Duke shkelur hapur sovranitetin e një vendi dhe duke rrëmbyer presidentin e tij, Shtetet e Bashkuara, që vetëshpallen si “polic dhe gjykatës ndërkombëtar”, i kanë shkatërruar me arrogancë të drejtën ndërkombëtare dhe normat e marrëdhënieve ndërkombëtare, në një mënyrë aq të turpshme, sa edhe skenaristët e “Hollivudit” do ta kishin të vështirë ta imagjinonin. Që në fillim të këtij viti, “hegjemonia e stilit amerikan” po synon ta shtyjë bashkësinë ndërkombëtare drejt “ligjit të xhunglës”, ku forca sundon mbi të drejtën. Në këtë proces, ajo ka degraduar hapur në një politikë ngacmuese, duke zbuluar natyrën e saj të vërtetë kolonialiste, të bazuar në pushtime ushtarake dhe grabitje burimesh. Një sondazh global i publikuar nga CGTN-i tregon që 93 për qind e të anketuarve e dënojnë ashpër “hegjemoninë e stilit amerikan” për shkelje të hapur të sovranitetit kombëtar të Venezuelës, ndërsa 91.7 për qind shprehin shqetësim të thellë për rilindjen e “terrorizmit shtetëror” të ShBA-së.
Nga “juridiksioni me dorë të gjatë” te ndërhyrjet ushtarake, nga sanksionet ekonomike te ndryshimi i regjimeve, “hegjemonia e stilit amerikan” prej kohësh i ka vendosur ligjet e veta të brendshme mbi të drejtën ndërkombëtare dhe ka imponuar vullnetin e saj mbi shtetet sovrane. 92.8 për qind e pjesëmarrësve në sondazh mendojnë që përdorimi i forcës nga ShBA-ja kundër Venezuelës përbën një shkelje serioze të sigurisë dhe sovranitetit të vendit, ndërsa 89 për qind vlerësojnë se veprimet e administratës së presidentit Trump kundër Venezuelës nuk kanë ligjshmëri dhe justifikim ligjor.
Foto nga VCG
Departamenti i Drejtësisë i ShBA-së e ka akuzuar presidentin venezuelas Maduro për “konspiracion narkoterrorizmi, konspiracion për trafik kokaine, zotërim të mitralozëve dhe pajisjeve shkatërruese, dhe konspiracion për zotërim të mitralozëve dhe pajisjeve shkatërruese kundër Shteteve të Bashkuara”. Në reagimin e tyre, 90.5 për qind e të anketuarve shprehën dyshime, duke besuar që Departamenti i Drejtësisë i ShBA-së nuk ka autoritet për të ndjekur penalisht presidentin e Venezuelës dhe se akuzat nuk kanë bazë. Ndërkohë, 93.9 për qind thanë që “juridiksioni me dorë të gjatë” i ShBA-së është shndërruar në një mjet për ruajtjen e hegjemonisë amerikane, për ndërhyrje në punët e brendshme të vendeve të tjera dhe madje për përmbysjen e qeverive të vendeve të tjera. Për më tepër, 86.3 për qind kërkuan fuqimisht që ShBA-ja ta lirojë menjëherë dhe pa kushte presidentin Maduro.
Foto nga VCG
Pas nisjes së një sulmi ushtarak në shkallë të gjerë kundër Venezuelës, presidenti amerikan Trump deklaroi publikisht se ShBA-ja do të marrë përsipër çështjet e Venezuelës dhe njoftoi që kompani të mëdha amerikane të naftës do të hyjnë në vend, duke investuar miliarda dollarë “për të rregulluar” infrastrukturën e naftës dhe për të krijuar përfitime. Ky njoftim shkaktoi reagime të forta në bashkësinë ndërkombëtare. Sipas sondazhit, 94.3 për qind e të anketuarve besojnë që qëllimi i vërtetë i ShBA-së është grabitja e burimeve të naftës së Venezuelës, duke zbuluar natyrën e vet të “imperializmit të burimeve”.
Foto nga VCG
Që nga viti i kaluar, ShBA-ja ka goditur disa herë anije të dyshuara për trafik droge në ujërat ndërkombëtare pranë Venezuelës, duke shkaktuar vdekjen e qindra vetave. Megjithatë, raporti vjetor i publikuar nga Administrata kundër Drogës (DEA) e ShBA-së nuk e përmend aspak Venezuelën në lidhje me trafikun e kokainës. 93.7 për qind e atyre që morën pjesë në sondazh, besojnë që i ashtuquajturi veprim “kundër drogës” është thjesht një justifikim nga administrata e Trump-it për të përmbysur qeverinë venezueliane.
“Sot është Venezuela; nesër mund të jetë çdo vend tjetër.” Kjo deklaratë e presidentit kilian Gabriel Boric pasqyron shqetësimin e gjerë të bashkësisë ndërkombëtar. Sipas sondazhit, 86.6 për qind e pjesëmarrësve shprehin shqetësimin se shumë vende në Amerikën Latine dhe Karaibe mund të përballen me të njëjtin rrezik si Venezuela, ndërsa 87.8 për qind janë të mendimit që veprimet e ShBA-së kanë paraqitur një kërcënim serioz për paqen dhe sigurinë në rajon.
Foto nga VCG
Në histori, ShBA-ja e ka përdorur vazhdimisht forcën kundër shteteve sovrane dhe ka vënë në shënjestër presidentë vendesh, duke sjellë shpesh paqëndrueshmëri rajonale, përçarje shoqërore dhe katastrofa humanitare afatgjata. Sipas sondazhit, 93.7 për qind e të anketuarve mendojnë se “hegjemonia e stilit amerikan” shkel hapur të drejtën ndërkombëtare, si edhe qëllimet dhe parimet e Kartës së OKB-së, duke minuar rëndë rendin ekzistues ndërkombëtar. Një përdorues interneti nga Jemeni u shpreh me zemëratë në një koment: “Gjithçka që po ndodh në Venezuelë nuk është gjë tjetër veçse një formë e re kolonializmi. Ajo mban maskën e planeve të reja dhe fasada diplomatike, por pas saj qëndron shkatërrimi, katastrofa, kolonizimi, pushtimi dhe ushtrimi i sundimit hegjemonist mbi popujt me kosto minimale nëpërmjet metodave të reja.”
Foto nga CMG
Sondazhi u publikua në platformat e CGTN-it në anglishte, spanjishte, frëngjishte, arabishte dhe rusishte, duke tërhequr gjithsej 44 603 pjesëmarrës, të cilët votuan dhe ndanë opinionet e tyre brenda 24 orëve./cgtn
