë rajonin. Ky investim që nis sot tepër i rëndësishëm për ekonominë, për sistemin energjetik është i rëndësishëm edhe për sigurinë energjetike të Ballkanit Perëndimor”, deklaroi Balluku.
Ministrja evidentoi “Voltalian” kompaninë franceze, si një nga kompanitë më në zë dhe të afirmuar që gjeti Shqipërinë për të investuar jo vetëm falë kushteve gjeografike, por edhe bashkëpunimit të shkëlqyer me qeverinë shqiptare“Në një kohë kur në tregun ndërkombëtar çmimi i energjisë është 350 euro, Shqipëria përmes këtij investimi 100 milionë euro, do të ketë mundësinë në 15 vitet e ardhshme duke filluar nga mesi i vitit 2023, kur ky park do të jetë në prodhim, ne të kemi 70 MGV të disponueshme me 24.89 euro”, tha Balluku./ata
