Partia Socialiste e Shqipërisë festoi të enjten, më 12 qershor 2025, përvjetorin e 34-të të themelimit të saj.
Në selinë e Partisë Socialiste u organizuar sot një takim festiv me rastin e 34-vjetorit të themelimit të kësaj force politike.
Në fjalën e tij kryeministri Edi Rama, njëherësh kryetar i Partisë Socialiste, u ndal te procesi i integrimit të vendit drejt Bashkimit Evropian.
Rama u shpreh se ky proces kërkon angazhim në të gjitha nivelet, duke përfshirë të gjitha njësitë administrative, teksa theksoi se vlera kryesore e skuadrës mbështetëse të PS-së është te burimet e veta njerëzore.
“Unë besoj që si rezultat i mirorganizimit në të gjithë territorin dhe një beteje të bërë me shumë përkushtim në gjithë territorin, kemi po ashtu edhe një skuadër mbështetëse jashtëzakonisht premtuese në të gjitha njësitë administrative dhe në të gjitha zonat ku Partia Socialiste është angazhuar gjatë gjithë këtyre muajve, në mbështetjen të grupeve të kandidatëve për deputetë. Vlera kryesore e kësaj skuadre mbështetëse janë burimet e veta njerëzore, ku ne do të duhet të qëmtojmë më kujdes për të identifikuar më të mirët e mundshëm dhe për t’i ngarkuar me përgjegjësi në një proces, që kërkon angazhim në të gjitha nivelet”, tha Rama.
Rama tha se shumë nga detyrat që ka procesi i integrimit mbeten për t’u adresuar, por që të adresohen si duhet duan kapital njerëzor cilësor.
“Procesi i anëtarësimit nuk është thjeshtë proces i qeverisë apo i parlamentit, por është një proces i shtrirë në të gjithë territorin, ku përfshihen edhe njësitë e pushtetit vendor dhe shumë nga detyrat që ka ky proces, mbeten për t’u adresuar, por që të adresohen si duhet, duan një kapital njerëzor goxha cilësor. Kam besim se nëse ne do ta adresojmë këtë si një prioritet kombëtar të Partisë Socialiste, do të jemi në gjendje t’i japim një forcë të madhe Partisë Socialiste në territor duke u mbështetur te njerëzit më të talentuar, më të përgatitur dhe më të përkushtuar”, tha Rama.
Kryeministri Edi Rama, u shpreh sot se fitorja në zgjedhjet e 11 majit është e lidhur me një mandat besimi të jashtëzakonshëm për të udhëhequr vendin dhe për ta anëtarësuar Shqipërinë në Bashkimin Europian brenda kësaj dekade.
“Kjo është një ditëlindje që bëhet e veçantë si rezultat i faktit që vjen pas një fitoreje shumë domethënëse të PS-së, një fitoreje e cila vjen me një përgjegjësi më të madhe se asnjëherë tjetër për vetë faktin që u mishërua si rezultat i një mbështetje më të madhe se asnjëherë tjetër për PS-në”, shtoi Rama.
Rama tha se “pa dyshim që ne nuk jemi frikur, edhe sigurisht nuk i jemi shmangur asnjëherë përgjegjësive që vijnë me fitoret”.
“Kjo besoj se është arsyeja kryesore pse ne nuk lodhemi së fituari, pasi nuk lodhemi së ngarkuari veten me përgjegjësi dhe nuk lodhemi së reflektuari mbi çfarë mund të bëjmë më mirë. Natyrisht që shumë gjëra duhen bërë me patjetër më mirë, në kushtet kur kjo fitore është e lidhur me një mandat besimi të jashtëzakonshëm për të udhëhequr vendin dhe për ta anëtarësuar Shqipërinë në BE brenda kësaj dekade”, nënvizoi Rama.
Kryeministri nënvizoi se nuk ka arsye më të fortë dhe nuk ka domethënie më të madhe lidhur me përgjegjësinë sesa ky objektiv.
“Ky objektiv është sa i arritshëm, aq edhe tejet i vështirë për t’u arritur. Një objektiv sa i afërt, aq edhe jashtëzakonisht i lidhur me sa shpejt ne do të jemi në gjendje të përmirësojmë çka duhet përmirësuar dhe përmbushim çfarë duhet përmbushur”, tha kryeministri.
Rama theksoi se “nuk kemi asnjë arsye për të mos qenë besimplotë, pasi kemi një skuadër të re me jo pak, por me 83 deputetë”.
“Më shumë sesa numri është përbërja e skuadrës, është harmonizimi i eksperiencës e prurjet e reja dhe është shpërndarja më e mirë se asnjëherë tjetër e peshës së përfaqësimit në çdo territor që, besoj unë, i japin kësaj skuadre të re mundësinë që ta përballojë me sukses peshën e madhe që duhet të mbajë në këto vite kur parlamenti do të duhet të bëhet shtylla kryesore e procesit të anëtarësimit në BE për vetë përmbajtjen që ka procesi”, shtoi Rama.
Në 34-vjetorin e Partisë Socialiste fjalën hapëse e nisi sekretari i përgjithshëm i Partisë Socialiste Blendi Klosi. Klosi falenderoi socialistët e diasporës dhe tha se kjo organizatë politike i ka shërbyer me patriotizëm Shqipërisë.
“Mirë se keni ardhur në 34-vjetorin e PS, e cila ia ka dalë në këto 34 vite të jetë partia më e madhe në vend. T’i shërbej Shqipërisë me patriotizëm dhe sot që jemi edhe pranë integrimit të BE. Shumë faleminderit partisë tonë të madhe, faleminderit çdo socialisti dhe faleminderit atyre që dhanë kontributin për herë të parë nga diaspora. Faleminderit kryetarit tonë Edi Rama”, tha Klosi.
/Argumentum.al
