Presidenti Bajram Begaj priti sot në një takim kryetarin e Kuvendit të Maqedonisë së Veriut, Afrim Gashi, i cili ndodhet për një vizitë zyrtare në Tiranë.
Gjatë takimit Begaj dhe Gashi diskutuan për forcimin e bashkëpunimit dhe marrëdhënieve të fqinjësisë së mirë mes dy vendeve, si dhe për intensifikimin e bashkëpunimit politik, ekonomik, social dhe kulturor.
Presidenti Begaj vlerësoi rëndësinë e rolit të faktorit shqiptar si “faktor shtetformues, paqedashës dhe i vendosur për integrimin euroatlantik” për stabilitetin e Maqedonisë së Veriut, i cili shërben edhe si urë lidhëse mes dy vendeve.
“Shqiptarët kanë një rol të veçantë edhe për zhvillimin e qëndrueshëm në rajon”, theksoi Begaj.
Kreu i Shtetit vlerësoi si shumë të rëndësishme dhe me një rol prioritar për shqiptarët në Maqedoninë e Veriut ligjin për gjuhën dhe përfaqësimin e drejtë dhe adekuat të shqiptarëve në administratë.
“Shqipëria është e gatshme të intensifikojmë bashkëpunimin mes dy vendeve për avancimin e gjithanshëm të marrëdhënieve, si dhe kontekstin evropianizues të zhvillimeve në mbarë rajonin”, theksoi Presidenti Begaj duke garantuar një klimë miqësore dhe konstruktive, një model i fqinjësisë së mirë në rajon.
Në lidhje me marrëdhëniet ekonomike u theksua rëndësia e vazhdimit të projekteve të nisura, ndër më të rëndësishmit, Korridori VIII, i cili, sipas Presidentit Begaj është shumë më tepër se një projekt i thjeshtë infrastrukturor.
“Korridori VIII është një projekt strategjik në kuadër të bashkëpunimit ndërmjet dy shteteve”, tha Begaj.
Presidenti Begaj theksoi gjithashtu se bashkëpunimi mes Shqipërisë dhe Maqedonisë së Veriut në fushën e integrimit evropian është një proces i rëndësishëm, pavarësisht veçimit të dy vendeve në këtë rrugëtim, për të cilin shprehu bindjen se do të takohen sërish.
/Argumentum.al
